ޔޫކްރެއިންގައި މިވަގުތު ތިބި ދިވެހިންނަށް ފައިސާގެ އެހީތެރިކަން ފޯރުކޮށްދިނުމަށް ދިވެހި ސަރުކާރުން ނިންމަވައިފިއެވެ.
ފޮރިން މިނިސްޓްރީން ވިދާޅުވީ މިހާރުވެސް ޔޫކްރެއިންގައި ތިބި ދިވެހިންނަށް އެހީތެރިވުމަށް މަސައްކަތް ކުރަމުން އަންނަކަމަށެވެ. އެގޮތުން ޔޫކްރެއިންގައި އަސާސީ ތަކެތީގެ އަގުބޮޑުވަމުންދާތީ، އެޤައުމުގައި މިހާރު ތިބި ދިވެހިންނަށް ފައިސާގެ އެހީ ފޯރުކޮށްދިނުމަށް ނިންމާފައިވާކަމަށް ފޮރިން މިނިސްޓްރީން ވިދާޅުވެއެވެ.
ފޮރިން މިނިސްޓްރީން ވިދާޅުވީ ޔޫކްރައިންގެ ވެރިރަށް ކިއޭވުއާ ކައިރި ސަރަޙައްދުގައި ދިރިއުޅެމުން އަންނަ 3 އާއިލާއަކުން އެޤައުމުގެ ހުޅަނގު ބޯޑަރ ސަރަޙައްދަށް ދިޔުމަށް އަމިއްލައަށް އިންތިޒާމްތައް ހަމަޖައްސާފައިވާކަމަށެވެ. އަދި އެ ޤައުމުގައި ބާކީ ތިބި ދިވެހި ދަރިވަރުންގެ ހާލަތު ގާތުން ބަލަމުން އަންނަކަމަށް ފޮރިން މިނިސްޓްރީން ވިދާޅުވެއެވެ.
ފޮރިން މިނިސްޓްރީން ވިދާޅުވީ ބެލަރުސްގައި ތިބި ދިވެހި ދަރިވަރުންގެ ތެރެއިން އެނބުރި ރާއްޖެއަށް އަންނަން ބޭނުންވާ ދަރިވަރުންނަށްވެސް ފައިސާގެ އެހީތެރިކަން ފޯރުކޮށްދިނުމަށް ނިންމާފައިވާކަމަށެވެ. ބެލަރުސްގައި އިތުރު ނުރައްކާތެރިކަމެއް ނެތްކަމަށް ބެލެވޭތީ ޔުނިވަރސިޓީގެ ކްލާސްތައްވެސް އާދައިގެމަތިން ކުރިއަށްގެންދިޔުމަށް ވަނީ ނިންމާފައެވެ.
ޔުކްރެއިންގެ އިވަނޯ-ފްރެންކިވްސްކްގައި ތިބި ދިވެހިންގެ ތެރެއިން ހަންގޭރީއަށް ގެންދިޔަ 15 ދިވެހިން މިހާރު ވަނީ މާލެ އައިސްފައެވެ. ޔޫކްރެއިންގެ އިތުރުން އެ ސަރަހައްދުގެ އެހެން ޤައުމުތަކުގައި ތިބި ދިވެހިންގެ މަޢުލޫމާތު އެއްކޮށް، އެމީހުންނަށްވެސް ބޭނުންވާ އެހީތެރިކަންފޯރުކޮށްދީ އެމީހުންގެ ހާލަތުވެސް އަންނަނީ ބަލަމުންނެވެ. މިގޮތުން މިހާތަނަށް ލިބިފައިވާ މަޢުލޫމާތުތަކަށް ބަލާއިރު، ރަޝިޔާގައި 88 ދަރިވަރުން، ބެލަރޫސްގައި 137 ދަރިވަރުން އެބަތިބިކަމަށް ފޮރިން މިނިސްޓްރީން ވިދާޅުވެއެވެ.