އިންގްލިޝް ޕްރިމިއަރ ލީގުގެ އާސެނަލްއަށް މިދިޔަ ސީޒަންގައި މާލީ ގޮތުން ބޮޑު ގެއްލުމެއް ލިބިފައިވާކަމަށް އެކްލަބުން ހާމަކޮށްފިއެވެ. މިގޮތުން މިދިޔަ ސީޒަންގައި 107 ޕޮއިންޓް ތިނެއް މިލިއަން ޕައުންޑްގެ ގެއްލުން ލިބިފައިވާކަމަށް އާސެނަލްއިން ހާމަކުރެއެވެ.
އޭގެ ކުރީގެ ސީޒަންގައި 50 މިލިއަން ޕައުންޑްގެ ގެއްލުން ލިބިފައިވާކަން އިޢުލާން ކޮށްފައިވަނިކޮށް މިދިޔަ ސީޒަންގައި ލިބުނު ގެއްލުން ވެފައިވަނީ މިހާތަނަށް އެކްލަބަށް ލިބިގެންދިޔަ އެންމެ ބޮޑު ގެއްލުމަށެވެ. އަދި މިލިބުނު ގެއްލުމުގެ ތެރެއިން 85 މިލިއަން ޕައުންޑަކީ ކޯވިޑް-19ގެ ސަބަބުން ލިބުނު ގެއްލުމެކެވެ.
މިދިޔަ ސީޒަންގައި އަމިއްލަ ދަނޑުގައި ކުޅިބެލުންތެރިން ކުރިމަތީގައި އާސެނަލްއަށް ކުޅެވިފައިވަނީ އެންމެ ދެމެޗެވެ. އެހެންކަމުން މެޗް އޮންނަ ދުވަހު ލިބޭ އާމްދަނީ ވަނީ 75 މިލިއަން ޕައުންޑުން 3.8 މިލިއަން ޕައުންޑަށް ކުޑަވެގެން ގޮސްފައެވެ. އަދި ކުޅުންތެރިންގެ މުސާރަ މިދިޔަ ސީޒަންގައި އުޅުނީ 244 މިލިއަން ޕައުންޑުގައެވެ. މިއީ 2020 ވަނަ އަހަރަށް ވުރެ 10 މިލިއަން އިތުރު އަދަދެކެވެ. މިވަރުގައިވެސް ހިފެހެއްޓުނީ ޓީމާއި ކޯޗުން 12.5 އިން ސައްތައިގެ ޕޭ ކަޓަކަށް އެއްބަސްވުމުންނެވެ.