ތިމަރަފުށީގައި ސަރުކާރުން ތަރައްޤީކުރާ 100 ރޯހައުސްގެ މަސައްކަތް އޮގަސްޓްމަހުގެ ނިޔަލަށް ނިންމާނެކަމަށް މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ޕްލޭނިން މިނިސްޓަރ މިއަދު މަޖިލީހަށް ހާޒިރުކޮށް ސުވާލުކޮށްފައިވަނީ ތިމަރަފުށީ ދާއިރާގެ މެންބަރު ޢަބްދުﷲ ރިޔާޟެވެ. ތިމަރަފުށީގެ 100 ރޯހައުސް މުޅިން ނިންމައި ހަވާލުކުރެވޭނެ ވަގުތަކާ ގުޅޭގޮތުން ކުރި ސުވާލަށް ޕްލޭނިން މިނިސްޓަރ ވިދާޅުވީ ކޯވިޑްގެ ޙަލަތާގުޅިގެން މަސައްކަތް ނިންމަން ދިން ތާރީޚަށްވުރެ މަސައްކަތް ދިގުލައިގެން ދިޔަކަމަށެވެ.
ނަމަވެސް މިހާރު މަޝްރޫޢުގެ މަސައްކަތް މުޅިން ނިމުމަކާ ގާތްވެފައިވާކަމަށެވެ.
2500އަށްވުރެބޮޑު އާބާދީއެއް އޮންނަ ތިމަރަފުއްޓަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ސަރުކާރުން އެރަށުގައި ހައުސިން މަޝްރޫޢުއެއް އިޢުލާންކޮށް އެމަސައްކަތް ފެށީ 2020ވަނަ އަހަރުއެވެ. ކައުސިލުން މީގެ ކުރިން މަޢުލޫމާތު ދެއްވާފައިވާގޮތުގައި ރަށުގައި ގޯތި ބޭނުންވާ 300އަށްވުރެ ގިނަ އާއިލާ އެބަތިއްބެވެ.
ތިމަރަފުށީގައި ތަރައްޤީކުރަނީ 3 ކޮޓަރީގެ ރޯހައުސް ތަކެކެވެ.
މަޖިލީހުގައި މަޢުލޫމާތު ޙިއްސާކުރައްވަމުން މިނިސްޓަރ އަސްލަމް ވިދާޅުވީ މިހާރު މުޅި މަޝްރޫޢުގެ %73 ނިމިފައިވާކަމަށެވެ. މިހާރު ކުރިއަށްދަނީ ޢިމާރާތްތަކުގެ ފިނިޝިން މަސައްކަތްތަކެވެ.
"މިހާރު ތާވަލަށް ބަލާއިރު އޮގަސްޓް މަހު 31ގެ ކުރިން މަޝްރޫޢުގެ ހުރިހާ މަސައްކަތެއް ނިމޭނެ. ހަވާލުކުރާއިރު ހުންނާނީ ފިނިޝިން މަސައްކަތަކާއި އަދި ޔުޓިލިޓީ ޚިދުމަތްތައްވެސް ގުޅާފައި." އަސްލަމް ވިދާޅުވިއެވެ.
އަސްލަމް ވިދާޅުވީ ގެތަކަށް ފެނާއި ކަރަންޓާއި ނަރުދަމާ އެޅުމުގެ މަސައްކަތްވެސް ކުރިއަށްދާކަމަށެވެ. އަދި ގެތަށް ހަވާލުކުރާނީ މި ހުރިހާ މަސައްކަތްތައް ނިންމާނެކަމަށެވެ.
މި ގެތަކަކީ 3 ކޮޓަރިއާއި، ތިން ފާޚާނައާއި ސިިޓީންގްރޫމަކާއި ލޯންޑްރީ އޭރިއާއެއް ހިމެނޭގޮތަށް ހަދާ ރޯހައުސްތަކަކެވެ. އެސްޖޭ ކޮންސްޓްރަކްޝަނާ ޙަވާލުކޮސްގެން ކުރިއަށްގެންދާ މި މަޝްރޫޢުއަކީ 71 މިލިއަން ރުފިޔާގެ މަޝްރޫޢެކެވެ.