ޖަރުމަނު މާކެޓުގައި ރާއްޖޭ އިޝްތިހާރުކުރުމަށް އެޤައުމުގެ ނަން މަޝްހޫރު ޓުއަރ އެޕަރޭޓަރ އެފް.ޓީ.އައި އާއި ގުޅިގެން އެމްއެމްޕީއާރުސީން ކެމްޕެއިނެއް ފަށައިފިއެވެ. 1 މަސް ދުވަހަށް ކުރިޔަށް ގެންދާ މި ކެމްޕެއިނުގެ މަގްސަދަކީ ރައްކާތެރި މަންޒިލެއްގެ ގޮތުގައި ރާއްޖެ އިޝްތިހާރުކޮށް ޖަރުމަނުން ރާއްޖެ އަންނަ ފަތުރުވެރިންގެ އަދަދު އިތުރުކުރުމެވެ.
35 އަހަރުގެ ތަޖުރިބާއާއެކު އެފް.ޓީ.އައީ އަކީ ޖަރުމަނު މާކެޓުގައި ހަރަކާތްތެރިވާ އެންމެ މަގުބޫލު އެއް ޓުއައ އޮޕަރޭޓަރެވެ. މި ކުންފުންޏަކީ 120 އަށް ވުރެއިން ގިނަ މަންޒިލަށް ޗުއްޓީ ދަތުރުތައް ވިއްކާ ކުންފުންޏެކެވެ. އެފް.ޓީ.އައި އާ ގުޅިގެން ކުރިއަށްދާ މި ކެމްޕެއިނުގެ ތެރެއިން ޖަރުމަނު މާކެޓްގައި ރާއްޖޭގެ ރީތި ނަން ދަމަހައްޓާ, އަދި ރާއްޖޭގެ ފަތުރުވެރިކަމުގެ އުފެއްދުންތަކާއި ހާއްސަ ތަޖުރިބާތައް އިޝްތިހާރުކުރާނެއެވެ.
" މި ކެމްޕެއިނުގެ ދަށުން މީހުންގެ ލޮލުގައި އަޅައިގަންނަ ފަދަ ރީތި މަންޒަރުތައް ދައްކައިދޭ ދިވެހިރާއްޖޭގެ އިޝްތިހާރުތަކާއި، ރާއްޖޭގެ ފަތުރުވެރިކަމުގެ ޕްރޮޑަކްޓްތައް އެފް.ޓީ.އައި ގެ ވެބްސައިޓް އަދި ނިއުސްލެޓާގެ ޒަރިއްޔާއިން ކަސްޓަމަރުންނާ ހިއްސާކުރެވިގެންދާނެ" އެމްއެމްޕީއާރުސީން ބުނެއެވެ.
ޖަރުމަނަކީ މިިދޔަ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި 10 މާކެޓްގެ ތެރެއިން އެއް މާކެޓެވެ. މިދިޔަ އަހަރު ޖަރުމަނުން ރާއްޖެއަށް 94،784 ފަތުރުވެރިން އައިސްފައިވެއެވެ. މިއީ އެ މުއްދަތުގެ ޖުމްލަ ރާއްޖެ އައި ފަތުރުވެރިންގެ 7.3 އިންސައްތައެވެ.
ޖަރުމަނު މާކެޓުގައި ރާއްޖޭގެ މަޤުބޫލުކަން ދެމެހެއްޓުމަށް އެމްއެމްޕީއާރުސީން މިދިޔަ އަހަރު ވަނީ ކޮންޑޯ, ޓްރެވެލް އިމްޕްރެޝަންސް، ޓީ.އޫ.އައި ވިތް ޖަރުމަނީ އެންޑް އޮސްޓްރިޔާ އާ ގުޅިގެން ގިނަ ހަރަކާތްތަކެއް ހިންގާފައެވެ. މީގެ އިތުރުން އިމޭޖިން މެގަޒިން, މަންޓާ ރެއިޒެން, ކޮނޮސެޔާ ސާކަލް, އަދި ލެޓްސް ގޯ ގައިވެސް ބައެއް ހަރަކާތްތައް ކުރިއަށް ގެންދިޔައެވެ. އެމްއެމްޕީއާރުސީން ވަނީ އައިޓީބީ ބާލިން 2021 ގެ ވާޗުއަލް އެޑިޝަންގައި ވެސް ބައިވެރިވެފައެވެ.
ޖަރުމަނު މާކެޓުގައި ރާއްޖޭގެ މަޤުބޫލުކަން ދެމެހެއްޓުމަށް އެމްއެމްޕީއާރުސީން މިއަހަރުވެސް ގިނަ ހަރަކާތްތަކެއް ކުރިއަށް ގެންދިއުމަށް ވަނީ ރޭވިފައެވެ. މި އަހަރު މިހާތަނަށް ޖަރުމަނުން 18،777 ފަތުރުވެރިންވަނީ ރާއްޖެއަށް ޒިޔާރަތްކޮށްފައެވެ.
ރާއްޖެ ދުނިޔޭގެ ފެންވަރުގައި އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ.