ސޫރިޔާގެ ރައީސް ބައްޝާރުލް އަސަދުގެ ސަރުކާރުން އެޤައުމުގެ ރައްޔިތުންނަށް އިސްކަންދޭ މިންވަރަށް އެހެން އެއްވެސް ފަރާތަކުން އިސްކަމެއް ނުދޭނެ ކަމަށް ސޫރިޔާގެ ސަރުކާރުން ހާމަކޮށްފިއެވެ.ސޫރިޔާގެ ހަނގުރާމައިގެ ސަބަބުން ބަނޑުހައިހޫނުކަން ތަޙައްމަލު ކުރަމުންދާ ސޫރިޔާގެ ރައްޔިތުންނާއި ބެހޭގޮތުން މަޝްވަރާތައް ކުރުމަށް އ.ދގެ ސަލާމަތީ މަޖިލީހުން ބޭއްވި ބައްދަލުވުމެއްގައި ވާހަކަ ދައްކަވަމުން ސޫރިޔާއިން އ.ދއަށް ކަނޑައަޅުއްވާފައި ހުންނަވާ ސަފީރުގެ ނަޢިބު މަންޒޫރު މަންޒޫރު ވިދާޅުވީ، ސޫރިޔާގެ އިދިކޮޅު ހަނގުރާމަވެރިން ކޮންޓްރޯލް ކުރަމުންދާ ސަރަޙައްދުތަކަށް އިންސާނީ އެހީގެ ސާމާނު ފޯރުކޮށް ދިނުމަށް ސޫރިޔާގެ ސަރުކާރުން ގިނަ މަސައްކަތްތަކެއް ކޮށްފައިވާނެ ކަމަށެވެ.އަދި މިކަމުގައި އެހެން އެއްވެސް ފަރާތަކަށް ސޫރިޔާއާއި ޖަދަލު ނުކުރެވޭނެ ކަމަށްވެސް އޭނާ ވިދާޅުވިއެވެ. ސޫރިޔާގެ ސަރުކާރުން މިހެން ބުނެފައިވަނީ، އެޤައުމުގައި ބަނޑުހައިހޫނުކަން ތަޙައްމަލު ކުރަމުންދާ ފަރާތްތަކަށް އެހީ ފޯރުކޮށްދިނުމަށް ސަރުކާރުން ދެކޮޅު ހަދާފައިވާ ކަމަށާއި މިއީ ހަނގުރާމައިގެ ޖަރީމާއެއްގެ ގޮތުގައި އ.ދއިން ސިފަކޮށްފައިވާ ދަނޑިވަޅެއްގައެވެ.ހަނގުރާމައިގެ ސަބަބުން ބަނޑުހައިހޫނުކަމާއި ކުރިމަތިލާންޖެހިފައިވާ ސޫރިޔާގެ 3 ރަށަކަށް އ.ދ އިން ހުސްވި ހަފްތާގައި އިންސާނީ އެހީގެ ސާމާނު ގެންގޮސްފައިވެއެވެ.