ޓެރަރިސްޓް ޖަމާއަތެއްކަމަށްވާ އިސްލާމިކް ސްޓޭޓް ނުވަތަ އައި.އެސް ޖަމާއަތަށް ނިސްބަތްވާކަމަށް ތުހުމަތުކޮށް ހައްޔަރުކުރި ދިވެއްސަކީ ސޯޝަލް މީޑިއާ ޕްލެޓްފޯމްތަކުގައި އެކި ނަންނަމުގައި އެކައުންޓްތައް ހަދައި އެ ޖަމާއަތުގެ ޕްރޮޕެގެންޑާ ފެތުރުމުގައި އިސްކޮށް ހަރަކާތްތެރިވަމުން ދިޔަ މީހެއްކަމަށް ފުލުހުން ވިދާޅުވެއްޖެއެވެ.
މި މައްސަލައާއި ގުޅިގެން މޯލްޑިވްސް ޕޮލިސް ސަރވިސްއާއި، ޔޫރަޕިއަން ޔޫނިއަންގައި ހިމެނޭ ދެ ޤައުމެއްގެ ދެ އިދާރާއަކާއި، ބިއުރޯ އޮފް އިންވެސްޓިގޭޝަން ގުޅިގެން މިއަހަރުގެ ޖެނުއަރީ މަހު 6ވަނަ ދުވަހު ރާއްޖޭގައި ހިންގި މިއޮޕަރޭޝަނުގައި، ހައްޔަރުކުރި ފިރިހެން މީހާ ދިރިއުޅޭ ގެ ބަލައި ފާސްކޮށް ޑިޖިޓަލް އެވިޑެންސްތަކެއްވަނީ ފުލުހުންގެ ބެލުމުގެ ދަށަށް ގެންްގޮސްފައެވެ.
މި އޮޕަރޭޝަންގެ ތެރެއިން ފުލުހުން ހައްޔަރުކޮށްފައިވާ އުމުރުން 30 އަހަރުގެ ދިވެހި ފިރިހެން މީހާއަކީ 2015ވަނަ އަހަރުން ފަށައިގެން ސޯޝަލް މީޑިއާ ޕްލެޓްފޯމްތަކުގައި މިކަން ކުރަމުން އަންނަ މީހެއްކަމަށް ފުލުހުން ވިދާޅުވެއެވެ. އޭނާ މިކަންކުރަނީ ޓެލެގްރާމާއި އެނޫންވެސް އެންކްރިޕްޓް ކޮށްފައިވާ މެސެޖިންގ ޕްލެޓްފޯމްތަކުގައި "ސްކާރމިޝް" އަދި "ސްކާރމިޝްކިޑް" ފަދަ އެކި ނަންނަމުގައި އެކައުންޓްތައް ހަދައިގެންކަމަށް ފުލުހުން ވިދާޅުވެއެވެ.
އައިއެސް ޖަމާޢަތަށް ތާއީދުކޮށް، އެކި ޤައުމުތަކުގައި ހަރަކާތްތެރިވާ އެ ޖަމާއަތަށް ތާއީދުކުރާ މީހުން ފަތުރާ އެ ޖަމާއަތުގެ ލިޔެކިޔުންތައް މި ގްރޫޕްތަކުގައި އޭނާ ވަނީ ދައުރުކޮށްފައެވެ. މިގޮތަށް ދައުރުކުރާ ފޮޓޯތަކާއި ވީޑިއޯތަކާއި ލިޔުންތައް ހުންނަނީ އެކި ޤައުމުތަކަށް އަމާޒުކޮށް އެ ޤައުމުތަކުގައި ބޭނުންކުރާ ބަސްބަހަށް ތަރުޖަމާކޮށްފައިކަމަށް ފުލުހުން ވިދާޅުވެއެވެ.
އިތުރަށް ބެލިބެލުމުނެ އެނގުނު ގޮތުގައި މި ގްރޫޕްތައް މެދުވެރިކޮށް، ޓެރަރިޒަމްގެ އަމަލުތައް ރާވައި ހިންގުމަށް ގޮވާލައި، އެކަމަށް ހިތްވަރުދީ ޓެރަރިޒަމްގެ އަމަލެއް ހިންގަފާނެކަމުގެ ބިރުދައްކައި އިންޒާރުދެމުންވެސް މީނާވަނީ ގޮސްފައިކަމަށް ފުލުހުން ވިދާޅުވެއެވެ. އަދި ސޯޝަލް މީޑިއާގައި ފަތުރާފައިވާ ބައެއް ކޮންޓެންޓްތަކުން ޔޫރަޕުގެ ބައެއް ޤައުމުތަކުގެ އިސްވެރިންގެ ފުރާނައަށް ނުރައްކާވާފަދަ ހަމަލާ ދިނުމަށް ގޮވާލައި، ހިތްވަރުދެމުން ގޮސްފައިވާކަމަށްވެސް ފުލުހުން ވަނީ ފާހަގަކޮށްފައެވެ.