ޔޫކްރެއިނުގެ ދެކުނުގެ މުޙިއްމު ސަރަޙައްދުތައް ރަޝިޔާގެ ބާރުގެ ދަށަށް ގެންގޮސްފިއެވެ.
ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ދެމުންދާ ޙަމަލާތަކުގައި ރަޝިޔާގެ ފައުޖުތައްވަނީ ތިން ސަރަޙައްދަކުން އެ ޤައުމަށް އަރައިފައެވެ. އެ ގޮތުން ޔޫކްރެއިނުގެ ދެކުނުއިރުމަތީގައި އޮންނަ އަމިއްލައަށް މިނިވަންކަން އިޢުލާންކޮށްފައިވާ ދޮންބާސްގެ ސަރަޙައްދުންނާއި 2014ވަނަ އަހަރުގެ ތެރޭގައި ރަަޝިޔާގެ ބާރުގެ ދަށަށް ގެނެސްފައިވާ ޔޫކްރެއިނުގެ މުޙިއްމު ސަރަޙައްދެއްކަމަށްވާ ކުރިމިޔާގެ ސަރަހައްދުތަކުން ރަޝިޔާގެ ވަރުގަދަ ލަޝްކަރުތައްވަނީ ޔޫކްރެއިނަށް ވަދެގަނެފައެވެ.
ރަޝިޔާގެ ދިފާޢީ ވުޒާރާއިން ބުނެފައިވަނީ ދޮންބާސުންނާއި ކުރިމިޔާއިން ޙަމަލާ ދެމުންދާ ލަޝްކަރުތައް ޔޫކްރެއިނުގެ ދެކުނުގެ ސަރަޙައްދުތަކުގައި ގުޅިފައިވާކަމަށާއި އަޒޯވުގެ ގޮނޑުދޮށް ސަރަޙައްދު އޮތީ ރަޝިޔާގެ އަސްކަރިއްޔާގެ ބާރުގެ ދަށުގައިކަމަށެވެ. އަދި ކުރިއަރަމުންދާ ރަޝިޔާގެ ލަޝްކަރުތަކުގެ ބާރުގެ ދަށަށް ޔޫކްރެއިނުގެ ދެކުނުގެ އެންމެ މުޙިއްމު ރަށްކަމަށްވާ ޚާރްސަން ގެނެސްފައިވާކަމަށްވެސް އެ ވުޒާރާއިންވަނީ ބުނެފައެވެ. ޚާރްސަންނަކީ ޔޫކްރެއިނުގެ އެހެން ސަރަޙައްދުތަކާއި ކަޅު ކަނޑު ގުޅުވައިދޭ މުޙިއްމު ރަށެކެވެ. އަދި ޚާރްސަންނަށް ބޮޑެތި ގެއްލުންތަކެއް ލިބިފައިނުވާކަމަށާއި އެ ރަށަށް ބޭނުންވާ ޒަރޫރީ ހުރިހާ ތަކެއްޗެއް ލިބެންހުރިކަމަށްވެސް އެ ވުޒާރާއިން ބުނެއެވެ. ޚާރްސަންގެ ކަންކަން އެންމެ ފުރިހަމައަށް ބެލެހެއްޓޭނެ ގޮތަކާމެދު އެ ރަށުގެ އިސްވެރިންނާ ރަޝިޔާގެ ފައުޖުތަކުންވަނީ މަޝްވަރާކޮށްފައެވެ.
ރަޝިޔާގެ ދިފާޢީ ވުޒާރާއިން ބުނެފައިވަނީ ޔޫކްރެއިނުގެ ދެކުނުގެ ސަރަޙައްދުތައް ރަޝިޔާގެ އަސްކަރިއްޔާގެ ބާރުގެ ދަށަށް ގެނައުމަށް ދިން ޙަމަލާތަކުގައި އެ ސަރަހައްދުގެ 60އަށްވުރެ އަސްކަރީ މަޤާމު ނައްތާލައިފައިވާކަމަށެވެ. އެއާއެކު ފާއިތުވި ހަފުތާގެ ތެރޭގައި ރަޝިޔާއިން ދެމުންދާ ޙަމަލާތަކުގައި ނައްތާލާފައިވާ ޔޫކްރެއިނުގެ އަސްކަރީ މަޤާމުތަކުގެ ޢަދަދު 1،500އަށްވުރެވަނީ އިތުރުވެފައެވެ.
ޔޫކްރެއިނުގެ ދެކުނުގެ ސަރަޙައްދުތަކުގެ އިތުރުން އެ ޤައުމުގެ އިރުމަތީގައި އޮންނަ އެންމެ މުޙިއްމު ރަށްކަމަށްވާ ކަރްކީވަށްވެސް ރަޝިޔާގެ ފައުޖުތަކުންވަނީ ވަރުގަދަ ޙަމަލާތަކެއް ދީފައެވެ. ރަޝިޔާގެ ޙަމަލާތަކުގައި ކަރްކީވަށްވަނީ ބޮޑެތި ގެއްލުންތަކެއް ލިބިފައެވެ. ޔޫކްރެއިނުގެ ދިފާޢީ ވުޒާރާއިން ބުނެފައިވާ ގޮތުގައި ކަރްކީވަށް ދެމުންދާ މިސައިލާއި ރޮކެޓު ޙަމަލާތަކުގައި ފާއިތުވި 24 ގަޑިއިރުގެ ތެރޭގައި 21 މީހުން މަރުވެ 112 މީހުންވަނީ ޒަޚަމުވެފައެވެ. އަދި އެ ރަށުގެ އެކި ސަރަޙައްދުތަކަށް ވައިކުޑާގައި ރަޝިޔާގެ ސިފައިން ފައިބާފައިވާކަމަށްވެސް އެ ވުޒާރާއިން ބުނެފައިވެއެވެ. ރަޝިޔާ ބަހުން ވާހަކަދައްކައި ރަޝިޔާއާ ގާތްގުޅުންތަކެއް އޮންނަ ބޮޑު އާބާދީއެއް 1.4 މިލިޔަން މީހުން ދިރިއުޅޭ ކަރްކީވުގައި އޮވެއެވެ.
ޔޫކްރެއިނުގެ ދެކުނާއި އިރުމަތީގެ ސަރަޙައްދުތަކުގައި ރަޝިޔާގެ ފައުޖުތަކުން އެދެވޭ ކުރިއެރުންތަކެއް ހޯދި ނަމަވެސް ރަޝިޔާގެ އަސްކަރިއްޔާއިން އެންމެ ބޮޑު އިސްކަމެއް ދެމުންދަނީ ޔޫކްރެއިނުގެ ވެރިރަށް ކިޔޭވު ހިފުމަށެވެ. އެ ގޮތުން އެ ޔޫކްރެއިނުގެ ވެރިރަށާ ދިމާލަށް އިތުރު ސިފައިންނާ ބަރުހަތިޔާރު ރަޝިޔާއިންވަނީ ފޮނުވައިފައެވެ. އަދި އެ ފައުޖުތަކާ އަވަށްޓެރި ބެލަރޫސްގެ ލަޝްކަރުތައް ގުޅިގެން ކިޔޭވަށް ވަރުގަދަ ޙަމަލާއެއް ދޭންއުޅޭކަމަށް ޔޫކްރެއިނުގެ ދިފާޢީ ވުޒާރާއިން ބުނެފައިވެއެވެ.