ޔޫކްރެއިން - ރަޝިޔާ ބޯޑަރު ކައިރި ސަރަޙައްދު ފިޔަވައި ޔޫކްރެއިންގެ އެހެން ސަރަޙައްދުތަކުގައި ތިބި ދިވެހިން، ހަނގޭރީ މަގުން ރާއްޖެ ގެނައުމަށް ދަތުރު ފަށައިފިއެވެ.
ފޮރިން މިނިސްޓްރީއިން ވިދާޅުވީ މީގެތެރޭގައި 15 ދިވެހިން ހިމެނޭކަމަށެވެ. މަސައްކަތް ފަށާފައިވަނީ މި ދިވެހިން އެއްގަމު މަގުން ހަންގޭރީއަށް ގެންގޮސް، ދިވެހި ރާއްޖެއަށް ގެނައުމަށެވެ.
ފޮރިން މިނިސްޓްރީން ވިދާޅުވީ 15 ދިވެހިން މިހާރު ދަތުރުކުރަމުންދަނީ ޔޫކްރެއިން-ހަންގޭރީ ސަރަޙައްދީ ރޮނގު ކައިރިއަށްކަމަށެވެ. ހަންގޭރީގެ ސަރުކާރާއި ދިވެހި ސަރުކާރު ގުޅިގެން، ދިވެހިން ރައްކާތެރި ސަރަޙައްދަށް ގެންދިއުމުގެ މަސައްކަތްތައް ފަށާފައިވަނީ ރެއިން ފެށިގެންކަމަށް، ފޮރިން މިނިސްޓްރީން މަޢުލޫމާތުދެއްވަައެވެ.
ޔޫކްރެއިންގައި މިވަގުތު ތިބި 20 ދިވެހިންގެ ތެރެއިން، އަނެއް 5 މީހުން ތިބީ ޔޫކްރެއިން ރަޝިއާގެ ބޯޑަރު ކައިރި ސަރަޙައްދުތަކުގައެވެ. މިއީ ޔޫކްރެއިންގައި ތަޢުލީމު ޙާސިލްކުރަމުންދާ ދަރިވަރުންނެވެ.
ޔޫކްރެއިންގައި ތިބި ދިވެހިންގެ ތެރެއިން 30 މީހުން އިއްޔެވަނީ ރާއްޖެ އައިސްފައެވެ. ބޯޑަރު ސަރަޙައްދުގައި ތިބި 5 ދިވެހިން މަޑުކުރީ، ވިސާގެ ބައެއް ކަންކަން ހަމަޖައްސަން ޖެހޭތީކަމަށް ފޮރިން މިނިސްޓްރީން ވިދާޅުވެފައިއެވެ. މި 5 ދިވެހިން ތިބީ ޔޫކްރެއިންގެ ޚަރްކީވް އަދި ނިޕްރޯ ސަރަޙައްދުގައެވެ. ފޮރިން މިނިސްޓްރީން ވިދާޅުވީ މި މީހުންގެ ޙާލު ގާތުން ބަލަމުންދާކަމަށެވެ.
"މި ދަރިވަރުންނަށް ބޭނުންވާ ޒަރޫރީ ކަންކަން ކަށަވަރުވެފައިވޭތޯ ދަނީ ބަލަމުން. ފެނާއި ކާބޯތަކެތި އަދި ފައިސާވެސް ބޭނުންވާވަރަށް ހުރިކަމަށް ދިވެހިން މަޢުލޫމާތުދެނީ." ފޮރިން މިނިސްޓްރީގެ ޑިރެކްޓަރ ކޮމިއުނިކޭޝަންސް މިއުވާން މުޙައްމަދު ވިދާޅުވިއެވެ.
މި ދިވެހިން ރައްކާތެރި ހިސާބަށް ގެންދިއުމުގެ މަސައްކަތް ސަރަޙައްދީ އަދި އެކުވެރި ޤައުމުތަކާ ގުޅިގެންދަނީ ކުރަމުންނެވެ. އެގޮތުން ޔޫކްރެއިންގައި ތިބި އަވައްޓެރި އިންޑިއާގެ ރައްޔިތުން އެ ޤައުމުން ގެންނައިރު، ދިވެހިންވެސް އޭގެ ތެރޭގައި ހިމެނުމަށް މަސައްކަތް ކުރަމުންދާކަމަށް ފޮރިން މިނިސްޓްރީން މަޢުލޫމާތު ދީފައިވެއެވެ.
ޔޫކްރެއިންގައި ތިބި ދިވެހިންނަށް އެހީދެމުންދަނީ، ޖަރުމަނުގެ ބަރލިންގައި ޤާއިމުވެފައި ހުންނަ ދިވެހި އެމްބަސީގެ ފަރާތުންނެވެ. އެއްވެސް އިތުރު އެހީތެރިކަމަކަށް ބޭނުންވެއްޖެނަމަ، ވީހާވެސް އަވަހަށް އެކަން އެންގުމަށް ފޮރިން މިިނިސްޓްރީންވަނީ އިލްތިމާސްކުރައްވާފައެވެ.