މިދިޔަ އަހަރުގެ ނޮވެމްބަރުމަހު ފަރަންސޭސިވިލާތުގެ ވެރިރަށް ޕެރިހަށް ދިން ވަރުގަދަ ހަމަލާގައި ބައިވެރިވި ހަނގުރާމަވެރިން ކަމަށް ބުނާ ބަޔަކު ފެންނަ ވީޑިއޯއެއް ހައްދުފަހަނަ އަޅާފައިވާ އައި.އެސް ޖަމާޢަތުން ޢާއްމުކޮށްފިއެވެ.މި ވީޑިއޯގައި ހަމާލާގައި ބައިވެރިވި ކަމަށް ބުނާ 9 މީހެއްގެ މަންޒަރުތައް ފެނިގެންދެއެވެ. މި ވީޑިއޯގައި އައި.އެސް ޖަމާޢަތުން ވަނީ ދެން މިފަދަ ހަމަލާއެއް އަމާޒުކުރާނީ އިނގިރޭސިވިލާތަށް ކަމަށް ބުނެ އެގައުމަށް އިންޒާރު ދީފައެވެ. ނޮވެމްބަރ މަހުގެ 13 ވަނަ ދުވަހު ޕެރިހުގައި ދިން ހަމަލާގައި 9 ހަނގުރާމަވެރިއަކު ވަނީ 3 މީހުންގެ ޓީމެއް ހަދާ ޕެރިހުގެ އެތަކެއް ތަނަކަށް ބޮމާއި ބަޑީގެ ހަމަލާތަކެއް ދީފައެވެ. މި ހަމަލާތަކުގައި 130 މީހުން މަރުވެ އެތަށް ބަޔަކު ވަނީ ޒަޚަމްވެފައެވެ.ހަމަލާތަކުގައި ފުލުހުންނާ ހިނގި ކުރިމަތިލުންތަކުގައި ހަނގުރާމަވެރިންގެ 9 މީހުން މަރުވި އިރު، ހަމަލާގައި ބައިވެރިވި ކަމަށް ބެލެވޭ 10 ވަނަ މީހާ ހޯދުމުގެ މަސައްކަތް ފަރަންސޭސި ފުލުހުން އަދި ވެސް ދަނީ ކުރަމުންނެވެ.