މިފްކޯގެ މަހުގެ އުފެއްދުންތަކުގެ އަގުތައް ބޮޑުކުރަން ނިންމާފައިނުވާކަމަށް އެކުންފުނީގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
މިފްކޯއިން މަސްވެރިންގެ އަތުން ގަންނަ މަހުގެ އަގު ބޮޑުކުރުމާއެކު އެކުންފުނީގެ މަހުގެ އުފެއްދުންތައް ވިއްކާ އަގު ބޮޑުކުރަން ނިންމާފައިވާ ކަމަށް ބުނެ، ބައެއް ނޫސްތަކުން ވަނީ ރިޕޯޓުކޮށްފައެވެ. އެހެންނަމަވެސް މިފްކޯއިން ވަނީ ރޯދަމަހުގެ ޕްރޮމޯޝަނާއެކު މިފްކޯގެ އުފެއްދުންތަކުގެ އަގު އެއްވަރެއްގައި ހިފެހެއްޓުމަށް ނިންމާފައެވެ.
މިފްކޯގެ ސީއީއޯ އިސްމާއުލް ފައުޒީ ވިދާޅުވީ، މަސް ދަޅު އުފެއްދުމަށް ބޭނުންވާ ސާމާނުގެ އަގު ވަރަށް ބޮޑަށް އިތުރުވެފައިވާ ކަމަށެވެ. އެހެންކަމުން ރޯދަމަހަށް ފަހު އަގުތަކެއް ބަދަލުތަކެއް ގެނައުމުގެ ވިސްނުން އެބަހުރި ކަމަށެވެ.
" މަސް ގަންނަ އަގާއި، އަދި ރާއްޖެއިން ބޭރުން އިމްޕޯޓުކުރާ ޕެކިންގ މެޓީރިއަލް އާއި ދަޅަށް އަޅާ ތެލާއި، ހުރިހާ އެއްޗެއްވެސް ބޮޑުވަމުން އަންނަނީ، ރާއްޖެއިން ބޭރުން ގެންނަ ފްރައިޓްވެސް ބޮޑުވެފައިވަނީ، އުއްމީދަނީ ރަމަޟާންމަސް ނިމުނީމަ އަގަށް ރިވިޝަނެއް ގެންނަން، އެހެން ނަމަވެސް ރަމަޟާން މަހު އަގަށް ބަދަލެއް ނާންނާނެ،" އިސްމާއިލް ވިދާޅުވިއެވެ.
މިފްކޯއިން ވިދާޅުވީ އެހެން އަހަރުތަކެކޭ އެއްފަދައިން މިފްކޯގެ އުފެއްދުންތައް ހުސްނުވެ މިފްކޯގެ ފިހާރަތަކުން ލިބެން ހުންނާނެކަމަށެވެ.
މިފްކޯއިން ވަނީ ރޯދަމަހާއި ދިމާކޮށް ޙާއްސަ ޕްރޮމޯޝަނެއް ފަށާފައެވެ. މިޕްރޮމޯޝަންގައި 200 ރުފިޔާއިން މަތިން ކުރެވޭ ކޮންމެ ވިޔަފާރިއަކަށް ކޫޕަނެއް ލިބެއެވެ. މި ކޫޕަންގައިވާ ކިއުއާރް ކޯޑް ސްކޭން ކުރުމުން ލިބޭ ލިންކުގައި ކޫޕަން ކޯޑް ޖަހާލުމުން ޕްރޮމޯޝަންގައި ބައިވެރިވެވޭނެއެވެ. މިގޮތުން ކޮންމެ ހަފްތާއަކު ނެގޭ ގުރުއަތުން 5000 ރުފިޔާގެ ބީއެމް އެލް ގިފްޓް ވައުޗަރ އެއް ލިބެއެވެ. އަދި މި ޕްރޮމޯޝަންގެ ބޮޑު އިނާމެއްގެ ގޮތުން ޕްރޮމޯޝަންގައި ބައިވެރިވި ހުރިހާ ކަސްޓަމަރުންގެ މެދުގައި ނެގޭ ގުރުއަތުން ހޮވޭ ނަސީބުވެރި އެއް ފަރާތަކަށް އެއްލައްކަ ރުފިޔާ ދިނުމަށް ވަނީ ހަމަޖެހިފައެވެ.