ބަންގްލަދޭޝް އާއި ދެކޮޅަށް ރާއްޖެއިން ނުކުންނަ ބައިނަލްއަގްވާމީ އެކުވެރިކަމުގެ މެޗަށް ނެގި ގައުމީ ފުޓުބޯޅަ ޓީމުގެ ޕްރިލިމިނަރީ ސްކޮޑު އިއުލާން ކޮށްފިއެވެ.
ގައުމީ ޓީމުން 28 ކުޅުންތެރިންގެ ސްކޮޑަކާއެކު ރޭ ފަރިތަކުރުންތައް ފަށާފައިވާއިރު، މިއީ ފީފާ ކަލަންޑަރުގެ ތާރީޚެއްގައި ބަންގްލަދޭޝް އާއި ދެކޮޅަށް ކުޅެން ހަމަޖެހިފައިވާ މެޗަށް ނެގި ސްކޮޑެކެވެ. އަދި މިއީ ގައުމީ ކޯޗުކަމާ މިދިޔަ އޮކްޓޫބަރު މަހު ހަވާލުވި އިޓަލީގެ ފްރެންޗެސްކޯ މޮރިއޭރޯގެ ކޯޗު ކަމުގައި ގައުމީ ޓީމުން ގައުމީ ފުޓުބޯޅަ ދަނޑުގައި ކުޅޭނެ ފުރަތަމަ މެޗެވެ.
މިފަހަރުގެ ސްކޮޑުން ގިނަ ދުވަސްތަކަކަށްފަހު ނޫނީ މުޅިން އަލަށް ނެގި ކުޅުންތެރިންނަށް ބަލާއިރު، މާޒިޔާގެ ވައިސް ކެޕްޓަން ހަސަން ޝިފާޒް (ޑުންގާ) އާއި، ގްރީން ސްޓްރީޓްސްގެ އަޙްމަދު ނާހިލް އަދި ކުލަބް އީގަލްސްގެ އަޙްމަދު ހަސަން (އައްމަޑޭ) ފާހަގަކޮށްލެވެއެވެ.
ސްކޮޑަށް އަލަށް ނެގި ފާހަގަކޮށްލެވޭ ކުޅުންތެރިންގެ ތެރޭގައި ނާހިލް އާއި ޑުންގާ ގިނަ ދުވަސްތަކަކަށްފަހު ސްކޮޑަށް ނެގިއިރު، އައްމަޑޭ ސްކޮޑަށް ނަގާފައިވަނީ މުޅިން އަލަށެވެ.
މީގެ އިތުރުން އަނިޔާއިން ރިކަވާވެގެން މި އަހަރު ޖެނުއަރީ މަހު ކުޅުމަށް އެނބުރި އައިސް ރަނގަޅު ފޯމެއްގައި ކުޅެމުން އަންނަ އީގަލްސްގެ އަހުމަދު ރިޒްވާން (ރިޒޭ) އާއި ކްލަބް ގްރީން ސްޓްރީޓްސްގެ ކެޕްޓަން ރިލްވާން ވަހީދު (ރިލޭ) ވެސް ވަނީ ގައުމީ ޓީމުން ޖާގަ ހޯދައިފައެވެ. އަދި ވެލެންސިއާ ޓީމުގައި ހިމެނޭ ކުރިން ގައުމީ ޓީމަށް ކުޅުނު އަމްދާން އަލީ (އެންޑީ) ވެސް ވަނީ ސްކޮޑުގައި ހިމެނިފައެވެ. އެންޑީ އާއި ރިލޭ ގައުމީ ޓީމުން ޖާގަ މިހޯދީ ގާތްގަނޑަކަށް ފަސް އަހަރަށް ފަހުގައެވެ.
މިފަހަރުގެ ސްކޮޑުގައި އަނިޔާއިން ރަނގަޅުވަމުން އަންނަ ވެލެންސިއާގެ ކެޕްޓަން އަލީ ފާސިރު (ސެންޓޭ) ހިމަނާފައިވާއިރު، ޗެރެޓީ ޝީލްޑް މެޗަށްފަހު އަނިޔާގައި ހުރި އިތުބާރު ފޯވާޑް އަލީ އަޝްފާގު (ދަގަނޑޭ) ސްކޮޑުގައި ހިމަނައިފައެއް ނުވެއެވެ.
ލީގުގައި ރަނގަޅަށް ކުޅުނު ކުޅުންތެރިންގެ ތެރެއިން ސްކޮޑުގައި ހިމެނިފައިނުވާ ކުޅުންތެރިންނަކީ ވެލެންސިއާގެ ހުސައިން ފައިސަލް (ފައިޓޯ) އާއި ސަސްގެ ކެޕްޓަން އަބްދުﷲ ހަނީފް (ބެންޖޯ) ވެލެންސިއާގެ ހިސާމް ސަލީމް (ކޮކީ) އެވެ. މީގެ ކުރިން ގައުމީ ސްކޮޑުން ޖާގަ ދަމަހައްޓަމުން އައި ހުނަރުވެރި މިޑްފިލްޑަރު އިބްރާހީމް ވަހީދު ހަސަން (އިއްބެ) މި ފަހަރުގެ ސްކޮޑުން ވަނީ ބާކީކޮށްފައެވެ.
ރާއްޖެއިން ބަންގްލަދޭޝް އާއި ދެކޮޅަށް އަންނަ ބުރާސްފަތި ދުވަހު ނުކުންނައިރު، މި ދެ ޓީމު އެންމެ ފަހުން ކުޅެފައިވަނީ ލަންކާގައި ބޭއްވި ފޯ ނޭޝަންސް ކަޕުގައެވެ. އެ ފަހަރު ރާއްޖޭގެ މައްޗަށް ބަންގްލަދޭޝް އިން ވަނީ 2-1 ގެ ނަތީޖާއަކުން ކުރިހޯދާފައެވެ. މިއީ 18 އަހަރަށްފަހު ބަންގްލަދޭޝްއަށް ރާއްޖޭގެ މައްޗަށް ކުރިހޯދުނު ފުރަތަމަ ފަހަރެވެ. އޭގެ ކުރިން ސެޕްޓެމްބަރު މަހު ރާއްޖޭގައި ބޭއްވި ސާފް ޗެމްޕިއަންޝިޕް މެޗުގައި ރާއްޖެއިން ވަނީ ބަންގްލަދޭޝްގެ މައްޗަށް 2-0 ގެ ނަތީޖާއަކުން ކުރިހޯދާފައެވެ.
ރާއްޖެ އާއި ބަންގްލަދޭޝްއިން އެންމެ ފަހުން ރަހުމަތްތެރިކަމުގެ މެޗެއް ކުޅެފައިވަނީ 2016 ވަނަ އަހަރުގައެވެ. ގައުމީ ފުޓުބޯޅަ ދަނޑުގައި ކުޅުނު އެ މެޗު ރާއްޖެއިން ކާމިޔާބުކޮށްފައި ވަނީ 5-0 ގެ ނަތީޖާއަކުންނެވެ.