"މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް"އިން ތަމްރީން ފެށުމަށް ވަނީ ތައްޔާރުވެފައި: އިމްރާން

ލާމަރުކަޒީ ނިޒާމަށް ބޭނުންވާ އިދާރީ ފަންނީ ޤާބިލުކަން އިތުރު ކުރުމަށްޓަކައި، މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސްގެ ނަމުުގައި ތަމްރީންދޭ މަރުކަޒެއް ރަޖިސްޓްރީކޮށް އެކަމުގެ މަސައްކަތްތައް ފަށައިގެން ކުރިއަށްދާ ކަމަށް ހޯމް މިނިސްޓަރ އަދި ލޯކަލް ގަވަރމަންޓް އޮތޯރިޓީގެ ބޯޑުގެ ރައީސް އިމްރާން ޢަބްދުﷲ ވިދާޅުވެއްޖެއެވެ. މިނިސްޓަރ މިހެން ވިދާޅުވީ ލާމަރުކަޒީ ދުވަަހުގެ މުނާސަބަތުގައި ދެއްވި ޚިތާބުގައެވެ.

މިނިސްޓަރ އިމްރާން ވިދާޅުވީ، ކައުންސިލްތަކަކީ ލާމަރުކަޒީ ޤާނޫނުގެ ތެރެއިން، ފަންނީ އަދި އިދާރީ ޤާބިލުކަމާއެކު ހިންގާ ކައުންސިލްތަކަކަށް ހެދުމަށް ލޯކަލް ގަވަރމަންޓް އޮތޯރިޓީން ގިނަގުނަ މަސައްކަތްތަކެއް ފަށާފައިވާކަމަށެވެ. އެގޮތުން މި ދާއިރާގެ ފަރާތްތަކަށް ބޭނުންވާ ތަމްރީން ދޭނެ އިންތިޒާމް ހަމަޖެއްސުމަކީި ދިވެހިރާއްޖޭގެ އިދާރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން ލޯކަލް ގަވަރމަންޓް އޮތޯރިޓީއަށް މަތިކޮށްފައިވާ ޒިންމާއެކެވެ.

މިނިސްޓަރ އިމްރާން ވިދާޅުވީ އެޒިންމާ އަދާކުރުމަށް މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސްގެ ނަމުގައި ތަމްރީނުދޭ މަރުކަޒެއް ރަޖިސްޓްރީކޮށްފައިވާކަމަށެވެ.

"މަރުކަޒުވަނީ ރަޖިސްޓްރީކުރެވިފައި. އަދި އެ މަރުކަޒުން ފޯރުކޮށްދޭނެ ތަމްރީނުތަކުގެ ކަރިކިއުލަމް ތައްޔާރުކުރެވި، ދިވެހިރާއްޖެއާއި ބައިނަލްއަޤުވާމީ ތަމްރީނުދޭ މަރުކަޒުތަކާ ގުޅިގެން، ލާމަރުކަޒީ ނިޒާމަށް ބޭނުންވާ މީހުން ތަމްރީނުކުރުމަށް ވާންޖެހޭ ތައްޔާރީތައް ދަނީ ވަމުން." މިނިސްޓަރ އިމްރާން ވިދާޅުވިއެވެ.

ކައުންސިލްތައް ޑިޖިޓަލައިޒްކޮށް ކައުންސިލްތަކުގެ ޚިދުމަތް ފަސޭހައިން ލިއްބައިދިނުމަށްޓަކައި "މައި ކައުންސިލް"ގެ ނަމުގައި މޯބައިލް އެޕެއް ތައްޔާރުކުރުމުގެ މަސައްކަތްވެސް ކުރައްވަމުންދާ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ކައުންސިލްތަކުން ތައްޔާރުކުރާ 5 އަހަރުގެ ތަރައްޤީގެ ޕްލޭނާއި އެކަންކަމަށް ޚަރަދުކުރުމުގެ ޕްލޭންތަކަކީ މިހާރު ރަށުގެ ރައްޔިތުންނާއި މުއައްސަސާތަކާއި ރަށުގެ މަދަނީ ޖަމިއްޔާތަކުގެ ހިއްސާ ފުރިހަމައަށް އޮވެގެން އެކުލަވާލާ ޕްލޭނެއްކަމަށެވެ.

ނަމަވެސް މިފަދަ ބައެއް ޕްލޭންތައް އެކުލަވާލުމުގައި ކައުންސިލްތަކަށް ބައެއް ދަތިތައް ހުރުމާއެކު، އެކަމުގައިވެސް ބޭނުންވާ އެހީތެރިކަން އެލްޖީއޭގެ ފަރާތުން ކައުންސިލްތަކަށް ފޯރުކޮށްދެމުންދާކަމަށެވެ. ޚާއްސަކޮށް ރަށްރަށުގެ ބިންތައް ބޭނުންކުރުމުގެ ޕްލޭން އެކުލަވާލުމުގެ މަސައްކަތް އެއްވެސް ވަރަކަށް ކުރިއަށްނުގެންދާ ކައުންސިލްތައް ހުރުމާއެކު، އެކަމުގައި އެކައުންސިލްތަކަށް އެހީދެމުންދާކަމަށެވެ.

"ބިންތައް ތަޞައްރަފުކުރުމުގެ ކުރިން ކައުންސިލްތަކުން ތައްޔާރުކުރަންޖެހޭ ބިނާވެށި ޕްލޭންތައް އެއްވެސް ވަރަކަށް ތައްޔާރުކުރެވިފައިނުވާ 43 ރަށެއް އެބައޮތް. އެމަސައްކަތް ރަށްރަށުގެ ކައުންސިލްތަކާ ގުޅިގެން، ލޯކަލް ގަވަރމަންޓް އޮތޯރިޓީގެ މާލީ އެހީތެރިކަމާއެކު، ދަނީ ކުރެވެމުން. މިގޮތުން ތައްޔާރުކުރެވޭ ބިނާވެށި ޕްލޭންތަކާއެކު، އެ ރަށްރަށުގެ ބިންތައް ޒޯނުކުރެވި، ޤާނޫނާ އެއްގޮތަށް ބިންތައް ތަޞައްރަފުކުރުމުގެ މިނިވަންކަން ކައުންސިލްތަކަށް ލިބިގެންދާނެ." މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ލާމަރުކަޒީ ޤާނޫނުން ފަހިކޮށްދިން އެންމެ މުހިންމުކަމަކީ، ރަށުގައި ދިރިއުޅޭ އަންހެނުންގެ ހިއްސާ ރަށުގެ ހިންގުމުގެ ނިޒާމުގައި ބައިވެރިކުރުން ޤާނޫނުން ލާޒިމުކުރުންކަމަށެވެ. ފާއިތުވި ކައުންސިލްގެ ދަޢުރުގައި ރަށްރަށާއި އަތޮޅު ކައުންސިލްތައް ހިމެނޭހެން ކައުންސިލަރުންގެ ގޮތުގައި ތިބީ 39 އަންހެނުން ނަމަވެސް، ޤާނޫނުން ފަހިކޮށްދިން ފުރުޞަތާއެކު މި އަދަދު 388އަށް އިތުރުވެފައިވާކަން މިނިސްޓަރ ފާހަގަކުރެއްވިއެވެ. އަދި އަންހެނުންގެ ކޮމިޓީތަކުގެ އިންތިޚާބަކީވެސް ރަށުގެ މުޅި ރައްޔިތުން ވޯޓު ދީގެން ހޮވާ ކޮމިޓީއެއްގެ ގޮތުގައި ބަދަލުކުރެވިފައިވާކަމަށްވެސް އެމަނިކުފާނު ވިދާޅުވިއެވެ.