އެމެރިކާގެ ރައީސް ޖޯ ބައިޑަންނާ ދެކޮޅަށް ރަޝިޔާއިން ދަތިކުރުމުގެ ފިޔަވަޅުއަޅައިފިއެވެ.
ފެބްރުއަރީ މަހުގެ 24ވަނަ ދުވަހު ޔޫކްރެއިނަށް ޙަމަލާދޭން ފެށުމުން ރަޝިޔާގެ ރައީސް ވުލަޑުމީރް ޕުޓިންނާއި ސަރުކާރުގެ އިސްވެރިންނާއި ސަރުކާރާ ގުޅުން އޮންނަ ވިޔަފާރިވެރިންނާއި ކުންފުނިތަކާ ދެކޮޅަށް އެމެރިކާ އިސްވެވަނީ ހަރުކަށި އިޤްތިޞާދީ ފިޔަވަޅުތަކެއް އަޅައިފައެވެ. އެ ފިޔަވަޅުތައް ތަންފީޒުކުރުމުގައި ވިލާތުގެ އިއްތިޙާދުންނާއި އިނގިރޭސިވިލާތުންނާއި އޮސްޓުރޭލިޔާއިންނާއި ކެނެޑާއިންނާއި ޖަޕާނުންވެސްވަނީ ބައިވެރިވެފައެވެ. އަދި ފާއިތުވި ދުވަސްތަކުގައި އެހެން ޤައުމުތަކުންވެސް ރަޝިޔާއާއި އަސްކަރީގޮތުންނާއި މާލީގޮތުންނާއި އިޤްތިޞާދީގޮތުން ރަޝިޔާއާ އެއްވެސް މުޢާމަލާތެއް ނުކުރުމަށް އެމެރިކާއިންވަނީ ބާރުއަޅައިފައެވެ.
އެމެރިކާއާއި އެ ޤައުމުގެ ބައިވެރިން އަޅަމުންދާ ދަތިކުރުމުގެ ފިޔަވަޅުތަކުގެ ރައްދުގައި ރަޝިޔާގެ ސަރުކާރުންވަނީ ބައިޑަންގެ އިތުރުން އެމެރިކާގެ އިސްވެރިންނާ ދެކޮޅަށްވެސްދަތިކުރުމުގެ ފިޔަވަޅުއަޅައިފައެވެ. އެ ގޮތުން އެމެރިކާގެ ޚާރިޖީ ވަޒީރު އެންތޮނީ ބުލިންކެންނާއި ދިފާޢީ ވަޒީރު ލޮޔިޑު އޮސްޓިންނާއި އިތުރު 10 ބޭފުޅަކާ ދެކޮޅަށް ރަޝިޔާއިންވަނީ ފިޔަވަޅުއަޅައިފައެވެ. އޭގެ ތެރޭގައި ޔޫކްރެއިނުގެ ހަކަތައިގެ ސިނާޢަތާ ގުޅުންތަކެއް އޮންނަ ބައިޑަންގެ ދަރިކަލުން ހަންޓާވެސް ހިމެނެއެވެ. އެ ބޭފުޅުންނާ ދެކޮޅަށް އެޅި ފިޔަވަޅުތަކުގެ ދަށުން ރަޝިޔާގެ އެއްވެސް ސަރަޙައްދަކަށް އެތެރެވުންވަނީ މަނާކޮށްފައެވެ. އަދި ކުރިޔަށް އޮތް ދުވަސްތަކުގައި އެ ލިސްޓުގައި އިތުރު ނަންތަކެއް ހިމަނާނެކަމަށްވެސް ރަޝިޔާއިންވަނީ ބުނެފައެވެ.