ސިންގަޕޫރުގެ ބޮޑުވަޒީރުގެ މަޤާމާ ދެން ޙަވާލުވެވަޑައިގަންނަވާނީ މާލީ ވަޒީރު ލޯރެންސް ވޮންގުކަމަށް އެ ޤައުމުގެ މިހާރުގެ ބޮޑުވަޒީރު ލީ ޝިއެން ލޯންގު އިޢުލާންކުރައްވައިފިއެވެ.
ސިންގަޕޫރުގެ ވެރިކަންކުރާ ޕީޕަލްސްގެ އެކްޝަން ޕާޓީ، ޕީއޭޕީގެ އެންމެ އިސްވެރިޔާގެ މަޤާމަށް ޢުމުރުފުޅުން 49 އަހަރުގެ ލޯންގުވަނީ ޢައްޔަންކޮށްފައެވެ. އެ މަޤާމަށް ވޮންގު ގެނައުމަށް އެންމެ ބޮޑަށް ތާޢީދުކޮށްފައިވަނީ ޕީއޭޕީގެ ޒުވާން މެންބަރުންނެވެ. އެއާއެކު 2004ވަނަ އަހަރުން ފެށިގެން ސިންގަޕޫރުގެ ބޮޑުވަޒީރުކަން ކުރައްވަމުންދާ ޢުމުރުފުޅުން 70 އަހަރުގެ ލޯންގުވަނީ ދެން ބާއްވައި ޢާއްމު އިންތިޚާބުގެ ކުރިން ނުވަތަ އޭގެ ފަހުން ބޮޑުވަޒީރުކަމާ ޙަވާލުވެވަޑައިގަންނަވާނީ ވޮންގުކަމަށް ވިދާޅުވެފައެވެ. އެ ޤައުމުގައި ޢާއްމު އިންތިޚާބެއް ބޭއްވުމަށް ހަމަޖެހިފައިވަނީ 2025ވަނަ އަހަރުގެ ތެރޭގައެވެ.
1965ވަނަ އަހަރުގެ ތެރޭގައި މިނިވަންކަން ލިބުނުފަހުން ސިންގަޕޫރުގައި ވެރިކަންކުރަމުންދަނީ ޕީއޭޕީންނެވެ. އަދި ދުރާލައި ބޮޑުވަޒީރުކަމަށް ވަޑައިގަންނަވާނެ ބޭފުޅެއް އިޢުލާންކުރުމަކީ އެ ޤައުމުގައި ޢާއްމުކަމެކެވެ. ސިންގަޕޫރުގައި އެ ގޮތަށް ޢަމަލުކުރާ މައިގަނޑު ސަބަބަކީ އެ ޤައުމުގައި ހަމަޖެހުމާއި ޞުލްޙަ ދަމަހައްޓައި ވިޔަފާރިއާއި އިޤްތިޞާދު ފުޅާކުރުމަށް ޖާގަދިނުމަށެވެ. ނަމަވެސް މިދިޔަ އަހަރުގެ ތެރޭގައި ސިންގަޕޫރުގެ ބޮޑުވަޒީރުގެ ނައިބު އިސްތިޢުފާދިނުމުން އެ ޤައުމުގައި ދުރާލައި ރާވައިގެން ވެރިކަމަށް އައު ބޭފުޅަކު ގެނައުމަށް ކުރަމުންދާ މަސައްކަތްތަކަށް ކޮންމެވެސް ވަރަކަށް ހިޔަނިއެޅުނެވެ.
2021ވަނަ އަހަރުގެ މެއި މަހުގެ ތެރޭގައި މާލީ ވަޒީރުކަމާ ޙަވާލުވެވަޑައިގަތުމަށްފަހު ވޮންގުވަނީ ކޯވިޑް-19ގެ ސަބަބުން އެ ޤައުމުގެ އިޤްތިޞާދަށް ކުރިމަތިވި ދަތިތަކުން އަރައިގަތުމަށް ވަރަށް ވިސްނުންތެރިކަމާއެކު އެދެވޭ ފިޔަވަޅުތަކެއް އަޅުއްވައިފައެވެ.