ޔޫކްރެއިނުގައި ހިންގަމުންދާ އަސްކަރީ ޙަރަކާތްތަކުގައި ފާއިތުވި ހަތް ދުވަހުގެ ތެރޭގައި ރަޝިޔާގެ 498 ސިފައިން މަރުވެ 1،597 ސިފައިން ޒަޚަމުވެފައިވާކަމަށް އެ ޤައުމުގެ ދިފާޢީ ވުޒާރާއިން ބުނެފިއެވެ. އެއީ ރަޝިޔާގެ ފައުޖުތަކަށް ލިބުނު ގެއްލުންތައް އެ ވުޒާރާއިން ޢާއްމުކުރި ފުރަތަމަ ފަހަރެވެ.
ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން އެ ޤައުމަށް ދެމުންދާ ޙަމަލާތަކުގައި 60،000އަށްވުރެ ރަޝިޔާ ސިފައިން ބަރުހަތިޔާރާއެކު ޙަރަކާތްތެރިވެއެވެ. އެއީ ޔޫކްރެއިނުގެ ސަރަޙައްދީ ރޮނގު ކައިރިއަށް ޖަމާކޮށްފައިވާ ސިފައިންގެ ތެރެއިން އެންމެ %30އެވެ. ތިން ސަރަޙައްދަކުން ޔޫކްރެއިނަށް ޙަމަލާދެމުންދާ ރަޝިޔާގެ ފައުޖުތަކާއެކު ޗެޗުނިޔާގެ އެތައް ހާސް މުސްލިމު ހަނގުރާމަވެރިންނެއްވެސް ޙަރަކާތްތެރިވެއެވެ. އަދި ދެ ހަނގުރާމަވެރިއަކު މަރުވެ އިތުރު ހަ ހަނގުރާމަވެރިން ޒަޚަމުވެފައިވާކަމަށް ޗެޗުނިޔާގެ ސަރަޙައްދީ ސަރުކާރުން ބުނެފައިވެއެވެ.
ޔޫކްރެއިނުގެ ދިފާޢީ ވުޒާރާއިން ބުނެފައިވާ ގޮތުގައި ފާއިތުވި ހަތް ދުވަހުގެ ތެރޭގައި ރަޝިޔާގެ 7،000އަށްވުރެ ގިނަ ސިފައިންވަނީ މަރުވެފައެވެ. ހަނގުރާމައިގައި ޔޫކްރެއިނުގެ ފައުޖުތަކަށް ލިބިފައިވާ ގެއްލުމެއް އެ ވުޒާރާއިން ބުނެފައެއް ނުވެއެވެ. ނަމަވެސް ޢާއްމުންގެ 352 މީހުން މަރުވެ 1،684 މީހުން ޒަޚަމުވެފައިވާކަމަށް އެ ވުޒާރާއިން ބުނެފައިވެއެވެ. އދން ބުނެފައިވަނީ ޔޫކްރެއިނުގައި ކުރަމުންދާ ހަނގުރާމައިގައި މަރުވެފައިވަނީ ޢާއްމުންގެ 227 މީހުންކަމަށެވެ. އަދި ޒަޚަމުވެފައިވަނީ 525 މީހުންކަމަށްވެސް އެ ވުޒާރާއިން ބުނެފައިވެއެވެ.
އދގެ ރެފިޔުޖީންނާބެހޭ އިދާރާއިން ބުނެފައިވާ ގޮތުގައި ފާއިތުވި ހަތް ދުވަހުގެ ތެރޭގައި މިލިޔަނެއްހާ މީހުންވަނީ ޔޫކްރެއިނު ދޫކޮށް އަވަށްޓެރި ޤައުމުތަކަށް ހިޖުރަކޮށްފައެވެ. އޭގެ ތެރެއިން 505,582 މީހުން ހިޖުރަކޮށްފައިވަނީ ޕޯލޭންޑަށްށެވެ. އަދި ހަންގޭރީއާއި މޮލްޑޯވާއާއި ސުލޮވޭކިޔާއަށާއި ރޮމޭނިޔާއަށާއި ރަޝިޔާއަށާއި ބެލަރޫސަށްވެސް ގިނަ ޢަދަދެއްގެ މީހުންވަނީ ހިޖުރަކޮށްފައެވެ.