ރަޝިޔާއިން ޔޫކްރެއިނުގައި ކުރަމުންދާ ހަނގުރާމަ ތިންވަނަ ހަފުތާއަކަށް ދިގުދެމިއްޖެއެވެ.
ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ދެމުންދާ ޙަމަލާތަކުގައި އެތައް ހާސް ބަޔަކު މަރުވެ ދެ މިލިޔަނަށްވުރެ ގިނަ މީހުންގެ ގެދޮރުވަނީ ގެއްލިފައެވެ. އޭގެ އިތުރުން ރަޝިޔާއިން ދެމުންދާ ވަރުގަދަ ޙަމަލާތަކުގެ ސަބަބުން ޔޫކްރެއިނުގެ ބޮޑެތި ސަރަޙައްދުތަކުގައި އެތައް މިލިޔަން މީހުންނެއްވަނީ ތާށިވެފައެވެ. އޭގެ ތެރޭގައި ވެރިރަށް ކިޔޭވާއި ޔޫކްރެއިނުގެ ދެވަނައަށް އެންމެ ބޮޑުރަށްކަމަށްވާ ކަރްކީވު ހިމެނެއެވެ.
މީގެ ތިން ހަފުތާ ކުރިން ޔޫކްރެއިނުގެ ތިން ސަރަޙައްދަކުން ރަޝިޔާއިން ވަރުގަދަ ޙަމަލާތަކެއް ދޭން ފެށީ ޔޫކްރެއިނުގެ ރައީސް ވޮލޮދީމީރް ޒެލެންސްކީ މަޤާމުން ދުރުކޮށް ރަޝިޔާއާ ރަޙުމަތްތެރި ސަރުކާރެއް ޤާއިމުކޮށް އެ ޤައުމުގެ އަސްކަރީ ބާރުވެރިކަން ނައްތާލުމުގެ އަޒުމުގައެވެ. ނަމަވެސް ޒެލެންސްކީ އަދިވެސް ހުންނެވީ ވެރިރަށް ކިޔޭވުގައެވެ. އަދި ހަނގުރާމައިގެ ފުރަތަމަ ދުވަސްކޮޅު ކިޔޭވުގެ ބައެއް ސަރަޙައްދުތަކަށް ރަޝިޔާގެ ސިފައިން އެތެރެވި ނަމަވެސް ފަހުންވަނީ އެ ފައުޖުތައް ފަހަތަށް ޖައްސައިފައެވެ. އޭގެ އިތުރުން ޢާއްމުންގެ އެތައް ހާސް ބަޔަކަށް ހަތިޔާރު ބަހައި ހަނގުރާމައަށް ނެރުމުންނާއި ހަނގުރާމަކުރުމަށް 20،000އަށްވުރެ ގިނަ ކުލީ ސިފައިން އެ ޤައުމަށް ދިޔުމުންނާއި ހުޅަނގުން ޒަމާނީ ހަތިޔާރު ދޭން ފެށުމުން ޒެލެންސްކީ ހުންނެވީ ރަޝިޔާގެ ޙަމަލާތަކުން ޔޫކްރެއިނު ދިފާޢުކުރެއްވޭނެކަމުގެ އުއްމީދުގައެވެ.
ޔޫކްރެއިނުގައި ހީކުރިވަރުގެ ކުރިއެރުންތަކެއް ރަޝިޔާއަށް ނުހޯދުނު ނަމަވެސް އެ ޤައުމުގެ އަސްކަރިއްޔާއިންވަނީ މުޙިއްމު ލަނޑުދަނޑިތަކެއް ޙާޞިލްކޮށްފައެވެ. އެ ގޮތުން ހަނގުރާމައިގެ އެންމެ ފުރަތަމަ ދެތިން ގަޑިއިރުގެ ތެރޭގައި ރަޝިޔާގެ ފައުޖުތަކުންވަނީ ޔޫކްރެއިނުގެ ވައިގެ އަސްކަރިއްޔާ ނައްތާލައިފައެވެ. އަދި ޔޫކްރެއިނުގެ އިރުމަތީގެ ދޮންބާސް ސަރަޙައްދުން ފެށިގެން ދެކުނުގައި އޮންނަ ކުރިމިޔާއާ ހަމައަށް އޮތީ ރަޝިޔާގެ ބާރެވެ. އެއާއެކު އަޒޯވު ކަނޑުގެ ސަރަޙައްދުވެސްވަނީ ރަޝިޔާގެ ބާރުގެ ދަށަށް ގެނެސްފައެވެ.
ޔޫކްރެއިނުގެ މައްސަލައަށް ޞުލްޙަވެރި ޙައްލެއް ގެނައުމަށް ތިން ފަހަރެއްގެ މަތިން މަޝްވަރާ ބައްދަލުވުންތަކެއް ބޭއްވި ނަމަވެސް އެއްވެސް ކުރިއެރުމެއް ލިބިފައެއް ނުވެއެވެ. އެ ބައްދަލުވުންތަކުގައި ރަޝިޔާއިން އެދިފައިވަނީ ހުޅަނގުގެ އަސްކަރީ އިއްތިޙާދު، ނޭޓޯގެ މެންބަރުކަން ދުވަހަކުވެސް ނުހޯދާނެކަމަށް ޔޫކްރެއިނުގެ ޤާނޫނުއަސާސީގައި ހިމެނުމަށާއި 2014ވަނަ އަހަރުގެ ތެރޭގައި ރަޝިޔާގެ ބާރުގެ ދަށަށް ގެންގޮސްފައިވާ ޔޫކްރެއިނުގެ ކުރިމިޔާގެ މިލްކުވެރިކަމަށް ދަޢުވާ ނުކުރުމަށާއި އަމިއްލައަށް މިނިވަންކަން އިޢުލާންކޮށްފައިވާ ޔޫކްރެއިނުގެ އިރުމަތީގައި އޮންނަ ދޮންބާސްގެ ދެ ދަޢުލަތް ބަލައިގަތުމަށެވެ. އަދި އެ ޝަރުތުތަކަށް އެއްބަސްވެއްޖެނަމަ ކުޑަ ހިނދުކޮޅެއްގެ ތެރޭގައި ޔޫކްރެއިނަށް ދެމުންދާ ޙަމަލާތައް ރަޝިޔާއިން ހުއްޓާލާނެކަމުގެ ޔަޤީންކަން އެ ޤައުމުންވަނީ ދީފައެވެ. ނަމަވެސް ޔޫކްރެއިނުންވަނީ އެ ޝަރުރުތައް ބަލައިގަތުމަށް ދެކޮޅުހަދައިފައެވެ.