ޕަބްލިކް ސަރވިސް މީޑިއާ (ޕީއެސްއެމް)ގެ ޓެލެވިޜަން މޯލްޑިވްސްގެ ގޯތިތެރޭގައި 15 ބުރީގެ އިމާރާތެއް ހަދަން ހުޅުވާލި ފުރުޞަތުގައި ހުށަހެޅި ބީލަންތައް ޕީއެސްއެމްގެ ރިކުއަރމަންޓަށް ނުފެތޭތީ ބީލަން ހުށައެޅި ފަރާތްތަކަށް އަލުން އެ ފުރުޞަތު ހުޅުވާލައިވިއެވެ.
15 ބުރީގެ މި އިމާރާތަކީ މީޑިއާގެ މަސައްކަތްތަކަށް ޚާއްސަކޮށް ފަރުމާކޮށް، ހެދުމަށް ހަމަޖެހިފައިވާ އިމާރާތެކެވެ. މި މަސައްކަތް ކުރިއަށްގެންދިއުމަށް ހަމަޖެހިފައިވަނީ ޑިޒައިން އެންޑް ބިލްޑް އުސޫލުންނެވެ.
މަސައްކަތް ކޮށްދޭނެ ބަޔަކު ހޯދުމަށް ކުރިން އިޢުލާން ކުރިނަމަވެސް، ޝަރުތުތަކާ އެއްގޮތަށް ބީލަން ހުށައަޅަފައި ނުވާތީ، އެއްވެސް ކުންފުންޏަކަށް ބިޑް އެވޯޑްކޮށްފައެއް ނުވެއެވެ. ބިޑް ހުށައެޅި ފަރާތްތަކަށް، އެ ފަރާތްތަކުން ހުށައެޅި ޕްރޮޕޯސަލް ޕީއެސްއެމްގެ ޝަރުތުތަކަށް ނުފެތޭ ސަބަބުތައް ވަކިން ޙިއްސާ ކުރާނެއެވެ. އެހެންކަމުން އަލުން ބީލަމަށް ހުޅުވާލާފައި މިވަނީ ބީލަން ހުށައެޅި ފަރާތްތަކުން، ޕީއެސްއެމްގެ ރިކުއަރމަންޓާއި އެއްގޮތަށް ބީލަމަށް ބަދަލުގެނެސް ހުށައެޅުމުގެ ފުރުޞަތު ދިނުމަށެވެ.
ބީލަމަށް ހުޅުވާލުމާއި ގުޅޭ ތަފްސީލް ޕީއެސްއެމްއިން އިޢުލާން ކުރާނެއެވެ.