ޕާކިސްތާނުގެ ބޮޑުވަޒީރުގެ މަޤާމުން އިމުރާން ޚާން ވަކިކޮށްފިއެވެ. އެއީ އިތުބާރުނެތްކަމުގެ ވޯޓެއް ނަގައި ޕާކިސްތާނުގެ ބޮޑުވަޒީރަކު މަޤާމުން ވަކިކުރި ފުރަތަމަ ފަހަރެވެ.
342 މެންބަރުންގެ މައްޗަށް އެކުލެވޭ ޕާކިސްތާނުގެ ޤާނޫނުހަދާ މަޖިލީހުން އިމުރާން ޚާނުގެ އިތުބާރުނެތްކަމަށް ފާސްކޮށްފައިވަނީ 174 ވޯޓުންނެވެ. އެނާއަށް އިތުބާރުއޮތްކަމަށް އެއްވެސް މެންބަރަކު ވޯޓުދީފައެއް ނުވެއެވެ. ވޯޓުގެ ކުރިން އޭނާއަށް ތާޢީދުކުރާ ހުރިހާ މެންބަރުންވަނީ މާލަން ދޫކޮށް ގޮސްފައެވެ. އޭގެ އިތުރުން އިތުބާރުނެތްކަމުގެ ވޯޓު ނެގުމުގެ ކުރިން ޤާނޫނުހަދާ މަޖިލީހުގެ ރައީސްގެ މަޤާމުން ޢައްސަދު ޤައިޞަރުވަނީ އިސްތިޢުފާދެއްވައިފައެވެ. އޭނާއަކީ އިމުރާން ޚާނުގެ ޕާކިސްތާން ތަޙުރީކީ އިންޞާފް، ޕީޓީއައިއަށް ނިޞްބަތްވެވަޑައިގަންނަވައި ބޭފުޅެކެވެ.
2018ވަނަ އަހަރުގެ ތެރޭގައި ޕާކިސްތާނުގެ ބޮޑުވަޒީރުގެ މަޤާމާ ޙަވާލުވެވަޑައިގެންނެވި އިމުރާން ޚާނާ ދެކޮޅަށް އިތުބާރުނެތްކަމުގެ ވޯޓެއްނަގަން ހުށަހެޅި މައްސަލަ ޤާނޫނުހަދާ މަޖިލީހުން ތާވަލުކޮށްފައެއް ނުވެއެވެ. އޭރު ޤާނޫނުހަދާ މަޖިލީހުގެ ރިޔާސަތުގައި އިންނެވީ އިމުރާން ޚާނުގެ ޕާޓީއަށް ނިޞްބަތްވާ މެންބަރެކެވެ. އިތުބާރުނެތްކަމުގެ ވޯޓުގެ ކުރިން ޕާކިސްތާނުގެ ވެރިކަންކުރާ އިއްތިޙާދަށް ނިޞްބަތްވާ ބައެއް މެންބަރުން އިދިކޮޅާ ގުޅުމުން އިމުރާން ޚާން މަޤާމުން ދުރުކުރެވޭނެކަމަށް ވަރަށް ބޮޑަށް ބެލެވުނެވެ. ނަމަވެސް އިތުބާރުނެތްކަމުގެ ވޯޓުން ރެކިވަޑައިގަންނަވައި އިމުރާން ޚާންވަނީ ޤާނޫނުހަދާ މަޖިލިސް އުވާލެއްވުމަށް އެ ޤައުމުގެ ރައީސް އާރިފް އަލްވީއަށް ދަންނަވައިފައެވެ. އޭނާއަކީވެސް އިމުރާން ޚާނުގެ ޕާޓީއަށް ނިޞްބަތްވެވަޑައިގަންނަވާ މެންބަރެކެވެ. އޭގެ އިތުރުން އިމުރާން ޚާންވަނީ ކުރިޔަށް އޮތް 90 ދުވަހުގެ ތެރޭގައި އެ ޤައުމުގައި ޢާއްމު އިންތިޚާބެއް ބާއްވާނެކަން އިޢުލާންކުރައްވައިފައެވެ.
ޕާކިސްތާނުގެ ސިޔާސީ މަޞްރަޙު ނުތަނަވަސްވެފައިވާ ދަނޑިވަޅެއްގައި ވެރިކަން ދިފާޢުކުރެއްވުމަށް ޕާކިސްތާނުގެ ބޮޑުވަޒީރު އިމުރާން ޚާން އަޅުއްވާފައިވަނީ ޣައިރުޤާނޫނީ ފިޔަވަޅުތަކެއްކަމަށް އެ ޤައުމުގެ ސުޕުރީމު ކޯޓުންވަނީ ކަނޑައެޅިއެވެ. އަދި ޤާނޫނުހަދާ މަޖިލިސް އުވާލައްވާފައިވަނީ ޤާނޫނުއަސާސީއާ ޚިލާފަށްކަމަށާއި އިމުރާން ޚާނާ ދެކޮޅަށް ހުށަހެޅި އިތުބާރުނެތްކަމުގެ މައްސަލަ އަލުން ތާވަލުކުރަން އެ ކޯޓުންވަނީ ޙުކުމުކޮށްފައެވެ. ދެވަނަ ފަހަރަށް އެ މައްސަލަ ތާވަލުކުރި ނަމަވެސް ދެ ފަހަރެއްގެމަތިން ތަފާތު ސަބަބުތަކަށްތަކައި ޖަލްސާ މެދުކަނޑާލަން ޖެހުނެވެ. އެހެންކަމުން އިތުބާރުނެތްކަމުގެ ވޯޓު ނަގާފައިވަނީ މެންދަމުއެވެ.
ޕާކިސްތާނުގެ ޓީވީ ޗެނަލަކާ ވާހަކަދައްކަވަމުން މީގެ ދުވަސްކޮޅެއްކުރިން އިމުރާން ޚާން ވިދާޅުވެފައިވަނީ ޕާކިސްތާނުގެ ދާޚިލީ ކަންކަމުގެ ތެރެއަށް ވަދެ އެ ޤައުމުގެ ވެރިކަން ބަދަލުކުރުމަށް އިދިކޮޅު ފަރާތްތަކުން ކުރަމުންދާ މަސައްކަތްތަކަށް އެމެރިކާއިން ހިތްވަރުދޭތީ އެ ކަމުގެ ޝަކުވާ އެ ޤައުމުގައި ހުންނަ އެމެރިކާގެ އެންބަސީއަށް ލިޔުމުން ހުށަހަޅުއްވާފައިވާނެކަމަށެވެ. އިމުރާން ޚާން ތުޙުމަތުކުރެއްވި ގޮތުގައި އެމެރިކާއިން ހިތްހަމަނުޖެހުނީ ދާދިފަހުން ރަޝިޔާއަށް ވަޑައިގެން އެ ޤައުމުގެ ރައީސް ވުލަޑުމީރް ޕުޓިންނާ ބައްދަލުކުރެއްވުމުންނެވެ. އޭނާ ވިދާޅުވީ އެމެރިކާގެ ޢަމަލުތައް ސާބިތުވާ ލިޔެކިޔުންތަކެއް ހެކީގެ ގޮތުގައި އޭނާއަށް ލިބިވަޑައިގެންފައިވާކަމަށެވެ. ނަމަވެސް ތުޙުމަތުތައް އެމެރިކާގެ ރިޔާސީ ގަނޑުވަރުންވަނީ ދޮގުކޮށްފައެވެ.
ޢުމުރުފުޅުން 69 އަހަރުގެ އިމުރާން ޚާނުގެ ވެރިކަން ނިމުމަކަށް އައުމުން 2023ވަނަ އަހަރުގެ އޯގަސްޓު މަހުގެ ތެރޭގައި ޢާއްމު އިންތިޚާބެއް ބާއްވަންދެން ޕާކިސްތާނުގައި ވެރިކަންކުރާނީ އަލަށް ޢައްޔަންކުރާ ބޮޑުވަޒީރެވެ. ޕާކިސްތާނުގެ އިންތިޚާބާބެހޭ ވުޒާރާއިން ބުނެފައިވަނީ އެ ޤައުމުގައި އެންމެ އަވަހަށްވެސް އިންތިޚާބެއް ބޭއްވޭނީ އަންނަ އޮކްޓޯބަރު މަހުގެ ތެރޭގައިކަމަށެވެ.
1947ވަނަ އަހަރުގެ ތެރޭގައި އިނގިރޭސިވިލާތުން މިނިވަންކަން ލިބުނުފަހުން 220 މިލިޔަން މީހުންގެ އާބާދީއެއް އޮންނަ ޕާކިސްތާނުގައި ބޮޑުވަޒީރުގެ މަޤާމާ ޙަވާލުވެވަޑައިގެންނެވި އެއްވެސް ބޭފުޅަކަށް ފަސް އަހަރުގެ ދަޢުރެއް ފުރިހަމަކުރެއްވިފައެއް ނުވެއެވެ. އެ ގޮތުން 1958ން 1971އަށް، 1977ން 1988އަށް އަދި 1999ން 2008އަށް އެ ޤައުމުގައި އޮތީ އަސްކަރީ ވެރިކަމެކެވެ.