ރާއްޖޭގެ އެންމެ ކާމިޔާބު އެއް ކުލަބު ކަމަށްވާ ވިކްޓަރީ ސްޕޯޓްސް ކުލަބުން ދަރަނިތައް ނިންމައި، ސްރީ ލަންކާގެ ކޯޗު ޕަކީރު އަލީގެ އިރުޝާދުގެ ދަށުން ދެވަނަ ޑިވިޝަނުގައި ވާދަކުރަން ތައްޔާރުވެއްޖެއެވެ.
މިދިޔަ މަހުގެ 29 ވަނަ ދުވަހު ވިކްޓަރީގެ އައު ބޯޑެއް އެކުލަވާލައި، އެ ބޯޑުން ވަނީ ވަކި ކަންތައްތަކަކަށް އަމާޒުހިފާފައެވެ.
ބުރާސްފަތި ދުވަހު ވިކްޓަރީން ނެރުނު ނޫސްބަޔާނެއްގައި ބުނީ މި މަހުގެ ތެރޭގައި ކުރަން ހުރި ކަންކަން ނިންމާފައިވާ ކަަމަށެވެ. އެގޮތުން ބިދޭސީ ކުޅުންތެރިންނާއި ދިވެހި ކުޅުންތެރިންނަށް ދޭން ޖެހޭ ފައިސާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާ ހަވާލުކޮށްފައިވާ ކަމަށް ވަނީ ބުނެފައެވެ.
އަންނަ ޖުލައި މަހުގެ ހަތަރުވަނަ ދުވަހު ފަށާ ދެވަނަ ޑިވިޝަން ފުޓްބޯޅަ މުބާރާތަށް ވިކްޓަރީން މިހާރު ވަނީ ސްކޮޑެއްވެސް ތައްޔާރުކޮށްފައެވެ. އެގޮތުުން އެ މުބާރާތުގައި ވިކްޓްރީގެ ކޯޗަކަށް ހުންނާނީ ސްރީ ލަންކާގެ ކޯޗު ޕަކީރު އަލީއެވެ. ލަންކާ ގައުމީ ޓީމުގެ ކޯޗަކަށް 2018 ވަނަ އަހަރުގެ ސާފް ޗެމްޕިއަންޝިޕްގައި ހުރި ޕަކީރު ވަނީ ރާއްޖޭގެ އެކި ޓީމުތަަކަށް ކޯޗުކޮށްދީފައެވެ. އޭނާ އެންމެ ފަހުން ހުރީ ބަންގްލަދޭޝްގެ ޕޮލިސް ޓީމުގެ ކޯޗަކަށެވެ.
ވިކްޓަރީން އެކުލަވާލި އައު ސްކޮޑުގައި ބިދޭސީ ހަތަރު ކުޅުންތެރިންނާއެކު 26 ކުޅުންތެރިން ހިމެނެއެވެ. ބިދޭސީ ކުޅުންތެރިންގެ ތެރޭގައި ހިމެނީ މިސްރުގެ ތިން ކުޅުންތެރިންގެ އިތުރުން ޖޯޑަންގެ ކުޅުންތެރިއެކެވެ.
ކުޅުންތެރިންގެ މުސާރަ ނުދިނުމާއި އެޑްމިނިސްޓްރޭޓިވް ގިނަ މައްސަލަތަކުގެ ސަބަބުން އެފްއޭއެމުން 2019 ވަނަ އަހަރު ފުޓްބޯޅައިގެ ހަރަކާތްތަކުން ވިކްޓަރީ އޮތީ ސަސްޕެންޑް ކޮށްފައެވެ. އެއީ ކުލަބު ލައިސަންސިން ކަންކަން ފުރިހަމަކުރަން ދިން މުއްދަތުގައި އެކަންކަން ނުކުރުމުގެ އިތުރުން މެޗުތަކަށް ހާޒިރުނުވެ، ކުޅުންތެރިންނަށް މުސާރަ ވެސް ހަމަޖައްސައިނުދެވޭ މައްސަލައިގައެވެ.