އަމާން ވިލުންވެރި މުޖުތަމައެއް ބިނާކުރުމަށްޓަކައި ކުރިއަށްގެންދާ "ހަފްތާރެސް"ގެ މިފަހަރުގެ ޕްރޮގްރާމް ރ. އަތޮޅުގައި ފަށައިފިއެވެ.
ރ. އަތޮޅުގައި މިހާރު ކުރިއަށްދާ ހަފްތާރެސް ޕްރޮގްރާމް ފަށާފައިވަނީ ރ. އުނގޫފާރުގައެވެ.
މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި ނޭޝަނަލް ކައުންޓަރ ޓެރަރިޒަމް ސެންޓަރާއި ކައުންސިލްތަކާއި ގުޅިގެން ކުރިއަށްގެންދާ "ހަފްތާރެސް" ޕްރޮގްރާމަކީ ރާއްޖޭގެ އެކި ކަންކޮޅުތަކުގައި ސިލްސިލާކޮށް ކުރިއަށްގެންދާ ޕްރޮގްރާމެކެވެ. އެގޮތުން ރ. އަތޮޅުގައި ކުރިއަށްދާ ޕްރޮގްރާމަކީ ހަފްތާރެސް ޕްރޮގްރާމްގެ 8 ވަނަ ޕްރޮގްރާމެވެ. 5 ދުވަހަށް ބަހާލައިގެން މިޕްރޮގްރާމް ކުރިއަށްގެންދަނީ 3 ކެޓަގަރީއަކަށް ބަހާލައިގެންނެވެ. އެއީ ޒުވާނުންނާއި، ސްކޫލްތަކަށާއި ކައުންސިލްތަކަށް އަމާޒުކޮށްގެންނެވެ.
މި ޕްރޮގްރާމް ފެށުމުގެ ރަސްމިއްޔާތުގައި ވާހަކަ ދައްކަވަމުން ޑިރެކްޓަރ އޮފް އެންސީޓީސީ ލެފްޓިނެންޓް ކާނަލް އިބްރާހީމް ނަޢީމް ވިދާޅުވީ މި ޕްރޮގްރާމަކީ މިވަގުތު ރާއްޖެއަށް ކުރިމަތިވެފައިވާ އެއް ނުރައްކާ ކަމަށްވާ ހަރުކަށި ފިކުރުތަކާ ހައްދުފަހަނައަޅާ ދިޔުމާއި ޓެރަރިޒަމްގެ ނުރައްކާތެރިކަމުން ސަލާމަތް ކުރުމަށްޓަކައި ކުރާ މަސައްކަތެއްކަމަށެވެ. އެގޮތުން 2020 ވަނަ އަހަރު ސަރުކާރުން ކަނޑައަޅާފައިވާ އެކްޝަން ޕްލޭންގެ ދަށުން ކުރާ މަސައްކަތްތަކަށް މަގުފަހި ކުރުމަށްޓަކައި "ހަފްތާރެސް" ޕްރޮގްރާމަކީ ވަރަށް ބޮޑު އެހީތެރިކަމެއްގެ ގޮތުގައި އޭނާ ފާހަގަކުރެއްވިއެވެ.
ރ. އަތޮޅުގައި ފެށިގެން ކުރިއަށްދާ ހަފްތާރެސް ޕްރޮގްރާމްގެ ތެރެއިން މޯލްޑިވްސް ޕޮލިސް ސަރވިސްއާއި، އެންސީޓީސީ، އައިޔޫއެމް އަދި ހޯޕް ފޯ ވިމެންގެ ފަރާތުން ޚާއްސަ ސެޝަންތަކެއް ކުރިއަށް ގެންދާނެއެވެ. އަދި މި ސެޝަންތަކުގެ އިތުރުން ހުކުރު ދުވަހު އާއިލީ ހަވީރެއްވެސް ކުރިއަށްދާނެއެވެ.
"ހަފްތާރެސް" ޕްރޮގްރާމަކީ ވިލުންވެރި މުޖުތަމައެއް ބިނާކޮށް އެންމެންގެ ސަލާމަތްތެރިކަމާއި އުފާފާގަތިކަން ކުރިމަގަށް ކަށަވަރުކުރުމަށްޓަކައި ހިންގާ ޕްރޮގްރާމެކެވެ. އަދި މިޕްރޮގްރާމަކީ އެކުވެރިކަމާއި އިޖުތިމާއީ ބަދަހިކަން އާލާކޮށް ހޭލުންތެރިކަން އިތުރުކޮށް މުޅި މުޖްތަމައުގެ ހުރިހާ ދާއިރާތައް ހިމަނައިގެން ހިންގޭ ހަރަކާތެއްވެސްމެއެވެ.