ކުރިއަށް އޮތް ރަމަޟާންމަހަށް ތައްޔާރުވުމުގެ ގޮތުން އިސްލާމީ މަރުކަޒުގެ އާބާތުރަ ފިލުވުމުގެ މަސައްކަތް އިސްލާމިކް މިނިސްޓްރީއިން ފަށައިފިއެވެ.
އިސްލާމިކް މިނިސްޓްރީން ބުނީ ބަރަކާތްތެރި ރަމަޟާންމަހަށް ތައްޔާރުވުމުގެ ގޮތުން އިސްލާމީ މަރުކަޒުގެ އާބާތުރަ ފިލުވުމުގެ މަސައްކަތް ފަށާފައިވަނީ މި ހިނގާ މާޗުމަހުގެ ފުރަތަމަ ހަފްތާގައިކަމަށެވެ.
އާބާތުރަ ފިލުވުމުގެ ގޮތުން ކުރާ މައިގަނޑު ކަންކަމުގެ ތެރޭގައި އިސްލާމީ މަރުކަޒު ބޭރުފާރުތައް ދޮވެ ސާފު ކުރުމާއި، އެތެރެ ފޮޅާސާފު ކުރުމާއި، މިހުރާބުގޭގެ ކެލިގްރަފީ އާކުރުން ހިމެނެއެވެ. އޭގެއިތުރުން އަންހެނުން ނަމާދުކުރާބައިގައި އިތުރު ފަންކާ ހަރުކުރުމާއި، އިސްލާމީ މަރުޒަކުގެ ގޯތިތެރޭގައި ހަލާކުވެފައިވާ މާބުލްތަށް ނަގާ އާ މާބުލްޖެހުންވެސް ހިމެނެއެވެ.
މިނިސްޓްރީން ބުނީ ފާއިތުވެދިޔަ ތިން އަހަރު ރަމަޟާންމަހުވެސް އިސްލާމީ މަރުކަޒުގައި ބޮޑެތި މަރާމާތުތައްކޮށް ޒީނަތްތެރި ކޮށްފައިވާކަމަށެވެ. އެގޮތުން ކެލިގްރަފީ ބޯޑުތައް މަރާމާތުކޮށް ރީތި ކުރުމާއި،ވލަކުޑި ޖާލިތައް ބަދަލު ކުރުމާއި، ކުލަ އާކުރުން އަދި ބޮކިތަކާއި ފަންކާ ބަދަލު ކުރުން ހިމެނެއެވެ. އޭގެ އިތުރުން އިސްލާމީ މަރުކަޒުގެ ގުއްބާއި މުންނާރު އައު ކުރުމާއި، ބޮޑު ދެ ފަންކާ ހަރުކުރުމާއި، ޗާންދަލިޔާ އާކުރުމުގެ އިތުރުން އިސްލާމީ މަރުކަޒުގެ ސައުންޑް ސިސްޓަމްވެސް ބަދަލުކޮށްފައިވާކަމަށް މިނިސްޓްރީން ބުނެއެވެ.
އިސްލާމީ މަރުކަޒަކީ ދިވެހިރާއްޖޭގެ އިސްލާމީ ވަންތަކަށް ރަމްޒުކޮށްދޭ އެންމެ ބޮޑު ބިނާއެވެ. އެހެންކަމުން މިނިސްޓްރީ އޮފް އިސްލާމިކް އެފެއާޒުން އިސްލާމީ މަރުކަޒު ކޮންމެ އަހަރަކު ރަމަޟާންމަހަށް ޚާއްސަކޮށްގެން އާބާތުރަފިލުވާއި ޒީނަތްތެރި ކުރެއެވެ.
މީގެ އިތުރުން މާލެ ސިޓީ ކައުންސިލްގެ ބެލުމުގެ ދަށުގައި ހުރި 42 މިސްކިތުގެ ތެރެއިން 32 މިސްކިތް، ކުރިއަށް އޮތް ރަމަޟާންމަހަށް އާބާތުރަ ފިލުވައި މަރާމާތުކުރުމުގެ މަސައްކަތް މިހާރުވެސް އަންނަނީ ކުރަމުންނެވެ.