ރާއްޖޭގައި ފަޤީރުންގެގޮތުގައި ރަޖިސްޓްރީވެފައިވާ މީހުންނެތް 42 ރަށެއް ހިމެނޭކަމަށް އިސްލާމިކް މިނިސްޓްރީން ވިދާޅުވެއްޖެއެވެ. އިސްލާމިކް މިނިސްޓްރީން ވަނީ ފަޤީރުންނެތް ރަށްތައް އާއްމުކޮށްފައެވެ.
ރާއްޖޭގައި ފަޤީރުންގެ ގޮތުގައި ބަލަނީ ދުވާލެއްގެ މައްޗަށް އާމްދަނީ ލިބޭ މިންވަރުން އިސްލާމިކް މިނިސްޓްރީން ކަނޑައަޅާފައިވާ ވަކި މިންވަރަކަށްވުރެ މަދުން ލިބޭ މީހުންނެވެ. އިސްލާމިކް މިނިސްޓްރީން ހާމަކޮށްފައިވާ މަޢުލޫމާތުތަކަށް ބަލާއިރު، ފަޤީރުންނެތް ރަށްތައް ނިސްބަތުން އެންމެގިނައީ ށ އަތޮޅުގައެވެ. އެއަތޮޅުގައި މީހުން ދިރިއުޅޭ 14 ރަށް އޮންނައިރު، އޭގެ ތެރެއިން 6 ރަށަކީ ފަޤީރުންނެތް ރަށްރަށެވެ. އެއީ ބިލެތްފަހި، ފީވަށް، ކޮމަންޑޫ، ނޫމަރާ، ނަރުދޫ، އަދި މަރޮއްޓެވެ.
ދެވަނައަށް ފަޤީރުން ތިބި ރަށްރަށް އެންމެ މަދު އަތޮޅަކީ މ އަތޮޅެވެ. މ. އަތޮޅުގައި މީހުން ދިރިއުޅޭ 8 ރަށް އޮތްއިރު، އޭގެ ތެރެއިން 5 ރަށަކީ ފަޤީރުންނެތް ރަށްރަށެވެ. އޭގެ ތެރޭގައި ހިމެނެނީ ދިއްގަރު، ނާލާފުށި، ރަތްމަންދޫ، ވޭވަށް އަދި މަޑުއްވަރިއެވެ.
ފަޤީރުން ނެތް ރަށްރަށުގެގޮތުގައި ދެން އެންމެ ގިނަ ރަށްތައް ހިމެނެނީ ބ. އަތޮޅާއި، އދ. އަތޮޅާއި، ވ. އަތޮޅުގައެވެ. މިއިން ކޮންމެ އަތޮޅެއްގައި ފަޤީރުން ނެތް 4 ރަށް ހިމެނެއެވެ.
އެގޮތުން ބ. އަތޮޅުގައި މީހުން ދިރިއުޅޭ 13 ރަށް އޮތްއިރު، އޭގެ ތެރެއިން ފުޅަދޫ، ގޮއިދޫ، ކިހާދޫ، ކެންދޫއަކީ ފަޤީރުން ނެތް ރަށްރަށެވެ. އދ. އަތޮޅުގައި މީހުން ދިރިއުޅޭ 10 ރަށް އޮތްއިރު، އޭގެ ތެރެއިން ދިއްދޫ، މަންދޫ، ފެންފުށި، މަހިބަދޫއަކީ ފަޤީރުންނެތް ރަށްރަށެވެ. ވ. އަތޮޅުގައި މީހުން ދިރިއުޅޭ 5 ރަށުގެ ތެރެއިން، ފެލިދޫ، ރަކީދޫ، ތިނަދޫ، އަދި ފުލިދޫގައި ފަޤީރުންނެތެވެ.
މި 5 އަތޮޅުގެ އިތުރުން ދެން ފަޤީރުން ނެތް ރަށްތައް ހިމެނޭ އަތޮޅުތަކަކީ ހއ. އަތޮޅާއި، ހދ. އަތޮޅާއި، ނ. އަތޮޅާއި، ރ. އަތޮޅާއި، ކ. އަތޮޅާއި، ފ. އަތޮޅާއި، ތ. އަތޮޅުގެ އިތުރުން ލ. އަތޮޅާއި ދ. އަތޮޅުގައެވެ. ހއ. އަތޮޅުގައި ފަޤީރުން ނެތް ރަށްތަކަކީ މޮޅަދޫ، މުރައިދޫ، އަދި ތަކަންދޫއެވެ. ހދ. އަތޮޅުން ފަޤީރުން ނެތް ރަށަކީ ހިރިމަރަދޫ އެކަންޏެވެ. ނ. އަތޮޅުން ފަޤީރުންނެތް ރަށްތަކަކީ މާޅެންދޫ، މަގޫދޫ، އަދި ފޮއްދޫއެވެ. ރ. އަތޮޅުން އަނގޮޅިތީމާއި، ކިނޮޅަސް ހިމެނޭއިރު، ކ. އަތޮޅުން ހިމެނެނީ ކ. ހުރާ އެކަންޏެވެ.
ފ. އަތޮޅުގައި ފަޤީރުން ނެތް ރަށްތަކަކީ ދަރަނބޫދޫ، މަގޫދޫ، އަދި ނިލަންދޫއެވެ. ތ. އަތޮޅުން ހިމެނެނީ ކަނޑޫދޫ، ވަންދޫ އަދި ގުރައިދޫއެވެ. ލ. އަތޮޅުގައި މީހުން ދިރިއުޅޭ 11 ރަށް އޮތްއިރު، ފަޤީރުން ނެތީ ހަމައެކަނި ދަނބިދޫގައެވެ. ދ. އަތޮޅުން ފަޤީރުން ނެތް 2 ރަށަކީ ހުޅުދެއްޔާއި ރިނބިދޫއެވެ.
އިސްލާމިކް މިނިސްޓްރީން އަންނަނީ ކޮންމެ އަހަރެއްގެވެސް ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވުމުގެ ފުރުޞަތު ހުޅުވާލާ އެއަށް ޝަކުވާ ހުށައެޅުމުގެ ފުރުޞަތުވެސް ހުޅުވާލަމުނެވެ. މި ލިސްޓަކީ ޒަކާތުގެ ގޮތުގައި ލިބޭ ފައިސާ އޭގެ ޙައްޤުވެރިންނަށް ފަސޭހައިން ފޯރުކޮށްދިނުމާ އެކިގޮތްގޮތުން އެހީތެރިކަން ފޯރުކޮށްދިނުމަށް އެކުލަވާލާ ލިސްޓެކެވެ.
މިއަހަރު ފަޤީރުންގެ ދަފްތަރުގައި ރަޖިސްޓރްީކޮށްފައިވާ މީހުންގެ އަދަދު މިދިޔަ އަހަރަށްވުރެ ވަނީ އިތުރުވެފައެވެ. މިއަހަރުގެ ލިސްޓުގައި ހިމެނެނީ 8984 މީހުންނެވެ. މިލިސްޓް އެންމެފަހުން އަޕްޑޭޓްކޮށްފައިވަނީ ރަމަޟާންމަސް ފެށުމުގެ ދުވަސްކޮޅެއް ކުރިންނެވެ.