ފެނަކަ އިންސްޓިޓިއުޓަކީ މީހުން ބިނާކުރުގެ މަސައްކަތަށް ލިބުނު ކުރިއެރުމެއް - ޑރ.އިބްރާޙީމް ހަސަން
ފެނަކައަކީ ރާއްޖެއަށް ސަރުކާރުން ގެންނަން ބޭނުންވާ ތަރައްޤީގެ މުހިންމު ޙިއްސާދާރެއްކަމަށާއި، ގުޅުންހުރި ދާއިރާއިން މީހުން ބިނާކުރުމަށް އެ ކުންފުނީގެ އިންސްޓިޓިއުޓުން ފެށި މަސައްކަތަކީ ލިބުނު އިތުރު ކުރިއެރުމެއްކަމަށް މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ހަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ފެނަކަ އިންސްޓިޓިއުޓްގެ ދަސްވެނީންނަށް ސެޓްފިކެޓް ހަވާލުކުރުމަށް ބޭއްވި ހަފްލާގައެވެ.
މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ހަސަން ވިދާޅުވީ ސަރުކާރުގެ އަމާޒަކީ ދޭ ތަޢުލީމާ އެއްވަރަށް، ވަޒީފާއަށް ނުކުންނައިރު ބޭނުންވާ ހުނަރާއި ޤާބިލުކަން ލިބިފައިވާ ޖީލެއް ބިނާކުރުމަށްކަމަށެވެ. އަދި މި މަސައްކަތަކީ އެކިއެކި އިދާރާތަކާއި ކުންފުނިތަކާއި ޖަމްޢިއްޔާ ޖަމާތްތަކުގެ އެހީ ލިބިގެން މެނުވީ ކުރެވޭނެ ކަމެއް ނޫންކަމަށް މިނިސްޓަރ ވިދާޅުވިއެވެ.
މީހުން ބިނާކުރުމުގެ ދާއިރާގައި ފެނަކަ އިންސްޓިޓިއުޓް ވެފައިވަނީ ވަރަށް މުހިންމު ފަރާތަކަށްކަމަށާ، ޚާއްސަކޮށް ވަޒީފާގެ މައިދާނަށް މީހުން ނެރުމަށް ބޭނުންވާ ފުރިހަމަ ޢަމަލީ ތަޖުރިބާ، މި ޓްރެއިނިންގ މަސައްކަތްތަކުގައި އެކުލެވިގެންވާ މިންވަރު މިނިސްޓަރ ފާހަގަކުރެއްވިއެވެ.
މަތީ ތަޢުލީމާއި ތަމްރީން ދިނުމުގެ މަސައްކަތް ފެށުމުގެ ފުރުޞަތު ފެނަކައަށް ދީފައިވަނީވެސް އެކުންފުންޏާއިމެދު އޮތް ޔަގީންކަމާއި އިތުބާރުގެ ސަބަބުންކަމަށް މިނިސްޓަރ ވިދާޅުވިއެވެ.
"މިހާރު މަޢުލޫމާތު ލިބެނީ ސައިންޓިފިކް ރިސަރޗެއްވެސް މި އިންސްޓިޓިއުޓުން ކުރިއަށްގެންދާކަމަށް. މިއީ ރާއްޖޭގެ ފެނާއި ނަރުދަމާ އަދި ކަރަންޓުގެ ނިޒާމަށް ހެޔޮ، ބަދަލެއް ގެންނާނެ ހޯދުމަކަށްވާނެކަމަށް އުއްމީދުކުރަން. ޚާއްސަކޮށް ރާއްޖޭގެ މާޙައުލާ ގުޅޭގޮތަށް ދެމެހެއްޓެނިވި ގޮތުގައި ޚިދުމަތް ދިނުމަށް." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ފެނަކައިގެ ޕްރޮގްރާމްތަކާއެކު، ދާއިރާގެ އެންމެ ޒަމާނީ އިންޖީނުގެތަކާއި ޒަމާނީ ވަސީލަތްތައް ތަޖުރިބާ ކުރުމުގެ ފުރުޞަތު ދަރިވަރުންނަށް ލިބިގެންދާކަމަށެވެ.
މިއާއެކު އިންޖީނުގެތައް ހިންގުމުގައި ބޭނުންވާ ޓެކްނިކަލް މީހުން ލިބުމުގެ ދަތިކަމަށް ޙައްލު އައިސް، އެތަށް މީހުންނަކަށް ވަޒީފާގެ މައިދާނުގައި ކުރިއަށްދިއުމުގެ ފުރުޞަތު ފަހިވެފައިާކަން މިނިސްޓަރ ވަނީ ފާހަގަކުރައްވާފައެވެ.
މިނިސްޓަރ ވަނީ ވަޒީފާގެ މައިދާނަށް މީހުން ބިނާކުރުމަށް ސަރުކާރުން ފަށާފައިވާ "ސްކިލް ފޮރ އަ ރެޒިލިއެންޓް ވޯކްފޯސް" ޕްރޮގްރާމުގެ ދަށުން މީހުން ތަމްރީންކުރުމުގައިވެސް ކުންފުނިތަކާއި ޖަމިއްޔާތަކުގެ އެހީއަށް އެދިވަޑައިގެންފައެވެ. ވަޒީފާގެ މައިދާނަށް ހިނަރުވެރި ދިވެހިން ނެރުމަށް މަސައްކަތްކުރުމަށް އެދިވަޑައިގެންފައެވެ.