ވައިގެ މަގުން ރާއްޖެ އެތެރެކުރަން އުޅުނު 2 ކިލޯއަށްވުރެ ގިނަ މަސްތުވާތަކެތި އަތުލައިގެންފިއެވެ.
މޯލްޑިވްސް ކަސްޓަމްސް ސަރވިސްއިން ވިދާޅުވީ، މިތަކެތި އަތުލައިގެންފައިވަނީ ވައިގެ މަގުން ބްރެޒިލުން ރާއްޖެއައި އެމެރިކާ ރައްޔިތެއްގެ އަތުންކަމަށެވެ. މިތަކެތި އަތުލައިގަނެފައިވަނީ މިމަހުގެ 11 ވަނަ ދުވަހުއެވެ.
އޭނާގެ އަތުން މިތަކެތި އަލުގައިގެންފައިވަނީ އޭނާގެ ލަގެޖް ބަލާފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތެއް ހުރުމުން އިތުރަށް ބަލާ ފާސްކުރުމުގެ ތެރޭގައެވެ. އެގޮތުން އަތުލައިގެނުނު ތަކެތި ފުރަތަމަ މަރުހަލާގައި ތަޙުލީލުކުރިއިރު މަސްތުވާތަކެތީގެ ބާވަތެއްކަމަށްވާ ކޮކެއިންއަށް ޕޮޒިޓިވްވެފައިވާކަމަށް ކަސްޓަމްސްއިން ވިދާޅުވެއެވެ.
މި މައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި ޖުމްލަ 2.064 ކިލޯ ހުއްޓެވެ. މިތަކެތީގެ މަގުމަތީ އަގު 10 މިލިއަން ރުފިޔާއަށް އަރައެވެ. މި މައްސަލައިގައި ޝާމިލުވާ މީހާއާއި، އަތުލައިގަނެވުނު މަސްތުވާތަކެތި ކަސްޓަމްސްއިން ވަނީ ފުލުހުންނާއި ޙަވާލުކުރައްވާފައެވެ.