ރަޝިޔާއާ ދެކޮޅަށް ހަނގުރާމަކުރުމަށް ޔޫކްރެއިނަށް އަންނަން ބޭނުންވާ މީހުންނަށް ވިސާއަކާ ނުލައި އެ ޤައުމަށް އެތެރެވެވޭނެ ގޮތް ހަމަޖައްސައިފިއެވެ.
ފެބްރުއަރީ މަހުގެ 24ވަނަ ދުވަހު ކަނޑުމަގުންނާއި ވައިގެމަގުންނާއި އެއްގަމުން ރަޝިޔާގެ ފައުޖުތައް ޙަމަލާ ދޭން ފެށުމުން ޔޫކްރެއިނުގެ ރައީސް ވޮލޮޑީމީރް ޒެލެންސްކީވަނީ ޢާއްމުންގެ އެތައް ހާސް މީހުންނަށް ހަތިޔާރު ބަހައި ރަޝިޔާގެ ފައުޖުތަކާ ކުރިމަތިލުމަށް ބާރުއަޅުއްވައިފައެވެ. އޭގެ އިތުރުން ޒެލެންސްކީވަނީ އެހެން ޤައުމުތަކުގެ މީހުންނަށްވެސް އެ ފުރުޞަތު އޮތްކަމަށް ވިދާޅުވެ ހަނގުރާމައަށް އަންނަ މީހުންނަށް ވިސާއަކާ ނުލައި އެ ޤައުމަށް އެތެރެވުމުގެ ޙުއްދަ ދެއްވައި ޤަރާރެއްގައި ސޮއިކުރައްވައިފައެވެ. އެ ޤަރާރުގައިވާ ގޮތުން ރަޝިޔާގެ ރައްޔިތުން ފިޔަވައި އެހެން ކޮންމެ ޤައުމެއްގެ މީހަކަށްވެސް ހަނގުރާމައަށް ޔޫކްރެއިނަށް ދެވޭނެއެވެ.
ރަޝިޔާއިން ދެމުންދާ ޙަމަލާތަކަކީ ވިލާތާ ދެކޮޅަށް ކުރަމުންދާ ހަނގުރާމައެއްކަމަށް ވިދާޅުވެ ޒެލެންސްކީވަނީ ޔޫކްރެއިނުގެ ދިފާޢުގައި ހަނގުރާމައަށް އަންނަ މީހުންނަށް ޚާއްޞަ ފައުޖެއްކަމަށްވާ އިންޓަނޭޝަނަލް ލީޖަން އޮފް ޓެރިޓޯރިޔަލް ޑިފެންސް އޮފް ޔޫކްރެއިނު އުފައްދަވައިފައެވެ. އަދި ޔޫކްރެއިނުގެ ރައްޔިތުންނާއެކު ހަނގުރާމަކުރުމަށް ދުނިޔޭގެ ކޮންމެ ސަރަޙައްދަކުން އަންނަ ކޮންމެ މީހަކަށްވެސް އެ ޤައުމުން މަރްޙަބާކިޔާނެކަމަށް އޭނާވަނީ ވިދާޅުވެފައެވެ.
ޔޫކްރެއިނުގެ ސަރަޙައްދީ ރޮނގު ކައިރިއަށް ބަރުހަތިޔާރާއެކު ރަޝިޔާއިން 200،000 ސިފައިން ޖަމާކުރި ނަމަވެސް އެ ޤައުމަށް ޙަމަލާ ދިނުމުގައި ބައިވެރިވަމުންދަނީ އޭގެ ތިންބައިކުޅަ އެއްބައެވެ. އެހެންކަމުން ޢާއްމުން ހަތިޔާރު ނަގަައި ބޮޑު ކުރިމަތިލުމަކަށް ތައްޔާރުވުމުން ހަނގުރާމާގައި އުއްމީދުކުރިވަރުގެ ކުރިއެރުމެއް ހޯދުމަށް ރަޝިޔާއަށްވަނީ އުނދަގޫވެފައެވެ.