މެދުއިރުމަތީގެ މާކެޓުގައި ބާއްވާ އެންމެ މަގުބޫލް އެއް ފެއަރކަމުގައިވާ ޤަތަރު ބިޒްނަސް އެންޑް ލަގްޒަރީ ޓްރެވަލް (ކިއުބީއެލްޓީ) ކޮންގްރެސްގައި އެމްއެމްޕީއާރުސީން ބައިވެރިވެއްޖެއެވެ.
ކިއުބީއެލްޓީ ކޮންގްރެސްއަކީ މައިސް ޓޫރިޒަމަށް އަމާޒުކޮށް މެދުއިރުމަތީގައި ބާއްވާ ލަގްޒަރީ ފެއާރއެކެވެ. ޤަތަރުގެ މައިސް ޓޫރިޒަމްގައި ހަރަކާތްތެރިވާ އެންމެ މަގްބޫލު 50 ' އައިޓުބައުންޑް ޓްރެވަލް ބަޔާސް' މި ފެއަރއަށްވަނީ ޒިޔާރަތްކޮށްފައެވެ. އަދި އެކި ގައުމުތަކުގެ ޓޫރިޒަމް ބޯޑުތަކާއި، ހޮޓެލްތަކާއި، ރިޒޯޓުތަކާއި، ޑީ.އެމް.ސީގެ އިތުރުން ލަގްޒަރީ ޓްރެވަލް ސަޕްލަޔާސް މި ފެއާރގާ ބައިވެރިވެފައިވެެއެވެ. މި ފެއާރގައި އެމްއެމްޕީއާރުސީގެ މައިގަނޑު އަމާޒަކަށްވީ ރާއްޖެއަކީ މައިސް ޓޫރިޒަމަށް އެންމެ މަޤްބޫލު އެއް މަންޒިލްގެ ގޮތުގައި އިޝްތިހާރުކުރުން ކަމަށް އެމްއެމްޕީއާރުސީން ވިދާޅުވިއެވެ.
މުސްތަގުބަލުގައި ރާއްޖޭގެ މައިސް ޓޫރިޒަމް ފުޅާކުރުމުގެ އަޒުމުގައި އެމްއެމްޕީއާރުސީން 'މައިސް ރީޑިފައިންޑް' ކެމްޕެއިނުގެ މެސެޖިންގ މި ފެއާރގައި ވަނީ އިޝްތިހާރުކޮށްފައެވެ. އެމްއެމްޕީއާރުސީން ވަނީ މި ހަރަކާތުގެތެރޭގައި ގަތަރު އެއަރވޭސްގެ ލީޑް މާކެޓިންގް ޓީމާއި އެ އެއަރލައިންގެ ހެޑްކުއާރޓަސްގައި ބައްދަލުވުމެއް ބާއްވާފައެވެ. މި ބައްދަލުުމުގައި މިހާރު ކުރިއަށްދާ އަދި ކުރިއަށް ރޭވިފައިހުރި އެކި ޖޮއިންޓް މާކެޓިންގ ހަރަކާތްތަކާއި، މާކެޓް ގްރޯތް އާއި ރިކަލަވަރީ އާ ބެހޭގޮތުން ވަނީ މަޝްވަރާކޮށްފައެވެ.
މެދުއިރުމަތީ މަރކެޓަކީ ރާއްޖޭގެ ފަތުރުވެރިކަމަށް މުޙިއްމު މާރކެޓެކެވެ. މިދިޔަ އަހަރުތެރޭ އެ ސަރަޙައްދުގެ ޤައުމުތަކުން 91413 ފަތުރުވެރިންވަނީ ރާއްޖެއަށް ޒިޔާރަތްކޮށްފައެވެ. އެމްއެމްޕީއާރުސީން ދަނީ މި މަރކެޓުން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިއަހަރުގެތެރޭ މި ސަރަޙައްދުގެ ޤައުމުތަކުގައި ޖޮއިންޓް މާރކެޓިންގް ކެމްޕެއިންތަކާއި، ވެބިނާތަކާއި، ފެމިލިއަރައިޒޭޝަން ޓްރިޕްތަކާއި، ރޯޑްޝޯތަކުގެ އިތުރުން ބޮޑެތި ފެއތަކުގައި ބައިވެރިވުން ހިމެނެއެވެ.