އިސްލާމްދީނުގައި ކުޑަކުދިންނަށް ދެއްވާފައިވާ މަޤާމް އެންމެ ރަނގަޅަށް ފެނިގެންދާނެ އެއް ތަނަކީ މިސްކިތްތަކެވެ. މިސްކިތްތަކުގައި އެކުދިންނަށް މިނިވަންކަންމަތީ ތިބެވޭނެކަން މިދީން ދައްކުވައިދީފައި އޮތްއޮތުމުން ހާމަވަނީ ކުޑަކުދިންނަށް އަމާން ރައްކާތެރި މާޙައުލެއް ދިނުމަށް އިސްލާމްދީނުގައި ބާރުއަޅާވާ މިންވަރެވެ. ދީނުގެ އެންމެ މަތިވެރި ޝިޢާރުކަމަށްވާ ނަމާދުގެ މަތިވެރިކަން އަދާކުރެވޭ ތަނަކަށް އެކަމުގެ އެންމެ ރަނގަޅު ޢިލްމު ވިސްނޭވަރަށްވުރެ ތުއްތު ކުދިން ގެންދިޔުމަށް ދީން ބާރުއަޅުއްވާނީ އެކަމުގައި މަތިވެރި ޙިކުމަތެއް އޮތުމުންނެވެ.
ދީނުގައި މިކަމަށް ބާރުއަޅާފައިވާތީ ދުނިޔޭގެ ބައެއް ޤައުމުތަކުގައި މިސްކިތްތަކަށް ކުޑަކުދިން ގެންދިޔުމާއި އެކުދިން މިސްކިތްތަކުގައި ކުޅެ ހެދުމަކީ ޢާއްމުކަމެކެވެ. މިކަން އެންމެ ރަނގަޅަށް ފެންނާނެ ދެމިސްކިތަކީ މުސްލިމުންގެ ދެޙަރަމްކަމުގައިވާ މަސްޖިދުލް ޙަރަމްއާއި މަސްޖިދުއްނަބަވީއެވެ. ހުރިހާ ގަޑިތަކެއްގައި މިދެޙަރަމުން ކުދިން ފެނެއެވެ. ކުޅޭ މަންޒަރާއި ކާންދޭ މަންޒަރާއި ކުދިން ނިންދަވާފައިތިބޭ މަންޒަރަކީ މިދެޙަރަމަށްދާ މީހުންނަށް އައުކަމެއް ނޫނެވެ.
މިއަހަރުގެ ރަމަޟާންމަހާ ދިމާކޮށް މިސްކިތްތަކަށް ކުދިންގޮސް ކުޅެ ހަދާ ވީޑިއޯއެއް ވަނީ ސޯޝަލް މީޑިއާގައި ވައިގައި ހިފާފައެވެ. ވީޑިއޯގައި ފެންނަނީ ތުރުކީގެ ވެރިރަށް އަންކަރާގެ މިސްކިތެއްގައި ތަރާވީޙް ނަމާދަށްފަހު މިސްކިތުގެ އިމާމް ނަމާދަށް ދިޔަ ކުދިންނާއެކު ފިލާކުޅޭ މަންޒަރެވެ. މީގެކުރިންވެސް ތުރުކީގެ މިސްކިތެއްވަނީ ސޯޝަލް މީޑިއާގައި ވިދާލާފައެވެ. އެފަހަރު މިސްކިތުގެ ފޮޓޯތައް ވައިގައި ހިފީ ކުޑަކުދިންނަށް ޚާއްސަ ކުޅޭ ސަރަޙައްދެއް ނުވަތަ ޕްލޭ ކޯރނާއެއް މިސްކިތުގެ އެތެރޭގައި ހުރުމުންނެވެ. މިއީ ތުރުކީގެ މިސްކިތްތަކުގައި ޢާއްމުވަމުން އަންނަ ހިތްގައިމު މަންޒަރެއްކަމަށް ސޯޝަލް މީޑިއާ ޕޯސްޓްގައިވެއެވެ. އެގޮތުން އަލަށް ބިނާ ކުރަމުން އަންނަ ތުރުކީގެ މިސްކިތްތަކުގެ އެތެރޭގައާއި ބޭރުގައިވެސް ކުދިން ކުޅޭނެ ޖާގައާއެކު އަންނަނީ ޑިޒައިން ކުރަމުންނެވެ. ތުރުކީ ރައްޔިތުން ޤަބޫލުކުރާ އެޤައުމުގެ ބާނީ ކަމުގައިވާ ސުލްޠާން މުޙައްމަދު އަލް ފާތިޙް ވިދާޅުވިކަމަށް ބުނެވޭ ވާހަކައެއްއޮވެއެވެ. އެއީ މިސްކިތްތަކުގައި ކުޑަކުދިންގެ އަޑު ނީވޭނަމަ އެއީ އެކަމާ ކަންބޮޑުވާންޖެހޭ ކަމެއް ކަމަށް ސުލްޠާން ވިދާޅުވި ވިދާޅުވުމެވެ. އެކަން މިއަދުވެސް އެޤައުމުގެ ރައްޔިތުން އަންނަނީ ޤަބޫލުކޮށް މިސްކިތްތަކަށް ތުއްތު ކުދިންގެ ހިތް ޖެއްސުމަށް މަސައްކަތް ކުރަމުންނެވެ.
ކުޑަކުދިން މިސްކިތްތަކަށް ގެންދިޔުމަށް ރަސޫލުﷲގެފާނު ޚާއްސަ އިސްކަމެއް ދެއްވިއެވެ. މިކަން ދަލީލުކޮށްދޭ އެތައް ކަމެއް ޙަދީޘްތަކުން އެނގެން އެބަހުއްޓެވެ. އެގޮތުން އެކަލޭގެފާނުގެ ކާފަދަރިކަލުން ކަމުގައިވާ ޙަސަންގެފާނާއި ޙުސެއިންގެފާނު ރަސޫލުﷲގެފާނުގެ މިސްކިތްކޮޅަށް ގެންދަވައެވެ. މިފަދައިން ރޭގަނޑުގެ ނަމާދަކަށް މިސްކިތައް ޙަސަންގެފާނު ގެންދެވި ފަހަރެއްގައި ރަސޫލުﷲގެފާނު ނަމާދު އިމާވްވެ ކުރައްވަމުންގެންދަވަނިކޮށް ސަޖިދައިގައި ވަރަށް ގިނަ އިރުވެވަޑައިގަތެވެ. އެހެންކަމުން ބޮޑުކަމެއް ވެއްޖެކަމަށް ވިސްނިވަޑައިގެން ބައެއް ބޭކަލުން ކަންބޮޑުވެވަޑައިގަތެވެ. ނަމާދު ނިންމަވާލެއްވުމަށްފަހު ސަޖިދައިގައި ގިނަ އިރުވުމާއި ގުޅިގެން ޞަޙާބީބޭކަލުން ސުވާލުކުރެއްވުމުން އެއީ މާބޮޑުކަމެއް ވީ ނޫންކަމަށާއި ޙަސަންގެފާނު އެކަލޭގެފާނުގެ ބުރަކަށިފުޅަށް އަރާވަޑައިގަތުމުން ތުއްޕުޅުބޭފުޅާ ކުޅެލައްވަން ވަގުތުކޮޅެއް ދެއްވީކަމަށް ވިދާޅުވިއެވެ. މިއިންވެސް އެނގިގެންދަނީ މިސްކިތްތަކަށް ކުދިން އައިސް އެކުދިން އުޅޭއުޅުމަކީ އެކަންކަން އިސްލާމްދީން މަނާކުރާ ކަންކަން ނޫންކަމެވެ.
ސޯޝަލް މީޑިއާގައި ވައިރައިލްވި މިޕޯސްޓާއެކު ދިވެހިންގެ ތެރޭގައިވެސް ދީނީ ޝުޢޫރާއި ލޯބި އުތުރިއަރައިގަތެވެ. ފެނިގެންދިޔަ ހިތްގައިމު މަންޒަރު ރާއްޖޭގެ މިސްކިތްތަކުން ދުށުމުގެ އުއްމީދު އެތައްބަޔަކު ހާމަކުރިއެވެ. އަދި ރާއްޖޭގެ ބައެއް މިސްކިތްތަކުގައި ކުދިން އަނގައިން ބުނާއަޑު އިވުނުނަމަވެސް އެކަން ބޮޑު ކަންތައްގަނޑަކަށް ހެދުމުގެ ކަންބޮޑުވުންވެސް ފެނިގެންދިޔައެވެ. މިކަމާއި ގުޅިގެން އަރަމުން އަންނަ ބައެއް ޒުވާން އިމާމުންގެ ޚިޔާލުވެސް ފެނިގެންދިޔައެވެ. އެގޮތުން މިކަމަށް ބާރުއަޅުއްވާނެކަމަށާއި ތުއްތު ކުދިންގެ ހިތްތަކުގައި މިސްކިތައް ދިޔުމުގެ ޝައުގުވެރިކަން އިތުރުކުރުމަށް އަދި އެކުދިން ލޯބިކުރާ ތަނަކަށް މިސްކިތްތައް ހެދުމަށާއި ބިންމަތީގައިވާ އެންމެ އަމާންތަނަކީ މިސްކިތްތައްކަމުގެ އިޙްސާސް ކުދިންނަށް ކޮށްދެއްވުމަށް މަސައްކަތްކުރައްވާނެކަމަށް ޒުވާން އިމާމުން ހާމަކުރުމުން މިފަދަ ހިތްގައިމު މަންޒަރުތައް ރާއްޖެއިންވެސް ފެނިގެންދިޔުމުގެ އުއްމީދު އާލާވެގެންދިޔައެވެ. މިއީ އިސްލާމްދީން ކަށަވަރުކޮށްދޭ އަމާން މުޖުތަމަޢުގެ މިސާލެވެ. ކުދިންގެ ޙައްގުތައް އެންމެބޮޑަށް ރައްކާތެރިކޮށްދޭ ދީނުން ލިބިގަންނަންވީ ފިލާވަޅެކެވެ.