ފީފާ ވާރލްޑް ކަޕްގެ ޔޫރަޕިއަން ކޮލިފައިންގ ޕްލޭ އޮފްގައި ސްކޮޓްލަންޑާއި ޔޫކްރެއިން ބައްދަލުކުރުމަށް ހަމަޖެހިފައިވި މެޗް ފަސް ކުރުމަށް ނިންމައިފިއެވެ. މިދެޓީމްގެ މެދުގައި ކުޅުމަށް ހަމަޖެހިފައިވި މެޗް މިމަހުގެ 24 ވަނަ ދުވަހު ސްކޮޓްލަންޑްގައި ކުޅުމަށް އޮތީ ކުރިން ހަމަޖެހިފައެވެ.
މިނިންމުމާއެކު ޕްލޭ އޮފް ފައިނަލްގައި މިދެޓީމްގެ ތެރެއިން މޮޅުވާ ޓީމަކާއި ވޭލްސް އާއި އޮސްޓްރިއާ ބައްދަލުކުރާމެޗުން މޮޅުވާ ޓީމެއްގެ މެދުގައި 29 މާރޗްގައި ކުޅުމަށް ހަމަޖެހިފައިވާ މެޗް ވެސް ވަނީ ފަސްކުރަންޖެހިފައެވެ. އަދި މިހާރު މިމެޗްތައް ކުޅޭނެ ތާރީޚުތަކެއް ކަނޑައެޅުމުގެ މަސައްކަތް ދަނީ ކުރަމުންނެވެ. އަދި މިމެޗްތައް ކުޅުން އެންމެ ގާތް ދުވަސްތަކަކަށް ބެލެވިފައިވަނީ ނޭޝަންސް ލީގުގެ މެޗްތައް ޖޫން މަހު ކުޅުމަށް އޮތް ދުވަސްކޮޅެވެ.
މިފަހަރުގެ ވާރލްޑް ކަޕް ބޭއްވުމަށް ހަމަޖެހިފައިވަނީ މިއަހަރުގެ ނޮވެމްބަރު މަހުގެ 21 އިން ޑިސެމްބަރު މަހުގެ 18 އަށް ޤަތަރުގައެވެ.