ދުނިޔޭގެ ޞިއްޙަތާބެހޭ ޖަމުޢިއްޔާގެ އެންމެ އިސްވެރިޔާގެ މަޤާމަށް އަނެއްކާވެސް ޓެޑުރޮސް އަދަނޮމު ގެބްރިޔޭސުސް އިންތިޚާބުކޮށްފިއެވެ.
ސުވިޓުޒަލޭންޑުގެ ޖެނީވާގައި ބާއްވައި ދުނިޔޭގެ ޞިއްޙަތާބެހޭ ޢާއްމު ބައްދަލުވުމުގައި ޞިއްޙަތާބެހޭ ޖަމުޢިއްޔާގެ އެންމެ އިސްވެރިޔާގެ މަޤާމަށް ގެބްރިޔޭސުސް އިންތިޚާބުކޮށްފައިވަނީ ސިއްރު ވޯޓަކުންނެވެ. އެ މަޤާމަށް އިތުރު މީހަކު ކުރިމަތިލައިފައެއް ނުވެއެވެ. އިތުރު ފަސް އަހަރަށް ގެބްރިޔޭސުސް އިންތިޚާބުވެވަޑައިގެންކަން އިޢުލާނުކުރުމުން ޢާއްމު ބައްދަލުވުމުގެ ބައިވެރިންވަނީ ވަރަށް ބޮޑަށް އުފާފާޅުކޮށްފައެވެ. އޭނާ އިންތިޚާބުވެވަޑައިގެންފައިވަނީ 160 ވޯޓުގެ ތެރެއިން 155 ވޯޓު ކާމިޔާބުކުރައްވައިގެންނެވެ. ނަމަވެސް އޭނާ ނިޞްބަތްވަޑައިގަންނަވާ އިތިއޯޕިޔާގެ ވޯޓެއް ލިބިވަޑައެއްނުގަތެވެ.
އިތުރު ދަޢުރަކަށް އިންތިޚާބުވެވަޑައިގެންނެވުމަށްފަހު ގެބްރިޔޭސުސް ވިދާޅުވީ ޞިއްޙަތާބެހޭ ޖަމުޢިއްޔާ ހަރުދާނާކުރެއްވުމަށް އިތުރު މަސައްކަތްތަކެއް ކުރައްވާނެކަމަށެވެ. އަދި ދާދިފަހުން ޔޫކްރެއިނަށް ކުރެއްވި ދަތުރުފުޅުގައި ފެނިވަޑައިގަތް ހިތްދަތި މަންޒަރުތައް އޭނާވަނީ ފާހަގަކުރައްވައިފައެވެ.
ޢުމުރުފުޅުން 57 އަހަރުގެ ގެބްރިޔޭސުސް ދުނިޔޭގެ ޞިއްޙަތާބެހޭ ޖަމުޢިއްޔާގެ އެންމެ އިސްވެރިޔާގެ މަޤާމާ ޙަވާލުވެވަޑައިގެންފައިވަނީ 2017ވަނަ އަހަރުގެ ތެރޭގައެވެ. އޭގެ ކުރިން އޭނާވަނީ އިތިއޯޕިޔާގެ ޞިއްޙަތާބެހޭ ވަޒީރުކަމާއި ޚާރިޖީ ވަޒީރުކަން ކުރައްވައިފައެވެ.