ދަޢުލަތުން ބަލަހައްޓަމުންދާ މަރުކަޒުތަކުގައި ތިބޭ މީހުންނަށް މޯލްޑިވްސް ޕޯޓްސް ލިމިޓެޑުން އެހީގެ ތަކެތި ހަދިޔާކޮށްފިއެވެ.
އެމްޕީއެލްގެ އިޖުތިމާޢީ ޒިންމާގެ ދަށުން ހަދިޔާކުރި މި ތަކެތި ހަވާލުކޮށްފައިވަނީ ޖެންޑަރ މިނިސްޓްރީއާއެވެ.
އެމްޕީއެލްގެ އިޖުތިމާޢީ ޒިންމާގެދަށުން ޖެންޑަރ މިނިސްޓްރީޢަށް ހަދިޔާކޮށްފައިވަނީ ގޮދަޑިއާއި ބެޑްޝީޓެވެ. އެގޮތުން 127 ގޮދަޑިއާއި ބެޓްޝީޓް ވަނީ ހަދިޔަކޮށްފައެވެ. މި ތަކެތި ޖެންޑަރ މިނިސްޓްރީއާއި ހަވާލުކޮށްދެއްވީ އެމްޕީއެލްގެ ސިއީއޯ ޝާހިދު އަލީއެވެ. އަދި މިނިސްޓްރީގެ ފަރާތުން ރަމްޒީކޮށް މި ތަކެއްޗާ ހަވާލުވެވަޑައިގަތީ ސްޓޭޓް މިނިސްޓަރ ފަޒްނާ ޝާކިރުއެވެ.
މިތަކެއްޗަކީ ދަޢުލަތުގެ ބެލުމުގެ ދަށުގައި މީހުން ތިބި ފަރާތްތައް އުޅޭ މަރުކަޒުތަކަށް މިވަގުތަށް އެންމެ މުހިންމު ތަކެތިކަން ސްޓޭޓް މިނިސްޓަރ ފަޒްނާ ޝާކިރު ފާހަގަކުރެއްވިއެވެ.
ފަޒްނާ ވިދާޅުވީ ހަދިޔާކުރި ގިނަ ތަކެތި ބޭނުންކުރާނީ ގުރައިދޫގައި ހުންނަ ޚާއްސައެހީއަށް ބޭނުންވާ މީހުންގެ މަރުކަޒާއި ވިލިނގިލީގައި ހުންނަ ވަގުތީ ހިޔާގައިކަމަށެވެ.
"މަރުކަޒުގައި 198 މިހުން މިހާރުވެސް އެބަތިބި. ހަނދިޔަކުރި ގޮދަޑީގެތެރެއިން 81 ގޮދަޑި ބޭނުންކުރާނީ މަރުކަޒުގައި އަލުން މަރާމާތުކޮށް ބޭނުންކުރަން ފަށާ އާ އިމާރާތައް." ފަޒްނާ ވިދާޅުވިއެވެ.
ސްޓޭޓް މިނިސްޓަރ ވިދާޅުވީ ކުންފުނިތަކާއި ޖަމިއްޔާ އަދި އާއްމު ފަރާތްތަކުން ވެދެމުންދާ ކޮންމެ އެހީއަކީވެސް މުހިންމު، ބޮޑު އެހީއެއްކަމަށެވެ. އަދި އެކަމަށްޓަކައި ފަޒްނާ ވަނީ އެމްޕީއެލްއަށް ޝުކުރު އަދާކޮށްފައެވެ.
ސީއީއޯ ޝާހިދު އަލީ ވިދާޅުވީ ދައުލަތުން ކުރަމުންދާ މި މަސައްކަތަކީ ގޮންޖެހުންތައް ބޮޑު މަސައްކަތެއްކަމަށާއި، މިކަމުގައި އެހީވުމަށް އެމްޕީއެލްއިން ކޮށްދެވެން އޮތް މަސައްކަތެއް ކުރާނެކަމަށެވެ.
"އުއްމީދަކީ މި ހަދިޔާކުރި ތަކެތީގެ ސަބަބުން މިނިސްޓްރީއަށް ލުޔެއް ލިބުން. ބަޖެޓުގައި ކެޕޭސިޓީ ހުރި މިންވަރަކުން އެހީވާނަން." ޝާހިދު ވިދަޅުވިއެވެ.
ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒުގެ އިތުރުން، އަތޮޅުތަކުގައިވެސް އެކި މަރުކަޒުތައް ވަނީ ޤާއިމުކޮށްފައެވެ. މީގެތެރޭގައި މައިގަނޑުގޮތެއްގައި ހިމެނެނީ ކުޑަކުދިން ބައި ތިއްބާ މަރުކަޒުތަކެވެ.