ލ.އަތޮޅު ފަޅުރަށެއް ކަމަށްވާ މެންދޫގައި އެއަރޕޯޓެއް އެޅުމަށް ދިރާސާ ކޮށްދޭނެ ބަޔަކު ހޯދުމަށް ލ.ހިތަދޫ ކައުންސިލުން އިޢުލާނުކޮށްފިއެވެ.
ހިތަދޫ ކައުންސިލްގެ ރައީސް އިބްރާޙިމް ޝަމްޢޫން ޕީއެސްއެމް ނިއުސްއަށް ވިދާޅުވީ މިއީ އެސަރަޙައްދުގައި އެއަރޕޯޓެއް ތަރައްޤީ ކުރެވިދާނެތޯ ބެލުމަށާއި އަދި އެކަމަށް ހިނގާނެ ޚަރަދުތައް ދެނެގަތުމަށް ކުރިއަށްގެންދިއުމަށް ނިންމާފައިވާ ސަރވޭއެއްކަމަށެވެ.
މިހުށައެޅުމަކީ ހިތަދޫގެ އިތުރުން ރަށާއި އެއްފަޅެއްގައި އޮންނަ ކުނަހަންދޫއާއި އަދި މާމެންދުއާއި މާވަށުގެ ރައްޔިތުންގެވެސް ވަރަށް ބޮޑު އުއްމީދެއްކަމަށް ޝަމްޢޫން ވިދާޅުވިއެވެ. މި 4 ރަށުގެ އާބާދީ 5000އިން މައްޗަށް އަރައެވެ.
ހިތަދޫ ކައުންސިލުން އިޢުލާން ކޮށްފައިވަނީ ލ.މެންދޫގައި ޑޮމެސްޓިކް އެއަރޕޯޓެއް ތަރައްޤީކުރުމަށް ބޭނުންވާ ސްވޮޓް އެނަލަސިސް ހަދައިދޭނެ ފަރާތެއް ހޯދުމަށެވެ. މި ދިރާސާގައި ހިމެނޭނީ ތިމާވެއްޓަށް ގެއްލުންވާ މިންވަރު ބަލާ ރިޕޯޓާއި، މަސައްކަތަށް ހިނގާނެ ޚަރަދާއި، ޕްރޮޖެކްޓްގެ އިންޖިނިއަރިން މަސައްކަތުގެ ރިޕޯޓަކާއި ރިސްކް އެސެސްމަންޓް ރިޕޯޓެއް ތައްޔާރު ކުރުމުގެ މަސައްކަތެވެ.
މި މަސައްކަތް ކުރުމަށް ބޭނުންވާ ފަރާތްތަކުން އަންނަ މޭ މަހުގެ 10ވަނަ ދުވަހު، 11:00ގެ ކުރިން އަންދާސީ ހިސާބު ހުށައަޅަން ޖެހެއެވެ.
މި ސްވޮޓް ސަރވޭގެ ޚަރަދުތައް ކުރަނީ ރަށު ކައުންސިލްގެ ބަޖެޓުންނެވެ. ޝަމްޢޫން ވިދާޅުވީ މިކަން ހަގީގަތަކަށް ހެދުމަށް ކައުންސިލުން މަސައްކަތް ކުރާނެކަމަށެވެ. ނަމަވެސް މިހާތަނަށް ރަސްމީ ސިފައެއްގައި ސަރުކާރާއެކު މިކަމުގެ މަޝްވަރާ ކޮށްފައި ނުވާކަމަށް ވިދާޅުވިއެވެ. ސަރވޭތަކުން އެއަރޕޯޓް އެޅޭނެކަމަށް ފެނިއްޖެނަމަ، ސަރުކާރުގެ ކަމާގުޅޭ އިދާރާތަކަށް ހުށައަޅާ އެހީތެރިކަން ހޯދުމަށް މަސައްކަތް ކުރާނެކަމަށް އޭނާ ވިދާޅުވިއެވެ.
ޝަމްޢޫން ވިދާޅުވީ ރިސޯޓްތަކާއެކު އެ ސަރަޙައްދަކީ ފަތުރުވެރިކަމުގެ ވިޔަފާރިވެސް ފުޅާވަމުން އަންނަ ސަރަޙައްދެއްކަމަށެވެ. އަދި މި ރަށްތަކަކީ މިހާރު ލ.އަތޮޅުގައި އޮންނަ ކައްދޫ އެއަރޕޯޓާއި ދުރު ސަރަޙައްދަކަށްވުމުން، ދަތުރުފަތުރުކުރުމުގެ ދަތިކަން ދިމާވާކަމަށެވެ. ނަމަވެސް މެންދޫގައި އެއަރޕޯޓެއް ތަރައްޤީކުރެވިއްޖެނަމަ، މިއިން ކޮންމެ ރަށަކުން 5މިނެޓުން އެއަރޕޯޓަށް ދެވެނޭކަމަށެވެ.
ސަރުކާރުން ވަނީ ލ.ހިތަދުއާއި ލ.ކުނަހަންދޫ ކޯޒްވޭއަކުން ގުޅާލުމަށް ނިންމާ ބަޖެޓުގައި ހިމަނާފައެވެ. ހިތަދޫ ކައުންސިލުން ވިދާޅުވީ މި ޕްރޮޖެކްޓާއެކު އެ ސަރަޙައްދުގައި އެއަރޕޯޓް ތަރައްޤީކުރެވިއްޖެނަމަ ބޮޑު ކުރިއެރުމެއް ލިބޭނެކަމަށެވެ.