ޔޫކްރެއިނުގެ މައްސަލާގައި އދގެ އެންމެ މަތީ ކޯޓުގައި ބޭއްވި އަޑުއެހުމަށް ރަޝިޔާއިން ހާޒިރުވާން ދެކޮޅުހަދައިފިއެވެ.
ނެދަލެންޑްސްގެ ދަ ހޭގުގައި ހުންނަ އިންޓަނޭޝަލް ކޯޓު އޮފް ޖަސްޓިސް، އައިސީޖޭއަށް ޔޫކްރެއިނުން ހުށަހެޅި މައްސަލާގައި އެދިފައިވަނީ ރަޝިޔާއިން ދެމުންދާ ޙަމަލާތައް ވަޤުތުން ހުއްޓާލުމަށް ޢަމުރުކޮށްދިނުމަށެވެ. އެ މައްސަލައިގެ އަޑުއެހުމަށް ރަޝިޔާއިން ހާޒިރުވާން ދެކޮޅުހެދުމުން އެ އަޑުއެހުން ބާއްވާފައިވަނީ އެ ޤައުމުގެ އެއްވެސް ބައިވެރިވުމެއް ނެތިއެވެ. ޔޫކްރެއިނުގެ ވަކީލުންވަނީ ރަޝިޔާއިން އިޚްތިޔާރުކުރީ ކޯޓުން މައްސަލަ ނިންމުމުގެ ބަދަލުގައި ހަނގުރާމައިގެ މައިދާންކަމަށް ބުނެ ވަރަށް ބޮޑަށް ފާޑުކިޔައިފައެވެ. އެ ގޮތުން ވާކީލުންވަނީ ހަތިޔާރު ބެހެއްޓުމަށްފަހު ކޯޓަށް ހާޒިރުވެ ދޮންބާސްގައި ދިރިއުޅޭ މީހުންނާ ދެކޮޅަށް ޔޫކްރެއިނުގެ އަސްކަރިއްޔާއިން ހިންގި ޤަތުލްޢާއްމު ސާބިތުކޮށްދިނުމަށް ގޮވާލައިފައެވެ.
ޔޫކްރެއިނަށް ޙަމަލާދިނުމަށް ރަޝިޔާގެ ފައުޖުތަކަށް ޢަމުރުކުރެއްވުމުގެ ކުރިން އެ ޤައުމުގެ ރައީސް ވުލަޑުމީރް ޕުޓިންވަނީ ޔޫކްރެއިނުގެ އިރުމަތީގެ ދޮންބާސްގައި ޔޫކްރެއިނުގެ ފައުޖުތަކުން ލާއިންސާނީ ބޮޑެތި ޖަރިމާތަކެއް ހިންގާފައިވާކަމަށް ތުޙްމަތުކުރައްވައި އެއީވެސް އިންސާނުންކަމަށާއި އެ މީހުންގެ ދިފާޢުގައިވެސް ބަޔަކު ތެދުވަންޖެހޭނެކަމަށް ވިދާޅުވެފައެވެ. ޔޫކްރެއިނުގެ އެންމެ ގިނަ މުސްލިމުން ދިރިއުޅޭ ދޮންބާސަށް ފާއިތުވި އަށް އަހަރުގެ ތެރޭގައި ޔޫކްރެއިނުގެ އަސްކަރިއްޔާއިން ދީފައިވާ ޙަމަލާތަކުގައި މަދުވެގެން 13،000 މީހުން މަރުވެފައިވާކަމަށް އދންވެސްވަނީ ބުނެފައެވެ. ނަމަވެސް ޔޫކްރެއިނުން ބުނެފައިވަނީ ދޮންބާސްގައި އެއްވެސް ޤަތުލްޢާއްމެއް ހިންގިކަމުގެ ހެއްކެއް ނެތްކަމަށެވެ. ހުޅަނގުގެ ބާރުތަކުންވެސް ބުރަވެފައިވަނީ ޔޫކްރެއިނުގެ ސަރުކާރުން ޢާއްމުކޮށްފައިވާ މަޢުލޫމާތަށެވެ.
ދަ ހޭގުގައި ހުންނަ ބައިނަލްއަޤްވާމީ ޖިނާޢީ ކޯޓު، އައިސީސީންވެސްވަނީ ޔޫކްރެއިނަށް ޙަމަލާދިނުމަށް ޕުޓިން ޢަމުރުކުރެއްވުމުން އޭނާގެ މައްސަލައެއް ތަޙްޤީޤުކުރަމުންދާކަމަށް ބުނެފައެވެ.