އަނެއްކާވެސް މާލެއަށް ވެލައެއް އަރައިފިއެވެ. މި ވެލާ އަރާފައިވަނީ ސިނަމާލެ ބްރިޖު ކައިރީ އޮތް ދޮންވެލި ފަސްގަނޑަށެވެ.
މީގެ 2 ހަފްތާއެއްހައި ދުވަސް ކުރިންވެސް ހަމަ އެފަސްގަނޑަށް ވެލައެއް އެރިއެވެ. ނަމަވެސް އެ ވެލާ އެއްގަމަށް އަރައި ތާށިވެފައި އޮތްކަމަށް ބެލެވިގެން ވަނީ މޫދަށް ދޫކޮށްލާފައެވެ.
އަނެއްކާވެސް މާލެއަށް ވެލާ މިއެރީ މިރޭގެ 8:30 ހާއިރުއެވެ. މިއީ ފަހުގެ ތާރީޚެއްގައި މާލެ ސަރަޙައްދަށް ފެނުނު އާ ކަމަކަށްވުމުން، ގިނަ ބަޔަކު މި މަންޒަރު ބެލުމަށްވެސް އެ ސަރަޙައްދަށް އެއްވިއެވެ. ކުރީ ފަހަރާއި ޚިލާފައި މިފަހަރު ފުލުހުނާއި އީޕީއޭއިން ތިބީ ވެލާގެ ޙިމާޔަތުގައި ފޯރިމަރާށެވެ.
އީޕީއޭގެ ޑިރެކްޓަރ ޖެނެރަލް އިބްރާޙިމް ނައީމް ޕީއެސްއެމް ނިއުސްއަށް ވިދާޅުވި، މިފަހަރުވެސް މާލެއަށް އަރާފައިވަނީ މީގެ 2 ހަފްތާކުރިން އެރި ބާވަތުގެ ވެލައެއްކަމަށެވެ. މިއީ ހަމަ އެވެލެއަށްވެސް ވުން އެކަށީގެންވާކަމަށް އޭނާ ވިދާޅުވިއެވެ. ނައީމް ވިދާޅުވީ މަންޒަރުން ފެންނަނީ ވެލާ ބިސްއަޅަން ތައްޔާރުވާފަދަ މަންޒަރެއްކަމަށެވެ. އެގޮތުން ބިސްއެޅުމަށް ވަޅު ކޮންނަގޮތަށް ވަޅު ކޮނެ، ވެލާ އަދިވެސް އޮތީ ބްރިޖް ސަރަޙައްދުގައެވެ.
ވެލާ އޮތް ސަރަޙައްދުގައި ޓޭޕް ދަމާ، އާއްމުންނަށް އެ ސަރަޙައްދަތް ކައިރި ނުވެވޭގޮތަށް މިހާރު އޮތީ ބަންދުކޮށްފައެވެ.