މަކަރާއި ޙީލަތުން އެތައް ބައެއްގެ އަތުން ފައިސާ ހޯދާފައިވާ ސީލައިފް ގްލޯބަލް ޕްރައިވެޓް ލިމިޓެޑުގެ ވެރިޔާ އަޙްމަދު މޫސާ (އައްމަޓީ)، ބަންދުން ދޫކޮށްލި މައްސަލައިގެ ހުކުމް އިއްވުން އާދީއްތަދުވަހަށް ހައި ކޯޓުގައި ތާވަލުކޮށްފިއެވެ.
ގިނަ ބައެއްގެ އަތުން ފައިސާ ނެގުމަށްފަހު ހިޔާނާތްތެރިވި މައްސަލާގައި ދައުވާ އުފުލާފައި ވަނިކޮށް މާޗުމަހު ކްރިމިނަލް ކޯޓުން ވަނީ އައްމަޓީ ބަންދުން ދޫކޮށްލާފައެވެ. އެމައްސަލަ ދައުލަތުން ހައިކޯޓުގައި އިސްތިއުނާފްކުރުމުން، މުއްދަތު ހަމަވިފަހުން އިސްތިއުނާފްކުރިކަމަށް ބުނެ ހައިކޯޓުން ވަނީ މައްސަލަ ބޭރުކޮށްލާފައެވެ.
ނަމަވެސް ހައިކޯޓުގެ ނިންމުން ދައުލަތުން ސުޕްރީމް ކޯޓުގައި އިސްތިއުނާފްކުރުމުން، ސުޕްރީމް ކޯޓުން ނިންމީ އިސްތިއުނާފް މުއްދަތު ހައިކޯޓުން ގުނީ ގޯސްކޮށްކަމަށެވެ. އަދި އައްމަޓީ ބަންދުން ދޫކޮށްލި މައްސަލަ ބެލުމަށް ސުޕްރީމް ކޯޓުން ވަނީ ހައިކޯޓަށް ވަނީ އަމުރުކޮށްފައެވެ.
ސުޕްރީމްކޯޓުގެ އަމުރާއި ގުޅިގެން ހައިކޯޓުގައި މިއަދު ބޭއްވި މިމައްސަލައިގެ އަޑު އެހުމުގައި ވަނީ މައްސަލައިގެ އަޑުއެހުންތައް ނިންމާލާފައެވެ. އަދި އަންނަ އާދީއްތަ ދުވަހު މައްސަލައިގެ ހުކުމް އިއްވުން އޮންނާނެކަމަށް ހައިކޯޓުގެ ބެންޗުން ވަނީ އިއުލާންކޮށްފައެވެ.
މި މައްސަލަ ބައްލަވާ ހައި ކޯޓުގެ ބެންޗުގައި ހިމެނިވަޑައިގެންނަވަނީ ފަނޑިޔާރު ފަނޑިޔާރު ޝުއައިބް ހުސައިން ޒަކަރިއްޔާއާއި ފަނޑިޔާރު އަބްދުލް ރައޫފް އިބްރާހީމާއި ފަނޑިޔާރު ފާތިމަތު ފަރުހީޒާއެވެ.
އައްމަޓީ ދޫކޮށްލުމަށް މީގެކުރިން ދެފަހަރަށް ކްރިމިނަލް ކޯޓުން އަމުރުކުރުމުންވެސް ހައި ކޯޓުން ވަނީ އެ ނިންމުން ބާތިލްކޮށްފައެވެ.
ސީލައިފް ގްލޯބަލް އިންކް ޕްރައިވެޓް ލިމިޓެޑުގެ ވެރިޔާ އަޙްމަދު މޫސާ ހައްޔަރުކޮށްގެން މާލެ ގެނެސް މައްސަލަ ތަހުޤީގުކުރުމަށްފަހު އޭނާގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ވަނީ ޚިޔާނާތުގެ 42 ދައުވާއެއް އުފުލާފައެވެ. މިއީ އޭނާ ޚިޔާނާތްތެރިވި ކޮންމެ މީހެއްގެ ދައުވާ ވަކިވަކިންނެވެ. އަޙްމަދު މޫސާގެ މައްޗަށް އުފުލާފައިވާ ދައުވާ ސާބިތުވެއްޖެނަމަ އޭނާގެ މައްޗަށް 65 އަހަރުގެ ޖަލު ހުކުމެއް އަންނާނެވެ.