ރަޝީޔާއިން ޔޫކްރެއިނަށް ދެމުންދާ ޙަމަލާތަކަށް ނިމުމެއް އަންނާނީ ރަޝިޔާގެ އަސްކަރިއްޔާގެ ބާރުގެ ދަށަށް ވެރިރަށް ކިޔޭވު ގެނެސް ޔޫކްރެއިނުގެ ވެރިކަން ބަދަލުކުރުމަށްފަހުކަމަށް އެމެރިކާގެ ދިފާޢީ ވުޒާރާއިން ލަފާކޮށްފިއެވެ.
އެމެރިކާގެ ދިފާޢީ ވުޒާރާއިން ބުނެފައިވާ ގޮތުގައި ރަޝިޔާގެ ޢަމަލުތައް ބައްޓަންކޮށްފައިވަނީ ޔޫކްރެއިނުގެ ވެރިކަން ބަދަލުކުރުމަށްފަހު ރަޝިޔާއިން ބޭނުންވާފަދަ ވެރިއަކު ޢައްޔަންކުރުމަށެވެ. 2014ވަނަ އަހަރުގެ ފަހުން ޔޫކްރެއިނުގައި އޮތީ ހުޅަނގާ ރައްޓެހި އަދި ގާތް ގުޅުންތަކެއް ބާއްވަމުންދާ ސަރުކާރެކެވެ.
ޔޫކްރެއިނަކީ ވިލާތުގެ އިއްތިޙާދާއި ހުޅަނގުގެ އަސްކަރީ އިއްތިޙާދު، ނޭޓޯގެ މެންބަރު ޤައުމެއް ނޫނެވެ. ޔޫކްރެއިނަށް ޙަމަލާ ދިނުމުގެ ކުރިން ރަޝިޔާއިން ބޭނުންވީ ނޭޓޯގެ މެންބަރުކަން ޔޫކްރެއިނަށް ދުވަހަކުވެސް ނުދޭނެކަމުގެ ޔަޤީންކަމެވެ. ނަމަވެސް ވިލާތުގެ އިއްތިޙާދުންވެސް އަދި ނޭޓޯއިންވެސް އެފަދަ ޔަޤީންކަމެއް ދިނުމަށްވަނީ ދެކޮޅުހަދައިފައެވެ.
ރަޝީޔާއިން ޔޫކްރެއިނަށް ދެމުންދާ ޙަމަލާތަކުގައި މަދު ގަޑިއިރުކޮޅެއްގެ ތެރޭގައި ޔޫކްރެއިނުގެ ވައިގެ ދިފާޢުގެ ނިޒާމު ނައްތާލައި 70އަށްވުރެ ގިނަ އަސްކަރީ މަރުކަޒާއި 11 އަސްކަރީ ވައިގެ ބަނދަރު ހަލާކުކޮށްލިއެވެ. އެއާއެކު ތިން ސަރަޙައްދަކުން ޔޫކްރެއިނުގެ ސަރަޙައްދީ ރޮނގު ހުރަސްކޮށް ވައިގެ މަގުންނާއި ކަނޑު މަގުންނާއި އެއްގަމު މަހުން ވަރުގަދަ ޙަމަލާތަކެއް ދޭން ފެށިއެވެ. އެ ގޮތުން ޔޫކްރެއިނުގެ ދެކުނާއި އިރުމަތީގެ ގިނަ ސަރަޙައްދުތައް އޮތީ ރަޝިޔާގެ އަސްކަރިއްޔާގެ ބާރުގެ ދަށުގައެވެ. އަދި ރަޝިޔާގެ އަސްކަރީ އުޅަނދުތަކުގެ މިޞްރާބު މިހާރު ހުރީ ވެރިރަށް ކިޔޭވާ ދިމާލަށެވެ.
ރަޝިޔާއިން ވަރުގަދަ ޙަމަލާތަކެއް ދޭން ފެށުމުން ޔޫކްރެއިނުން ބުނެފައިވަނީ މުޅި ޤައުމު އިސްތިޢުމާރުވުމުގެ ބިރު އޮތްކަމަށާއި ބައިނަލްއަޤްވާމީ އެހީތެރިކަން ބޭނުންވާކަމަށެވެ. ނަމަވެސް ހުޅަނގުގެ ބާރުތަކުން ޔޫކްރެއިނުގެ ދިފާޢުގައި ރަޝިޔާއާ ކުރިމަތިލުމުގެ ވިސްނުމެއް ނުގެންގުޅެއެވެ. ރަޝިޔާއިން ޔޫކްރެއިނަށް ޙަމަލާ ދޭން ފަށައިފައިވަނީ އެމެރިކާއާއި ކެނެޑާއާއި އޮސްޓުރޭލިޔާއާއި ޖަޕާނާއި އިނގިރޭސިވިލާތާއި ވިލާތުގެ އިއްތިޙާދުން އެއްގަލަކަށް އަރައި ރަޝިޔާއާ ދެކޮޅަށް ހަރުކަށި އިޤްތިޞާދީ ދަތިކުރުމުގެ ފިޔަވަޅުތަކެއް އަޅާފައިވަނިކޮށެވެ. ރަޝިޔާއިން ބުނެފައިވަނީ އެ ޤައުމާ ދެކޮޅަށް އަޅައި ދަތިކުރުމުގެ ފިޔަވަޅަކުން ލިބޭނެ ގެއްލުމެއް ނެތްކަމަށާއި އެފަދަ ފިޔަވަޅުތަކަކީ އައު ކަމެއް ނޫންކަމަށެވެ.
2008ވަނަ އަހަރުގެ ތެރޭގައި ރަޝިޔާއާ އިންވެގެން އޮންނަ ޖޯޖިޔާގައި ދިރިއުޅޭ ރަޝިޔާ ބަހުން ވާހަކަދައްކައި ކުރީގެ ރަޝިޔާގެ ރައްޔިތުންނާ ދެކޮޅަށް ޖޯޖިޔާގެ އަސްކަރިއްޔާއިން ޤަތުލުޢާއްމެއް ހިންގުމުން ރަޝިޔާއިންވަނީ ސަރަޙައްދީ ރޮނގު ހުރަސްކޮށް ޖޯޖިޔާއަށް ވަރުގަދަ ޙަމަލާތަކެއް ދިނުމަށް އެ ސަރަޙައްދުތައް ރަޝިޔާގެ ބާރުގެ ދަށަށް ގެނެސްފައެވެ. އެ ސަރަޙައްދުތަކުން ރަޝިޔާގެ ފައުޖުތައް ފޭބީ އެ ސަރަޙައްދުތަކުގައި ދިރިއުޅޭ ރައްޔިތުންނަށް އެއްވެސް ގޯނާއެއް ނުކުރާނެކަމުގެ ޔަޤީންކަން ޖޯޖިޔާއިން ދިނުމުންނެވެ. އަދި 2014ވަނަ އަހަރުގެ ތެރޭގައި ޔޫކްރެއިންނަށް ޙަމަލާ ދިނުމަށްފަހު އެ ޤައުމުގެ ކުރިމިޔާ ސަރަޙައްދުވަނީ ރަޝިޔާގެ ބާރުގެ ދަށަށް ގެނެސްފައެވެ.