ޕާކިސްތާނުގައި އަވަސް އިންތިޚާބެއް ބޭއްވުމަށް ގޮވާލައި އެ ޤައުމުގެ ކުރީގެ ބޮޑުވަޒީރު އިމުރާނު ޚާނަށް ތާޢީދުކުރާ މީހުން މުޒާހަރާކުރުމުން އެ ޤައުމުގައި ބޮޑެތި ހަމަނުޖެހުންތަކެއް ހިނގައިފިއެވެ.
މިދިޔަ މެއި މަހުގެ ތެރޭގައި ޕާކިސްތާނުގެ ބޮޑުވަޒީރުގެ މަޤާމުން ވަކިކޮށްފައިވާ އިމުރާން ޚާންވަނީ އެ ޤައުމުގެ ވެރިރަށް އިސްލާމުއާބާދަށް ޖަމާވެ އަވަސް އިންތިޚާބެއް ބޭއްވުމަށް މުޒާޙަރާކުރުމަށް އޭނާއަށް ތާޢީދުކުރާ މީހުންނަށް ގޮވާލައްވައިފައެވެ. އެއާއެކު އެތައް ހާސް ބަޔަކުވަނީ އިސްލާމުއާބާދާއި ރާވަލްޕިންޑީގައި ބޮޑެތި އެއްވުންތަކެއް ބާއްވައިފައެވެ. އެ އެއްވުންތައް ރޫޅާލަން ޕާކިސްތާނުގެ ފުލުހުންވަނީ ބާރުގެ ބޭނުންކޮށް ކަރުނަގޭސް ޖަހައިފައެވެ. އަދި ޕާކިސްތާނުގެ އެހެން ސަރަޙައްދުތަކުން އިސްލާމުއާބާދަށް މީހުން އައުން ހުއްޓުވުމަށް އެ ރަށަށް ވަދެވެން އޮންނަ މަގުތައްވަނީ ފުލުހުން ބަންދުކޮށްފައެވެ. އޭގެ އިތުރުން ޕާކިސްތާނުގެ ޤާނޫނުހަދާ މަޖިލިސްކުރާގެއާއި ސަރުކާރުގެ ވުޒާރާތަކާއި އެންބަސީތަކުގެ ސަލާމަތީ ފިޔަވަޅުތައްވަނީ ވަރުގަދަކޮށްފައެވެ.
ޕާކިސްތާނުގެ ސަރުކާރުންވަނީ އިމުރާނު ޚާނު ގޮވާލައްވާފައިވަނީ ޤާނޫނާ ޚިލާފަށް ޢަމަލުކުރުމަށްކަމަށާއި އެއީ ޤައުމުގެ ހަމަޖެހުން ނަގާލުމަށް އޭނާ ކުރައްވައި މަސައްކަތެއްކަމަށެވެ. ފާއިތުވި ދުވަސްތަކުގައި ފުލުހުންވަނީ އިމުރާނު ޚާނަށް ތާޢީދުކުރައި 1،700 މީހުން ހައްޔަރުކޮށްފައެވެ.