ސަރުކާރުން ތަރައްޤީކުރަން ފަށާފައިވާ ކުޑަގިރި ޕިކްނިކް އައިލެންޑް އަންނަ ޖުލައި މަހުގެ ފަހު ހަފްތާގައި ޢާއްމުނަށް ބޭނުންކުރުމަށް ހުޅުވާލުމަށް މަސައްކަތް ކުރައްމުންދާކަމަށް ސަރުކާރުން ހާމަކޮށްފިއެވެ. މިރަށް ތަރައްޤީކުރަނީ ސަރުކާރުގެ ކުންފުނިތައް ގުޅިގެންނެވެ.
ޕިކްނިކް އައިލެންޑްގެ މަސައްކަތް ކުރިއަށްދާގޮތް ބައްލަވާލެއްވުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހުއާއި، ނައިބު ރައީސް ފައިސަލް ނަސީމް ވަނީ ކުޑަގިރިއަށް ޒިޔާރަތް ކުރައްވާފައެވެ. މި ޒިޔާރަތުގައި ކުޑަގިރީގެ މަސައްކަތްތަކާއި ހަވާލުވެފައިވާ ސަރުކާރުގެ ކުންފުނިތަކުގެ މެނޭޖިން ޑިރެކްޓަރުންނާއި އިސްވެރިން ބައިވެރިވެ ވަޑައިގެންނެވިއެވެ.
ކުޑަގިރިއަށް ވަޑައިގެން ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނައިބު ވަނީ، ކުޑަގިރި ފެހިކުރުމަށް ކުރިއަށްގެންދާ ގަސް އިންދުމުގެ ޕްރޮގްރާމްގައި ބައިވެރިވެ ވަޑައިގެން، ގަސް އިންދަވާފައެވެ. އެއަށްފަހު އެސްއޯއީތަކުގެ އިސް ފަރާތްތަކާއެކުވަނީ، ވަކިވަކި ކުންފުނިތަކުން ހަވާލުވެ ކުޑަގިރި ތަރައްޤީކުރުމަށް ކުރިއަށްގެންދާ މަސައްކަތްތައް ބައްލަވާލައްވާފައެވެ.
މި ޕްރޮޖެކްޓްގެ އެންމެ ބޮޑު ބޭނުމަކީ މާލޭގެ ރައްޔިތުން އާއިލާއާއިއެކު ވަގުތު ހޭދަކޮށްލާ، ހިތްފަސޭހަކޮށް ދަތުރުދެވޭނެ މާޙައުލެއް ޤާއިމުކުރުމަށް ރައީސްގެ ވަޢުދުފުޅަށް ކުރިއަށްގެންދާ މަޝްރޫޢުއެކެވެ.
ކުޑަގިރިއަކީ މާލެ ކައިރިން ފަޅެއް ހިއްކައިގެން ހަދާ 8 ހެކްޓަރުގެ ރަށެކެވެ. ބިން ހިއްކާ ނިމި ރަށުގެ ގޮނޑުދޮށް ޙިމާޔަތްކުރުމުގެ އިތުރުން ރަށުގެ ބީޗްތައް ހެދުމުގެ މަސައްކަތް ކުރިއަށްގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީންނެވެ.
"ގިނަ މަސައްކަތްތައްވަނީ ނިމިފައި. އެމްޓީސީސީގެ ސީއެސްއާރްގެ ދަށުން އެބަ ކުރިއަށްގެންދަން ރަށުގައި ޖެޓީ ހެދުމާއި، ރިސެޕްޝަނާއި ސްޓާފް އެކަމަޑޭޝަންގެ މަސައްކަތް." އެމްޓީސީސީގެ ސީއީއޯ އާދަމް އާޒިމް ވިދާޅުވިއެވެ.
ޕިކްނިކް އައިލެންޑްގެ މާސްޓަރ ޕްލޭން ތައްޔާރުކޮށްފައިވަނީ ހައުސިން ޑިވެލޮޕްމަންޓް ކޯޕަރޭޝަން އެޗްޑީސީންނެވެ. އަދި ރަށުގެ ގިނަ މަސައްކަތްތަކެއްވެސް އެޗްޑީސީގެ ބެލުމުގެދަށުން ދަނީ ކުރިއަށްގެންދަމުނެނެވެ. އެޗްޑީސީގެ މެނޭޖިން ޑިރެކްޓަރ ސުހައިލް އަޙުމަދު ވިދާޅުވީ، ރަށް ފުރަތަމަ ހުޅުވާލާއިރު، އެކަމަޑޭޝަން ބްލޮކްތައް ނުހުންނާނެކަމަށެވެ. ނަމަވެސް އާއްމު ދެން ޕިކްނިކް އައިލެންޑަކުން ލިބެންޖެހޭ އާއްމު އެހެން ހުރިހާ ޚިދުމަތްތައް ހުންނާނީ ޤާއިމުވެފައިކަމަށެވެ. އެކަމަޑޭޝަން ބްލޮކްތަކުގެ މަސައްކަތް ހިމެނެނީ، ޕިކްނިކް އައިލެންޑްގެ ފޭސް2 ގެ މަސައްކަތުގެ ތެރޭގައެވެ.
"ޕަބްލިކް ޓޮއިލެޓް، ޗޭންޖިން ރޫމް އަދި މަޑޫކޮށްލައިގެން ތިބެވޭނެ ހަޓްތައް ހުންނާނެ. ކެއުމުގެ ކަންކަން ފަސޭހައިން ގެންދެވޭނެ. ސަރުކާރުން ހަވާލުކޮށްފައިވާގޮތަށް ޖުލައި 26އަށް މަސައްކަތް ނިންމާ ބޭނުންކުރަން ހުޅުވާލާވަރަށް މި މަސައްކަތްތައް ނިމޭނެ." ސުހައިލް ވިދާޅުވިއެވެ.
ސުހައިލް ވިދާޅުވީ ވޯޓަރ ސްޕޯޓްސްގެ ޚިދުމަތްވެސް ލިބެން ހުންނާނެކަމަށެވެ.
އެމްޑަބްލިއުއެސްސީއާއި ފެނަކަ އަދި ސްޓެލްކޯ ގުޅިގެން ދަނީ ރަށުގެ ޔުޓިލިޓީ ވިއުގަތަށް އެޅުމުގެ މަސައްކަތްވެސް ކުރަމުންނެވެ. މި މަސައްކަތްތައްވެސް ކަނޑައެޅިފައިވާގޮތަށް އަންނަ މަހު ނިންމުމަށް އެ ކުންފުނިތަކުން އަންނަނީ މަސައްކަތް ކުރަމުންނެވެ.
ކުޑަގިރިއަކީ ސްޕީޑް ބޯޓެއްގައި ދަތުރުކޮށް، މާލެއިން ފުރައިގެ 15 މިނެޓުން ދެވޭހާ ކައިރީގައި އޮންނަ ރަށެކެވެ.