ރީސައިކަލް ކުރެވިފައިވާ އުފެއްދުންތައް ދައްކުވައިދޭ ފަންނީ މައުރަޒެއް އިއްޒުއްދީން ސްކޫލުގައި ކުރިއަށް ގެންދިޔުމަށް ހަމަޖެހިއްޖެއެވެ.
މި މައުރަޒު ކުރިއަށް ގެންދިޔުމަށް ހަމަޖެހިފައިވަނީ މިފެށޭ ހަފްތާގެ އާދީއްތަ ދުވަހާއި ހޯމަ ދުވަހުގައެވެ.
"އަހަރެންގެ ޕްލެނެޓް، އަހަރެންގެ ސިއްޙަތު" މި ތީމް ގެ ދަށުން ކުރިއަށްގެންދާ މި މައުރަޒަކީ، ތިމާވެށި ރައްކާތެރި ކުރުމުގައި ދަރިވަރުން އަހުލުވެރި ކުރުމުގެ ގޮތުން އެޑިޔުކޭޝަން މިނިސްޓްރީ އާއި މިނިސްޓްރީ އޮފް ހެލްތާއި ޑަބްލިޔު.އެޗް.އޯ ގުޅިގެން ބާއްވާ މައުރަޒެކެވެ.
މި މައުރަޒުގައި ދައްކާލެވޭނީ ރާއްޖޭގެ އެކި ކަންކޮޅުތަކުގެ ދަރިވަރުން ހުށަހަޅާފައިވާ ރިސައިކަލް ކުރެވޭ ތަކެތިން ތައްޔާރުކޮށްފައިވާ ފަންނުވެރި އުފެއްދުންތަކާއި، ކުރެހުންތަކެވެ. މި މައުރަޒުގައި ރާއްޖޭގެ 7 ޕްރޮވިންސްގެ ސްކޫލްތައް ހިމެނޭހެން 44 ސުކޫލެއްގެ ދަރިވަރުންގެ ފަންނުވެރި އުފެއްދުންތައް ދައްކާލެވިގެންދާނެއެވެ.
އިއްޒުއްދީން ހޯލްތެރޭގައި ކުރިއަށްގެންދިޔުމަށް ހަމަޖެހިފައިވާ މި މައުރަޒު 26 ޖޫން ގެ ހެނދުނު 11:00އިން ފެށިގެން އެދުވަހުގެ ރޭގަނޑު 22:00 އަށް އަދި 27 ޖޫން ގެ ހެނދުނު 10:00 ރޭގަނޑު އިރުއޮއްސި 18:00 ކުރިއަށް ދާނެއެވެ.
ދަރިވަރުން ތިމާވެއްޓާއި ރަހްމަތްތެރި ކުރުމުގެ ގޮތުން އެޑިޔުކޭޝަން މިނިސްޓްރީއިން އެކިއެކި މަސައްކަތްތައް ކުރަމުން ދާއިރު، ތިމާވެއްޓަށް ގެއްލުންވާ ފަދަ ޕްލާސްޓިކް ކޮތަޅުފަދަ ތަކެތި ސްކޫލުތަކުގައި ބޭނުން ކުރުން ވަނީ މަނާކޮށްފައެވެ. އަދި އެއްފަހަރު ބޭނުން ކުރުމަށްފަހު އުކާލެވޭ ތަކެތިން ބޭނުންތެރި ތަކެތި އުފައްދާނެ ގޮތް ދަރިވަރުންނަށް ކިޔާދީ، އެފަދަ ތަކެތި ދަރިވަރުން ލައްވާ ތައްޔާރުކުރުމުގެ އެކިއެކި ޕްރޮގްރާމްތައް ސްކޫލުތަކުގައި ކުރިއަށް ގެންދެއެވެ.