ފުވައްމުލަކު ނެރާދިމާއިން ބޭރަށް ޑައިވިންއަށް ގޮސް އުޅެނިކޮށް ގެއްލުނު މީހާ އަދިވެސް ނުފެންނަކަމަށާ، ހާލު ދެރަވި މަހްމޫދު ފާއިޒް އިތުރު ފަރުވާއަށް ދ.އަތޮޅު ކަނޑިންމަ ރިސޯޓަށް ގެންގޮސްފައިވާކަމަށް އެމްއެންޑީއެފުން ވިދާޅުވެއްޖެއެވެ.
އެމްއެންޑީއެފުން ވިދާޅުވީ، އިއްޔެ ޏ.ފުވައްމުލަކު ނެރުކައިރިއަށް ޑައިވިނަށް ފޭބި މީހުންގެ ތެރެއިން އެކަކު ޑީކޯވެގެން އިތުރު ފަރުވާއަށް, ކަނޑިންމަ ރިސޯޓަށް ގެންދިއުމަށްޓަކައި އެމްއެންޑީއެފް ހެލިކޮޕްޓަރުގައި ރޭ 22:27 ހާއިރު ދ.ކުޑަހުވަދޫއަށް ގެންގޮސްދީފައިވާކަމަށެވެ. ޑައިވް އަށް ދިޔަ ފަހުން ވީނުވީއެއް ނޭނގި ގެއްލިފައިވާ މުހައްމަދު ސައީދު އަދިވެސް ނުފެންނަކަމަށާއި، އޭނާ ހޯދުމުގެ މަސައްކަތް ހުއްޓުމެއްނެތި ކުރިއަށް ދާކަމަށް އެމްއެންޑީއެފުން ވަނީ ވިދާޅުވެފައެވެ. އެގޮތުން އެސަރަޙައްދުގެ ކަނޑުގެ 55 އަކަ ނޯޓިކަލް މޭލު މިހާތަނަށް ވައިގެ މަގުންނާއި ކަނޑުގެ މަގުން ބަލާފައިވާކަމަށް އެމްއެންޑީއެފުން ވިދާޅުވެއެވެ.
އެމްއެންޑީއެފްއިން ވިދާޅުވީ ގެއްލުނު މުޙައްމަދު ސަޢީދު ހޯދުމަށް ކޯސްޓްގާޑުގެ ޑައިވަރުން ކަނޑު އަޑިން ހޯދަމުންދާއިރު، ސީޖީ ހާބަރ ޕެޓްރޯލް އުޅަނދުން އަންނަނީ ކަނޑުގެ ސަރަޙައްދު ބަލަމުންދާކަމަށެވެ. އަދި އޮޕަރޭޝަން އިތުރަށްފުޅާކޮށް، އެމްއެންޑީއެފް ޑޯނިއާއާއި ހެލިކޮޕްޓަރު މިހާރު ދަނީ އެ ސަރަޙައްދުގައި ހަރަކާތްތެރިވަމުންކަމަށްވެސް އެމްއެންޑީއެފްއިން ވިދާޅުވެއެވެ.
ގެއްލިގެން ހޯދަމުންދާ މީހާއާއި ބެހޭ އެއްވެސް ޚަބަރެއް ލިބިއްޖެނަމަ ލަސްނުކޮށް އެންގުމަށާއި އެ ސަރަހައްދުން ދަތުރުކުރާ އުޅަނދުފަހަރުތަކުންވެސް ބަލައިދިނުމަށް އެމްއެންޑީއެފްއިންވަނީ އެދިވަޑައިގެންފައެވެ.
ފުއައްމުލަކު ނެރުމައްޗަކީ ޑައިވްކުރަން ވަރަށް މަޤްބޫލް ސަރަހައްދެކެވެ. ޑައިވް ސްޕޮޓެއްގެ ގޮތުގައި އެތަން މައްޝޫރު ވަނީ ގިނަ އަދަދަކަށް ޓައިގަރ ޝާކް ނުވަތަ ފެމުނު މިއަރު ފެންނަ ސަރަހައްދަކަށް އެތަން ވާތީއެވެ. ޓައިގަރ ޝާކް ބެލުމަށް އެތަނަށް މީހުން ޑައިވިންއަށް ބާލަނީ މިޔަރުތަކަށް ރަނގަޅަށް ކާންދިނުމަށްފަހުއެވެ. ބޮޑެތި މިޔަރުތަކާއެކު ފޮޓޯނަގާ ގިނަބަޔަކު އަންނަނީ ސޯޝަލް މީޑިއާގައި ފޮޓޯތައް ޙިއްސާކުރަމުންނެވެ.
މިދުވަސްވަރަކީ ކަނޑު ގަދަ ދުވަސްވަރަކަށްވުމާއެކު ކަނޑު ދަތުރު ފަތުރުކުރާ ފަރާތްތަކުން މޫސުމަށް ސަމާލުވުމަށާއި، ޗުއްޓީގައި ރަށްރަށަށް ގޮސް މޫދަށް އެރިއުޅޭއިރު ސަމާލުވުމަށް އެމްއެންޑީއެފްއިން ވަނީ އިލްތިމާސްކޮށްފައެވެ.