މަސްދަޅު އުފެއްދުމުގެ ޙަރަދު ބޮޑުވިނަމަވެސް ރޯދަމަސް ނިމެންދެން އަގުތައް ބޮޑެއް ނުކުރާނެ: ފައުޒީ

މިފްކޯއިން މަސްދަޅު އުފެއްދުމުގެ ޙަރަދު ބޮޑުވި ނަމަވެސް ހާއްސަ އިނާޔަތެއްގެ ގޮތުގައި ރޯދަމަސް ނިމެންދެން މަސްދަޅު ވިއްކާ އަގުތައް ބޮޑު ނުކުރާނެކަމަށް އެކުންފުނީގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.

މިފްކޯގެ ސީއީއޯ މިހެން ވިދާޅުވީ ފަސްމީރު މަސްދަޅުގެ މުޅިން އައު އުފެއްދުންތަކެއް ބާޒާރަށް ނެރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

ހުޅުމާލޭ ދެވަނަ ފިޔަވަހީގައި ބޭއްވި މި ރަސްމިއްޔާތުގައި އެ އުފެއްދުންތައް ރަސްމީކޮށް ތައާރަފުކޮށްދެއްވީ މިފްކޯގެ ސީއީއޯ އިސްމާއިލް ފައުޒީއާއި، ބޯޑް މެންބަރު ޝުއައިބު މުހައްމަދެވެ.

މިރަސްމިއްޔާތުގައި ވާހަކަ ދައްކަވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ ދުނިޔޭގެ ބާޒާރުގައި ތެލުގެ އަގު އުފުލުމުން އެ ކުންފުންޏަށް ތަފާތު ގޮންޖެހުންތަކާއި ކުރިމަތިވެފައިވާކަމަށެވެ. އެގޮތުން މިބަދަލާއި ގުޅިގެން މަސް ދަޅު އުފައްދަން މިފްކޯއިން ކުރާ ޙަރަދު މިހާރު 40 އިންސައްތަ އިތުރުވެފައިވާކަމަށް ފައުޒީ ވިދާޅުވިއެވެ.

"ދުނިޔޭގެ ބާޒާރުގައި ތެލުގެ އަގު ހުރި ގޮތުން ގޮންޖެހުން އެބަހުރި. އެގޮތުން އަޅުގަނޑުމެން ދަޅަށް މިއަޅާ ތެލުގެ އަގު މިހާރު މިވަނީ 100 ޕަސެންޓް އިތުރުވެފައި" ސީއީއޯ އިސްމާއިލް ފައުޒީ ވިދާޅުވިއެވެ.

މިފްކޯގެ "ހޮޓް ޕެކް"ގެ ދަށުން މީގެ ކުރިން ތައާރަފުކުރި ބާވަތްތަކެކޭ އެއްފަދައިން މި އުފެއްދުންތަކަށްވެސް ކަސްޓަމަރުންގެ ބޮޑު ތަރުހީބެއް ލިބޭނެކަމަށް އުންމީދުކުރެވޭކަމަށްވެސް ފައުޒީ ވަނީ ފާހަގަކުރައްވާފައެވެ.

މިފްކޯއިން ވިއްކާ ދަޅު މަހުގެ މުޅިން އައު 2 އުފެއްދުމެއް ބާޒާރަށް ނެރެފައިވާއިރު ރޯދަމަހަކީ މިފްކޯގެ އުފެއްދުންތަކަށް ޑިމާންޑް ބޮޑުވާ މަހެކެވެ.

މިފްކޯއިން އަލަށް ބާޒާރަށް ނެރެފައިވާ އުފެއްދުންތަކުގެ ތެރޭގައި ޒައިތޫނި ތެލުގައި ބަންދުކުރެވިފައިވާ ބަނޑައިދުލާއި، މިރުހާއި ލުނބޮލާއެކު ފެނުގައި ބަންދުކުރެވިފައިވާ މަސްދަޅު ހިމެނެއެވެ.