ދުނިޔޭގެ ވާދަވެރި ޤައުމުތަކާއި ވާދަކޮށް ރާއްޖެއަށް ރީތި ނަން ހޯދޭނެކަން ދިވެހި ކުޅުންތެރިން ސާބިތުކޮށްދީފައިވާކަމަށް ނާއިބު ރައީސް ފައިޞަލް ނަޞީމް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވި "ދި ސައުތު އޭޝިއަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެންޕިއަންޝިޕް 2022"ގެ ލޯގޯ އިފްތިތާހް ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މި ރަސްމިއްޔާތުގައި ނައިބު ރައީސް ވިދާޅުވީ ވޭތުވެދިޔަ އަހަރުތަކުގައި ޓޭބަލް ޓެނިސްއަކީ ރާއްޖެއަށް ރަން ވަނަތަކެއް ޙާސިލްކޮށްދީފައިވާ ކުޅިވަރެއްކަމަށެވެ.
ކުޅިވަރަކީ އެންމެން އެއްބައިވަންތަކޮށްދޭ އެއްޗެއްކަން ފާހަގަކުރައްވާ ނައިބް ރައީސް ވިދާޅުވީ 1980 ގެ ތެރެގައި ކުޅިވަރުގެ ފޯރިން އެކަކު އަނެއްކަކު ގުޅުވާލަދިން ފަދައިން މިއަދު އަނެއްކާވެސް ވަނަތަކެއް ހޯދައިގެން އެ މަންޒަރުތައް އިޔާދަވަމުން އަންނަކަމަށެވެ.
ނައިބްރައީސް ވިދާޅުވީ އައިއޯޖީން ހޯދި ކާމިޔާބީންވެސް ރާއްޖެއަށް ރަން ވަނަތަކެއް ހޯދިދާނެކަން ޔަޤީންކޮށްދީފައިވާކަމަށާއި ރާއްޖޭގެ ކުޅުންތެރިންނަށް ދުނިޔޭގެ ޤައުމުތަކުގައި ވާދަކޮށް ރާއްޖެއަށް ރީތި ނަން ހޯދޭނެކަން ސާބިތުކޮށްދީފައިވާކަމަށެވެ.
ނައިބް ރައީސް ވިދާޅުވީ މުޅި ރާއްޖޭގައި ކުޅިވަރުގެ ދާއިރާ ކުރިއަރުވާ ޒުވާނުން ކުޅިވަރުގެ ދާއިރާއަށް ނެރުމަށްޓަކައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވަރަށް ބޮޑު އިސްކަމެއް ދެއްވާކަމަށެވެ. އަދި ކުޅިވަރުގެ އެކި ކަންކަން ރާއްޖޭގެ އެކި ހިސާބުތަކުގައި ދުވަހަކުވެސް ކުރިއަށް ނުގެންދާ މިންވަރަށް އެ މަސައްކަތްތައް މިހާރު ކުރެވެމުންދާކަންވެސް ނާއިބު ރައީސް ފާހަގަކުރެއްވިއެވެ.