"ޕޭ ހާމަނައިޒޭޝަން"ގެ މަސައްކަތް ނިމުމުން ހުރިހާ ދާއިރާއަކަށް މުސާރައިގެ ކުރިއެރުން ލިބޭނެ: ފިނޭންސް

ސަރުކާރުން ފަށާފައިވާ "ޕޭ ހާމަނައިޒޭޝަން"ގެ މަސައްކަތް ނިމޭއިރު ލެކްޗަރާއިންވެސް ހިމެނޭހެން ހުރިހާ ދާއިރާއެއްގެ މުވައްޒަފުންގެ މުސާރައަށްވެސް ކުރިއެރުންތަކެއް އަންނާނެކަމަށް ފިނޭންސް މިނިސްޓްރީން ވިދާޅުވެއްޖެއެވެ. ފިނޭންސް މިނިސްޓްރީން މިހެން ވިދާޅުވީ، ޓީޗަރުންގެ މުސާރަ ބޮޑުވިނަމަވެސް، ލެކްޗަރާއިންގެ މުސާރަ ބޮޑުނުވާތީ، އެކަމުގެ ކަންބޮޑުވުން ލެކްޗަރާއިން ފާޅުކުރަމުން ގެންދާތީ ނެރުއްވި ބަޔާނުގައެވެ.

ފިނޭންސް މިނިސްޓްރީގެ ބަޔާނެއްގައި ވަނީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވިސްނުންފުޅަކީ ސަރުކާރުގެ މުއައްސަސާތަކުގެ އިތުރުން މުޅި ދަޢުލަތުގެ ޕޭ ހާމަނައިޒްކުރުންކަމަށެވެ. އެމަސައްކަތްފެށިގެން ކުރިއަށްދާކަން ފާހަގަކުރައްވާ ފިނޭންސް މިނިސްޓްރީން ވިދާޅުވީ، އެމަސައްކަތުގެ ދަށުން ފުރަތަމަ ޓީޗަރުންގެ މުސާރަ ބޮޑުކުރެވުނަސް ދައުލަތުގެ ހުރިހާ ދާއިރާތަކެއްގެ މުސާރަތަކުގެ މަސައްކަތްވެސް ކުރިޔަށްދާނެކަމަށެވެ.

ފިނޭންސް މިނިސްޓްރީން ވިދާޅުވީ، އެއް ހަމަ ޕޭ ފްރޭމްވަރކެއް ހެދުމަކީ ސަރުކާރުގެ ސްޓްރެޓަޖިކް އެކްޝަން ޕްލޭންގައި ހިމެނޭ މުހިންމު އެއް މަސައްކަތްކަމަށެވެ. ދައުލަތުގެ ޕޭ ފްރޭމްވަރކަށް ޢަމަލުކުރަން ފެށުމާ ގުޅިގެން މިހާތަނަށް މުސާރައާއި ޢިނާޔަތް ދެމުންދިޔަގޮތަށް ބަދަލުތަކެއް ގެނެވޭނެކަމަށާ، ފުރަތަމަކަމަކަށް މުވައްޒަފުންގެ މުސާރައާއި ޢިނާޔަތްތަކަށް ރަނގަޅު ހެޔޮ ބަދަލުތަކެއް އަންނާނެކަމަށް ފިނޭންސް މިނިސްޓްރީން ވިދާޅުވިއެވެ. އަދި ކުރީގައި އެއް މަޤާމެއްގައި އެއް މަސައްކަތެއްކުރާ ފަރާތްތަކަށް ލިބޭ އަސާސީ މުސާރައިގެ ފަރަގު ނައްތައިލެވޭނެކަމަށާއި، އެގޮތުން މިމަސައްކަތަކީ ދިރާސާތައް ކުރެވިގެން އަދި ބަޖެޓުކުރެވިގެން ވަކި ޕްރޮސެސްއެއްގެ ތެރެއިން ކުރިޔަށް ގެންދާ މަސައްކަތެއްކަމަށްވެސް ފިނޭންސް މިނިސްޓްރީން ވިދާޅުވިއެވެ.

ޓީޗަރުންގެ މުސާރަބޮޑުކުރުމާ ހަމައިން މި މަސައްކަތް ނުނިމޭނެކަމަށާއި، އެގޮތުން ކަނޑައެޅިފައިވާ ޕްރޮސެސްގެ ތެރެއިން މި މަސައްކަތް ކުރިޔަށް ގެންގޮސް ދައުލަތުގެ ހުރިހާ އިދާރާއެއްގެ ޕޭ ހާމަނައިޒް ކުރެވިގެންދާނެކަމުގެ ޔަޤީންކަން ފިނޭންސް މިނިސްޓްރީން ވަނީ ދެއްވާފައެވެ. މިނިސްޓަރ އޮފް ފިނޭންސް އިބްރާހީމް އަމީރުވެސް ވަނީ ލެކްޗަރާ އިން އައު ފްރޭމް ވޯކަށް ބަދަލުކުރުމުގެ މަސައްކަތް ކުރަމުގެންދާކަމަށާއި އެމަސައްކަތް ވަރަށް އަވަހަށް ނިމުމަކާ ހަމައަށް އަންނާނެކަމަށް ވިދާޅުވެފައިކަން ފިނޭންސް މިނިސްޓްރީގެ ބަޔާނުގައި ވެއެވެ. ހަމަ އެހެންމެ ޓީޗަރުންގެ މުސާރަ ބޮޑުކުރައްވައި އެކަން އިޢުލާންކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި އެމަނިކުފާނު ވެސް ވަނީ ތަޢުލީމީ ދާއިރާގެ އިތުރުން ޞިއްޙީ ދާއިރާއާ އެނޫންވެސް ދާއިރާތަކަށް އެބަދަލު އަންނާނެކަން ހާމަކުރައްވާފައިކަން ފިނޭންސްގެ ބަޔާނުގައި ފާހަގަކުރައްވާފައިވެއެވެ. އެގޮތުން އެމަނިކުފާނު ވަނީ ޞިއްޙީ ދާއިރާގެ މުސާރައިގެ އޮނިގަނޑަށް ގެންނަންޖެހޭ ބަދަލުތައް ސަރުކާރުން ދިރާސާ ކުރައްވަމުންގެންދަވާކަން އެ ބަޔާނުގައި ވަނީ ބަޔާންކުރައްވާފައެވެ.

ފިނޭންސް މިނިސްޓްރީން މިހެން ވިދާޅުވެފައި މިވަނީ، މިމަހުގެ ފުރަތަމަ ދުވަހުން ފެށިގެން ތަޢުލީމީ ދާއިރާގައި މަސައްކަތްކުރައްވާ ހުރިހާ މުވައްޒަފުންގެ މުސާރަ ބޮޑުކުރިނަމަވެސް، ލެކްޗަރާއިންގެ މުސާރައަށް ކުރިއެރުމެއް ނާންނާތީ އެކަމުގެ ކަންބޮޑުވުން ފާޅުކުރަމުން ގެންދާތީއެވެ. އެގޮތުން ލެކްޗަރާއިން ވަނީ މިއަދު އެކަމުގެ ކަންބޮޑުވުން ފާޅުކޮށް ހިމޭން އިހްތިޖާޖެއް ކުރިއަށް ގެންގޮސްފައެވެ.

ސަރުކާރުން މިމަހުން ފެށިގެން ގެނައި ބަދަލާއެކު ޓީޗަރުންގެ މުސާރަ އެވްރެޖުކޮށް 20،000އަށް ވުރެ މަތިވެގެންދާނެކަމަށް ފިނޭންސް މިނިސްޓްރީން ހާމަކުރައްވާފައިވެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިމަހުގެ 1ގައި ޤައުމާ މުޚާޠަބުކުރައްވާ ވިދާޅުވީ، މުވައްޒަފުންކުރާ މަސައްކަތާ އެކަށޭނަ މިންވަރަށް އުޖޫރަ ކަނޑައެޅުމަށް، އަދި އުޖޫރައިގެ ތަފާތުތައް ނައްތައިލުމަށް ފަށާފައިވާ މަސައްކަތް ނިމޭއިރު، ހުރިހާ ދާއިރާއެއްގެ މުސާރަތަކަށްވެސް، ހެޔޮ ބަދަލުތަކެއް އަންނާނެކަމަށެވެ.