ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާއާއި ގުޅިގެން ކުރިއަށްގެންދާ ތަހުގީގަށް ލިބޭ ހެއްކަށް ބަލައި، އިތުރު ބަޔަކަށް ދައުވާ ކުރުމުގެ ފުރުސަތު އޮންނާނެ ކަމަށް ޕްރޮސެކިއުޓާ ޖެނެރަލްގެ އޮފީހުން ވިދާޅުވެއްޖެއެވެ.
މިދިޔަ އަހަރުގެ މެއި 6ގައި ރައީސް ނަޝީދަށް ދިން ހަމަލާއާއި ގުޅިގެން މިހާތަނަށް ވަނީ 9 މީހެއްގެ މައްޗަށް ދައުވާކޮށްފައެވެ. ނަމަވެސް މި ހަމަލާއާއި ގުޅިގެން ފަންޑުކުރި މީހުން ނުހޯދޭތީ ބައެއް ފަރާތްތަކުން ގެންދަނީ އެކަމުގެ ކަންބޮޑުވުން ފާޅުކުރަމުންނެވެ.
ރައީސް ނަޝީދު އަވަހާރަކޮށްލުމަށް ދިން ހަމަލާގެ ތަހްގީގާއި ގުޅޭގޮތުން ޕްރޮސެކިއުޓަރ ޖެނެރަލްގެ އޮފީހުން ނެރުނު ބަޔާނެއްގައި ވަނީ ރައީސް ނަޝީދަށް އަމާޒުކޮށް، ދިން ނުރައްކާތެރި ޙަމަލާގެ ތަޙްޤީޤާއި ދައުވާ ކުރުމުގެ ކަންތައް ހިނގަމުން ދިޔައީ، އެކަމަށް ޤާނޫނުތަކުގައި ކަނޑައެޅިފައިވާ މުއްދަތުތަކުގެ ތެރޭގައި، ޤާނޫނުގައި ކަނޑައަޅާފައި އޮތް އުޞޫލުތަކުގެ ތެރެއިންކަމަށެވެ. އެގޮތުން ހެކި ހޯދުމާއި، ހެކި ވަޒަންކުރުމާއި، ކޯޓަށް ދައުވާ ހުށަހަޅަން ތައްޔާރުކުރުންފަދަ ހުރިހާ ކަމެއް ހިނގައިދިޔައީ، ފުލުހުންގެ ތަޙްޤީޤު ޓީމުތަކާއި، ޕްރޮސިކިއުޓަރުންގެ ޓީމާއެއްކޮށް މަސައްކަތް ކޮށްގެންކަމަށް ޕީޖީ އޮފީހުން ވިދާޅުވިއެވެ. އަދި މިމައްސަލައަށް ޚާއްޞަ ކޮށްފައިވާ ޕްރޮސިކިއުޓަރުންގެ ތެރެއިން 2 މީހަކު، ހުރިހާ ވަގުތެއްގައި ފުލުހުންނާ އެއްކޮށް މަސައްކަތް ކޮށްފައިވާކަމަށްވެސް ޕީޖީ އޮފީހުން ވިދާޅުވިއެވެ. އޭގެ ފަހުން، މައްސަލަ ދިރާސާ ކުރުމުގެ މަރުޙަލާގައި، މައްސަލައަށް ބޭނުންވާ ވަރަށް، ރާއްޖެއިންނާއި ރާއްޖެއިން ބޭރުން ލިބެން ހުރި ވަޞީލަތްތައް ފުރިހަމައަށް ބޭނުންކޮށްފައިވާނެކަމަށާއި، އެގޮތުން، އެމެރިކާއާއި، އިނގިރޭސިވިލާތާއި، އޮސްޓްރޭލިޔާއާއި، އެހެނިހެން ޤައުމުތަކުގެ ފަންނީ އެހީތެރިކަން މިމަސައްކަތަށް އަބަދުވެސް ލިބެމުން ގޮސްފައިވާކަން ޕީޖީ އޮފީހުން ފާހަގަކޮށްފައިވެއެވެ.
މިޙަމަލާ ދިނުމުގައި އިސްކޮށް ޙަރަކާތްތެރިވި މީހަކު، ތަޙްޤީޤާއި ޝަރީޢަތުގެ މަޖިލީހުގައި އިޢުތިރާފު ވެފައިވާކަމަށާއި، އޭނާގެ މައްޗަށް ހުކުމްކޮށް، އެޙުކުމް މިހާރު ގެންދަނީ ތަންފީޒުކުރަމުންކަމަށް ޕީޖީން ފާހަގަކޮށްފައިވެއެވެ. އެއީ ރައީސް ނަޝީދަށް ދިން ހަމަލާގައި ބޮން ގޮއްވާލި އަޙްމަދު އަދުހަމް ރަޝީދެވެ. އޭނާގެ އިޢުތިރާފާއި ހެކިތަކުން ފެންނަން ހުރި ކަންކަން ދިމާވާކަމަށާއި، އޭނާގެ އިޢުތިރާފަކީ އެއްވެސް މަޖުބޫރުކަމެއް ނެތި ވެފައިވާ އިޢުތިރާފެއްކަން، ފުލުހުންނާ ވަކިން، ޕްރޮސިކިއުޓަރ ޖެނެރަލް ކަށަވަރު ކުރެއްވިފައިވާކަމަށް ޕީޖީން ވިދާޅުވިއެވެ. އޭގެ ފަހުން، ޖިނާއީ އިޖުރާއަތުގެ ޤާނޫނުން ބާރު ލިބިގެން، ކޯޓުންވެސް އޮތީ އެކަން ކަށަވަރު ކުރައްވާފައިކަމަށާއި، އޭނާ، ޝަރީޢަތުގެ މަރްޙަލާގައި އިޢުތިރާފުނުވިނަމަވެސް، އޭނާގެ މައްޗަށް ހުށަހެޅި ދަޢުވާތަކަށް ބާރުދޭނެ ހެއްކާއި ޤަރީނާ ހުރީ ކޯޓަށް ހުށަހެޅިފައިކަމަށް ޕީޖީން ވިދާޅުވިއެވެ.
މިމައްސަލައިގައި ހިމެނޭކަމަށް، ހެކި ހުރެގެން ދަޢުވާކުރި އެހެން މީހުންގެ ބައިތަކުގައިވެސް، ޕީޖީން ހުށަހެޅި ދައުވާތަކަށް ބާރުލިބޭ ކާފީ ހެކި ހުށަހަޅާފައިވާނެކަމަށާއި، ހެކީގެ ތެރޭގައި، އިޢުތިރާފު ބަޔާނުގެ އިތުރުން، ޑީ.އެން.އޭ އެވިޑެންސާއި، މާއްދީ ހެއްކާއި، ސައިންޓިފިކް ހެކިތަކާއި، ޚަބީރުންގެ ބަހާއި، އެނޫންވެސް ހެކިތައް ކޯޓަށް ހުށަހަޅާފައިވާނެކަމަށް ޕީޖީ އޮފީހުން ވިދާޅުވިއެވެ. މިމައްސަލައިގެ ޝަރީޢަތުގެ އަޑުއެހުންތަކުގައި، އެހެކިތައް ހުށަހެޅުމުން، އެހެކިތަކުގެ ހަރުދަނާކަމާމެދު ގޮތެއް ނިންމުމަކީ، ކޯޓުތަކާ މަތިކުރެވިފައިވާ ޤާނޫނީ ޒިންމާއެއްކަމަށް ޕީޖީގެ ބަޔާނުގައިވެއެވެ.
މިމައްސަލަ ހިނގާދިޔައިރު، ތަޙްޤީޤާއި ދައުވާ ކުރުމުގެ ކަންކަން ބެއްލެވުމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ޢައްޔަން ކުރެއްވި ސްޕެޝަލް އެންވޯއީ ޢައްބާސް ފާއިޒު ގެންދެވީ، ތަޙްޤީޤާއި ދައުވާކުރުމުގެ ކަންކަން ހިނގަނީ ބައިނަލްއަޤްވާމީ ބެސްޓްޕްރެކްޓިސްއާ އެއްގޮތަށްކަން ކަށަވަރު ކުރެއްވުމަށް، އެކަންކަން ގާތުން ބައްލަވަމުންކަން ޕީޖީން ފާހަގަކޮށްފައިވެއެވެ.
ތަޙްޤީޤާއި ދައުވާކުރުމުގެ މަރްޙަލާތަކުގައި އެމަނިކުފާނުގެ ކަންބޮޑުވުމެއް މިވަގުތު ނެތްކަމަށް، އެމަނިކުފާނު ވިދާޅުވެފައިވާކަމަށާއި، ޓެރަރިޒަމްގެ ޤާނޫނަށް އެންމެ ފަހުން ގެނެވުނު ބަދަލުތައް ނިޔާކުރާގޮތުން، ޓެރަރިޒަމްގެ މައްސަލައެއްގައި، ހާދިސާ ހިނގިފަހުންވެސް ހެކި ލިބިއްޖެނަމަ، އެމައްސަލައެއްގައި ދަޢުވާ ކުރުމަކަށް ހުރަހެއް ނެތްކަމަށާއި، މިހާރު ވަކި މީހެއްގެ މައްޗަށް ދައުވާއެއް ކުރެވިފައި ނެތުމަކީ، އޭނާގެ މައްޗަށް ފަހުން ލިބޭ ހެއްކެއްގެ މައްޗަށް ދައުވާ ނުކުރޭނެކަމުގެ ޙުއްޖަތެއް ނޫންކަމަށްވެސް ޕީޖީގެ ބަޔާނުގައިވެއެވެ.
އެހެންކަމުން، މިމައްސަލައާ ގުޅިގެން ހައްޔަރު ކުރެވުނު، ނުވަތަ ހައްޔަރު ނުކުރި ނަމަވެސް، އެމައްސަލައިގައި މިހާރު ކުރިއަށްދާ ތަޙްޤީޤުތަކުން ހެކި ލިބޭ ބައެއްގެ މައްޗަށް ލިބޭ ހެކިތަކެއްގެ މައްޗަށް ބަލައި، ދައުވާ ކުރުމާމެދު އެއޮފީހުން ގޮތެއް ނިންމާނެކަމަށް ޕީޖީން ވިދާޅުވިއެވެ.