ރަޝިޔާއިން ދެމުންދާ ޙަމަލާތައް ދިފާޢުކުރުމަށް ވަރަށް ގިނަ ޤައުމުތަކަކުން އެހީތެރިވި ނަމަވެސް އެއަށްވުރެ ބޮޑަށް ޔޫކްރެއިނަށް އަޅާލަން ޖެހޭކަމަށް އެ ޤައުމުގެ ރައީސް ވޮލިދީމީރް ޒެލެންސްކީ ވިދާޅުވެއްޖެއެވެ.
އިނގިރޭސިވިލާތުގެ ޤާނޫނުހަދާ މަޖިލީހުގައި ވީޑިޔޯ މެދުވެރިކޮށް ތަޤްރީރުކުރައްވަމުން ޒެލެންސްކީވަނީ ރަޝިޔާއިން ޔޫކްރެއިނަށް ދެމުންދާ ވަރުގަދަ ޙަމަލާތައް ދުވަހުން ދުވަހަށް ހިނގަމުންދާ ގޮތާއި ބޭނުންކުރަމުންދާ ހަތިޔާރާއި ޢާއްމުންނަށާއި މުދަލަށް ލިބެމުންދާ ގެއްލުންތައް ވަރަށް ތަފްޞީލްކޮށް ކިޔައިދެއްވައިފައެވެ. އަދި އިނގިރޭސިވިލާތާއި ހުޅަނގުގެ ޤައުމުތަކުން ޔޫކްރެއިނަށް ވަރަށް ބޮޑަށް އެހީތެރިވަމުންދާކަމަށާއި އެ ކަމަށް ވަރަށް ބޮޑަށް ޝުކުރުވެރިވާކަމަށް ޒެލެންސްކީވަނީ ވިދާޅުވެފައެވެ. ނަމަވެސް ޔޫކްރެއިނަށް އެއަށްވުރެ ބޮޑަށް އެހީތެރިކަން ބޭނުންވާކަން ފާހަގަކުރައްވަމުން އޭނާވަނީ ޔޫކްރެއިނުގައި އުދުހުން މަނާ ސަރަޙައްދެއް ޤާއިމުކޮށްދިނުމަށާއި ރަޝިޔާއާ ދެކޮޅަށް އަދިވެސް ހަރުކަށި ފިޔަވަޅުތަކެއް އަޅައި އެ ޤައުމު ދުނިޔެއިން ބާކީކޮށްދިނުމަށް އެދިވަޑައިގެންފައެވެ.
ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ވަރުގަދަ ޙަމަލާތަކެއް ދޭން ފެށުމުން ހުޅަނގުގެ ބާރުތަކުންވަނީ ރަޝިޔާއާ ދެކޮޅަށް ވަރުގަދަ އިޤްތިޞާދީ ފިޔަވަޅުތަކެއް އަޅައިފައެވެ. އެ ގޮތުން ރަޝިޔާގެ މުދަލާއި ފައިސާ ހިފަހައްޓައި ދުނިޔޭގެ މާލީ ނިޒާމުން ބާކީކޮށް އެ ޤައުމުން ތެލާއި ގޭސް ގަތުންވަނީ ހުއްޓާލައިފައެވެ. އަދި ރަޝީޔާގެ މަތިންދާބޯޓުތަކަށް ވިލާތުގެ ޤައުމުތަކުގެ ވައިގެ ސަރަޙައްދު ބޭނުންކުރުން މަނާކޮށް އެ ޤައުމުތަކުން ރަޝިޔާއަށް ދަތުރުކުރުންވަނީ ހުއްޓާލައިފައެވެ.
އިނގިރޭސިވިލާތުގެ ކުރީގެ ބޮޑުވަޒީރު ވިންސްޓަން ޗާޗިލް ދެވަނަ ބޮޑު ހަނގުރާމައިގެ ދުވަސްވަރު ދެއްވި ތަޤްރީރުގެ ބައިތަކެއް ހިމަނުއްވައި ޒެލެންސްކީ ވިދާޅުވީ އެންމެ ފަހު މީހާއަށް ޖެހެންދެން ކޮންމެ އަގެއް ދައްކަން ޖެހުނު ނަމަވެސް ޔޫކްރެއިނުގެ ރައްޔިތުން ހަނގުރާމަކުރުންމަތީ ދެމިތިބޭނެކަމަށެވެ. އެ ތަޤްރީރު ނިންމަވާލެއްވުމުން ޤާނޫނުހަދާ މަޖިލީހުގެ ޖަލްސާއަށް ހާޒިރުވެވަޑައިގެން ތިއްބެވި ހުރިހާ މެންބަރުންވަނީ ޒެލެންސްކީއަށް ވަރަށް ހޫނު ތަރްހީބެއް ދެއްވައި އަތްތިލަބަޑި ޖައްސަވައިފައެވެ. އެއީ އިނގިރޭސިވިލާތުގެ ޤާނޫނުހަދާ މަޖިލީހުގެ އުޞޫލްތަކާ ޚިލާފުކަމެކެވެ.