ރޯދަމަހު ކައިވެނިކޮށްދޭނެ ގަޑިތައް އިއުލާންކޮށްފި

ރަމަޟާންމަހުގެ ތެރޭގައި ފެމިލީ ކޯޓުން ކައިވެނިކޮށްދޭނެ ގަޑިތައް ކަނޑައަޅާ އިއުލާންކޮށްފިއެވެ.

ފެމިލީ ކޯޓުން އާންމުކުރި އިއުލާނެއްގައިވަނީ ރަމަޟާމަހާއި ޝައްވާލުމަހުގެ ފުރަތަމަ 7 ދުވަހު ކައިވެނިކޮށްދިނުމަށް ނިންމާފައިވަނީ ކޯޓުގައި ރަސްމީ ގަޑީގައިނަމަ ހެނދުނު 9:30އިން މެންދުރު 12:30އަށް ކަމަށެވެ. އަދި ނުރަސްމީ ގަޑިތަކުގައި ކައިވެނިކޮށްދޭނީ ރޭގަނޑު 21:30 އިން 23:00އަށްކަމަށެވެ. އަދި ކޯޓުން ބޭރުގައިނަމަ ނުރަސްމީ ގަޑީގައި ކައިވެނިކޮށްދޭނީ ރޭގަނޑު 21:30އިން 23:00އަށްކަމަށް ފެމިލީ ކޯޓުން ބުންޏެވެ.

ފެމިލީ ކޯޓުން ރަމަޟާން މަސް ނޫން މަސްތަކުގައި ކައިވެނިކޮށްދެމުން އަންނަނީ ހެނދުނު 9:00 އިން 11:30އަށް އަދި މެންދުރުފަހު 1:00 އާއި 1:30އަށެވެ އަދި ނުރަސްމީ ގަޑީގައި ކޯޓުން ބޭރުގައި ހަވީރު 4:00އިން ރޭގަނޑު 9:30 އަށެވެ. މީގެކުރިން ބައެއް ބަންދު ދުވަސްތަކުގައި ފެމިލީ ކޯޓުން ކައިވެނިކޮށް ނުދޭ ގޮތަށް ހަމަޖައްސާފައި އޮތުމަށްފަހު، މިއަހަރު ފެށުމާއެކު އެ ކޯޓުން ބުނެފައިވަނީ މިއަހަރުގެ ހުރިހާ ދުވަހެއްގައިވެސް ކައިވެނިކޮށްދޭނެކަމަށެވެ. މިގޮތުން މިހާތަނަށް އެއް ދުވަހެއްގައި އެންމެ ގިނަ ކައިވެނިކޮށްދީފައިވަނީ މިދިޔަ ފެބުރުއަރީ މަހުގެ 22 ވަނަ ދުވަހުއެވެ. އެދުވަހު އެކަނިވެސް ފެމިލީކޯޓުން 85 ކައިވެންޏެއް ކޮށްދީފައިވެއެވެ.