މި އަހަރުގެ ފުރަތަމަ ތިން މަސްދުވަހުގެތެރޭގައި ވެލާނާ އިންޓަނޭޝަނަލް އެއާޕޯޓުން ހިދުމަތް ހޯދި ޕަސިންޖަރުންގެ އަދަދު 1.3 މިލިއަން އަރައިފިއެވެ.
މިއީ މިދިޔަ އަހަރުގެ މި މުއްދަތުގައި އެ އެއަރޕޯޓުން ޙިދުމަތް ހޯދި 774 ހާސް ފަތުރުވެރިންނާއި އަޅާ ބަލާއިރު 76 އިންސައްތަ އިތުރު އަދަދެކެވެ.
ވެލާނާ އިންޓަރނޭޝަނަލް އެއަރޕޯޓު، ވީއައިއޭ ބަލަހައްޓާ މޯލްޑްވިސް އެއާޕޯޓްސް ކޮމްޕެނީ (އެމްއޭސީއެލް) އިން އާއްމުކޮށްފައިވާ ތަފާސް ހިސާބުތައް ދައްކާގޮތުން، މިއަހަރުގެ ފުރަތަމަ ކުއާޓަރުގެ ތެރޭގައި އިންޓަރނޭޝަނަލް ޓަރމިނަލުން 1.1 މިލިއަން ފަސިންޖަރުންނަށް ވަނީ ޙިދުމަތްދީފައެވެ. އަދި ޑޮމެސްޓިކް ޓަރމިނަލުންވަނީ 284 ހާސް ފަސިންޖަރުންނަށް ޙިދުމަތްދީފައެވެ.
އެއަރ ޓްރެފިކް މޫވްމެންޓުތައް ނުވަތަ އެއަރޕޯޓަށް ޖައްސާ ފްލައިޓުތަކުގެ އަދަދާއި އެއަރޕޯޓުން ފުރާފައިވާ ފްލައިޓުތަކުގެ އަދަދުވެސް މިއަހަރުގެ ފުރަތަމަ ކުއާޓަރުގެތެރޭގައި ވަނީ އިތުރުވެފައެެވެ. އެގޮތުން އެ ކުއާޓަރުގެތެރޭގައި 15860 އެއަރ ޓްރެފިކް މޫވްމަންޓު ވަނީ ރެކޯޑުކުރެވިފައެވެ.
މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 43 އިންސައްތަ އިތުރު އަދަދެކެވެ. އަަހަރުގެ ފުރަތަމަ ކުއާޓަރުގެތެރޭގައި 15 ހާހަށްވުރެ ގިނަ އެއަރ ޓްރެފިކް މޫވްމަންޓު ރެކޯޑުކުރެވިފައިވާއިރު، މީގެތެރޭގައި ހިމެނެނީ 8246 ބައިނަލްއަޤްވާމީ އެއަރ ޓްރެފިކް މޫވްމަންޓާއި، 7614 ރާއްޖޭގެ އެތެރޭގެ އެއަރ ޓްރެފިކް މޫވްމަންޓެވެ.
ވެލާނާ އެއަރޕޯޓަކީ ރާއްޖޭއަށް އެންމެ ގިނަ ފަތުރުވެރިން އެތެރެވާ މައި ދޮރާއްޓެވެ. އެގޮތުން ވެލާނާ އެއަރޕޯޓަށް މިހާރުވެސް 25އަށްވުރެ ގިނަ އެއަރލައިނުން ދަތުރުތައް ބާއްވައެވެ.