ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ކޮށްކޯފުޅު އަދި ޤާނޫނީ ވަކީލް ނާޒިމް ސައްތާރު ލިޔުއްވި ދިވެހި ލަފްޒުގެ އަދަބިއްޔާތާ ގުޅޭ ދިރާސީ ފޮތް "ދިވެހި ލަފްޒުގެ ކިއްސަރު" ނެރުއްވައިފިއެވެ.
ޤައުމީ ޔުނިވަރސިޓީގެ އޮޑިޓޯރިއަމްގައި ބޭއްވި ޙަފްލާގައި، "ދިވެހި ލަފްޒުގެ ކިއްސަރު" ފޮތް ނެރެދެއްވީ ރައްޔިތުންގެ މަޖިލީހުގެ ރައީސް އަދި ނާޒިމް ސައްތާރުގެ ބޭބޭފުޅު ރައީސް މުޙައްމަދު ނަޝީދެވެ.
ނާޒިމް ސައްތާރް ވިދާޅުވީ "ދިވެހި ލަފްޒުގެ ކިއްސަރު" މި ފޮތަކީ ދިވެހި ބަހުގެ ލަފްޒުތައް އުފެދިފައިވާގޮތާއި އަދި ބަސް އުފެއްދުމާ ގުޅޭގޮތުން އިލްމީ ރޮނގުން ލިޔެފައިވާ ފޮތެއްކަމަށެވެ. މިފޮތް ޚާއްސަކޮށްފައިވަނީ ދިވެހި ބަސް ކިޔަވާ ދަރިވަރުންނަށް، ޢިލްމީ އެހީތެރިކަން ދިނުމުގެ ގޮތުންނެވެ. މިފޮތުގައި، ދިވެހި އާ ލަފްޒު އުފެދިގެން އަންނަ ގޮތާއި، ލަފްޒު ފުރޮޅިގެންދާގޮތާގުޅޭ މަޢުލޫމާތުތައްވަނީ ހިމަނާފައެވެ. މި ފޮތުގައި ވަނީ 138 ޞަފުޙާއެވެ.
ފޮތް ނެރުމުގެ ޙަފްލާގައިވަނީ "އަކުރު އިލްމާގުޅޭ މަޝްވަރާ"އެއް ކުރިއަށް ގެންގޮސްފައެވެ. މިމަޝްވަރާގެ ރިޔާސަތު ބެލެހެއްޓެވީ ރައީސް ނަޝީދެވެ. މީގެ އިތުރުން ދިވެހި ބަހުގެ އެކެޑަމީގެ ކުރީގެ ރައީސް އަޝްރަފް އަލީއާއި، ދިވެހި ބަހުގެ ދެ ލެކްޗަރާއަކު ބައިވެރިިވިއެވެ.
އަދި މަޝްވަރާގައި ފަންނާއި ސަޤާފަތާއި ތަރިކައިގެ ވަޒީރު ޔުމްނާ މަޢުމޫންއާއި، ބަހަށް ލޯބިކުރާ ފަރާތްތަކުން މަޢުލޫމާތު ޙިއްސާކޮށް ޚިޔާލު ބަދަލުކޮށްފައިވެއެވެ. ބައްދަލުވުމާއި މަޝްވަރާތައް ގަޑިއެއްހާއިރަށް ކުރިއަށް ގެންދިޔައެވެ.
"ދިވެހި ލަފްޒުގެ ކިއްސަރު" ފޮތް ނެރުމަށް ބޭއްވު ޙަފްލާގައި ބަހުގެ ދާއިރާއިން މަސައްކަތްކުރާ މީހުންނާއި ބަހަށް ލޯބިކުރާ ގިނަ ބަޔަކު ބައިވެރިވިއެވެ.