އެކި ދާއިރާތަކުން ވަޒީފާގެ ގިނަ ފުރުސަތުތަކާއެކު މޯލްޑިވްސް ނެޝަނަލް ޔުނިވަރސިޓީން ބާއްވާ އެމްއެންޔޫ ޖޮބް ފެސްޓިވަލް ފަށައިފިއެވެ.
އެމްއެންޔޫގެ ޖޮބް ފެސްޓިވަލް ހަރަކާތް ކުރިއަށްދާނީ މިރޭގެ 10:00ގެ ނިޔަލަށެވެ.
ދިވެހިރާއްޖޭގެ ޤައުމީ ޔުނިވަރސިޓީން އިސްނަގައިގެން ފެށި ޖޮބް ފެސްޓިވަލްއަކީ ރާއްޖޭގެ ވަޒީފާގެ ބާޒާރުގައި ހުރި ފުރުޞަތުތަކުގެ މަޢުލޫމާތުދީ، އެ ވަޒީފާތަކަށް މީހުން ހޯދުމަށް ކުރިއަށްގެންދާ ހަރަކާތެކެވެ.
އެމްއެންޔޫގައި ކުރިއަށްދާ މި ފެސްޓިވަލް ފަށްޓަވައިދެއްވީ މޯލްޑިވްސް ޓްރާންސްޕޯޓް އެންޑް ކޯންޓްރެކްޓިން ކޮމްޕެނީ އެމްޓީސީސީގެ ސީއީއޯ އާދަމް އާޒިމްއެވެ. އާޒިމް ވިދާޅުވީ އެމްޓީސީސީގެ ތަޖުރިބާއަށް ބަލާއިރު، ހުޅުވާލާ ފުރުޞަތުތަކަށް ގިނަ ޒުވާނުން ކުރިމަތިލާކަމަށެވެ. ނަމަވެސް އެންމެ ބޮޑު ގޮންޖެހުމަކަށް ވަނީ ވަޒީފާތަކުގައި ދެމިތިބޭ ޒުވާނުން މަދުވުންކަމަށެވެ.
އާޒިމް ވިދާޅުވީ، އާމްދަނީ ލިބޭ ކޮންމެ މަސައްކަތަކީ ރީތި މަސައްކަތެއްކަން، ބޮޑުވަމުން އަންނަ ކުދިންނަށް ބުނެދޭންޖެހޭކަމަށެވެ.
"ދަސްކޮށްދޭންވީ ކޮންމެ މަސައްކަތަކީ ޤަދަރުވެރި ރީތި މަސައްކަތެއްކަން. އޭރުން ރާއްޖޭގައި މަސައްކަތްތެރިން ބޭނުންވާ ދާއިރާތަކަށް މީހުން ލިބި، ވަޒީފާ ނުލިބުމުގެ މައްސަލައަށް ޙައްލު ލިބޭނީ" އާޒިމް ވިދާޅުވިއެވެ.
އެމްއެންޔޫގެ ޑެޕިއުޓީ ވައިސް ޗާންސެލަރ (ރިސަރޗް އެންޑް އެންޓަޕްރައިސް) ޑރ.އާއިޝަތު ޝެހެނާޒް އާދަމް ވިދާޅުވީ ޔުނިވަރސިޓީއަކުން ކިޔަވައިދިނުމުގެ ބޭނުމަކީ، ހަމައެކަނި ތަޢުލީމު ދިނުން ނޫންކަމަށެވެ. އަދި ރާއްޖޭގެ ވަޒީފާގެ ބާޒާރަށް ބޭނުންވާ ހުނަރެވެރި ޤާބިލް އަދި ތަމްރީން ލިބިފައިވާ މީހުން ނެރުމަކީވެސް ޔުނިވަރސިޓީގެ ބޭނުމެއްކަމަށެވެ.
"މި ފެސްޓިވަލްގައި އެބަ ކިޔައިދޭ ކުންފުނިތަކުން ވަޒީފާގެ ތަޖުރިބާ ހޯދަން ހުރި އިންޓަރންޝިޕް ފުރުޞަތުތައް. އަދި ހުސްކޮށް ހުރި ވަޒީފާތަކުގެ މަޢުލޫމާތު ދެވޭ. މިއީ ވަރަށް ބައިވަރު ފުުރުޝަތު" ޑރ.ޝެހެނާޒް ވިދާޅުވިއެވެ.
މި ޖޮބް ފެސްޓިވަލްގައި އެމްއެންޔޫގެ ދަރިވަރުންގެ އިތުރުން އެހެނިހެން ޔުނިވަރސިޓީތަކާއި އާއްމުންނަށްވެސް ބައިވެރިވުމަށް ވަނީ ފުރުޞަތު ހުޅުވާލާފައެވެ.
ފެސްޓިވަލްގައި 30އަށް ވުރެ ގިނަ ސްޓޯލްތައް ހުރިއިރު، އޭގެތެރޭގައި މީޑިއާ ދާއިރާއާއި، ފަތުރުވެރިކަމާއި، ފަންނާ ސަޤާފަތުގެ ދާއިރާއާއި، ޔުޓިލިޓީ ކުންފުނިތަކާއި، ކަނޑު ދަތުރުފަތުރުގެ ދާއިރާއާއި އަދިވެސް ގިނަ ދާއިރާތަކެއްގައި މަސައްކަތްކުރާ ކުންފުނިތަކުގެ ސްޓޯލްތައް ހިމެނެއެވެ.
އެގޮތުން ޕަބްލިކް ސަރވިސް މީޑިއާ، ޕީއެސްއެމް، އެމްޓީސީސީ، އެމްޑަބްލިއުއެސްސީ، ދިރާގު، އުރީދޫ، އެމްއޭސީއެލް އާއި ބައެއް މިނިސްޓްރީތަކާއި ރިސޯޓްތަކުގެ ސްޓޯލްތައް ހިމެނޭކަން ފާހަގަކޮށްލެވެއެވެ.