ރަޝިޔާގެ ފައުޖުތަކުން ޔޫކްރެއިނުން ފައިބާނީ ބޭނުންވާ އަސްކަރީ ލަނޑުދަނޑިތައް ޙާޞިލްކުރެވުމުންކަމަށް ރަޝިޔާގެ ރައީސް ވުލަޑުމީރް ޕުޓިން ވިދާޅުވެއްޖެއެވެ.
ފަރަންސޭސިވިލާތުގެ ރައީސް އެމަނުއެލް މެޚްރޮންނާ ތެލެފޯނުން ވާހަކަދައްކަވަމުން ޕުޓިންވަނީ ޔޫކްރެއިނުގައި ރަޝީޔާގެ ފައުޖުތަކުން ޙާޞިލްކުރަން ބޭނުންވާ ލަނޑުދަނޑިތައް ކިޔައިދެއްވައިފައެވެ. އެ ގޮތުން ޕުޓިން ވިދާޅުވި ގޮތުގައި ރަޝީޔާގެ ފައުޖުތަކުން ޔޫކްރެއިނުން ފައިބާނީ އެ ޤައުމުގެ އަސްކަރީ ވިއުގަތަކާއި މަރުކަޒުތައް ރޫޅާލައި އަސްކަރީ ބާރުވެރިކަން ނައްތާލުމަށްފަހުކަމަށެވެ. އަދި ކޮންމެފަދަ ޙާލަތެއްގައި ނަމަވެސް ރަޝީޔާގެ ލަނޑުދަނޑިތައް ޙާޞިލްކުރާނެކަމަށާއި ޞުލްޙައިގެ ވާހަކަތައް ބޭވުމަށް ޔޫކްރެއިނުން ލަސްކުރާނަމަ ރަޝިޔާގެ ޝަރުތުތައް އިތުރުކުރާނެކަމަށްވެސް ޕުޓިން ވިދާޅުވިއެވެ.
ދޮޅު ގަޑިއިރަށް ދިގުދެމިގެންދިޔަ ވާހަކަތަކުގައި ޔޫކްރެއިނު ދޫކޮށް ދާން ބޭނުންވެފައިވާ އެހެން ޤައުމުތަކުގެ ރައްޔިތުންނަށް އެ ފުރުޞަތު ފަހިކޮށްދިނުމުގައި ޕުޓިންވަނީ މެޚްރޮންގެ ކިބައިން އެދިވަޑައިގެންފައެވެ. އޭގެ ތެރޭގައި ޔޫކްރެއިނުގެ އިރުމަތީގައި އޮންނަ ކިރްކީވުގައި ތާށިވެފައިވާ އިންޑިޔާގެ އެތައް ހާސް ދަަރިވަރުންގެ ޙާލަތު ޕުޓިންވަނީ ފާހަގަކުރައްވައިފައެވެ. މެޚްރޮންވަނީ އެ ކަމުގައި ޔޫކްރެއިނުގެ ސަރުކާރާ މަޝްވަރާކުރައްވާނެކަމަށް ވިދާޅުވެފައެވެ.
ޔޫކްރެއިނުގެ ސަރަޙައްދީ ރޮނގު ކައިރިއަށް ބަރުހަތިޔާރާއެކު އެތައް ސިފައިންނެއް ރަޝިޔާއިން ޖަމާކުރުމުން މެޚްރޮންވަނީ ރަޝިޔާގެ ވެރިރަށް މޮސްކޯއަށް ވަޑައިގެން ޕުޓިންނާ ބައްދަލުކުރައްވައި ހަނގުރާމައެއް ނުކޮށް މައްސަލަ ޙައްލުކުރެއްވުމަށް ބާރުއަޅުއްވައިފައެވެ. ޔޫކްރެއިނަށް ރަޝިޔާއިން ޙަމަލާދީފައިވަނީ އޭގެ ދެ ހަފުތާފަހުންނެވެ.