ރައްޔިތުންނާއި ގުޅިގެން އިޖުތިމާއީ ބަދަހިކަމާއި ވިލުންވެރިކަން އިތުރުކުރުމުގެ މަޤުސަދުގައި ކުރިއަށްގެންދާ "ހަފްތާރެސް" ޕްރޮގްރާމް ތ. ވޭމަންޑޫގައި ފަށައިފިއެވެ.
މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓްއާއި ނޭޝަނަލް ކައުންޓަރ ޓެރަރިޒަމް ސެންޓަރ ގުޅިގެން ކުރިއަށްގެންދާ "ހަފްތާރެސް" ޕްރޮގްރާމަކީ އިޖުތިމާއީ ބަދަހިކަމާއި ވިލުންވެރިކަން އިތުރުކުރުމުގެ ގޮތުން ކަމާގުޅޭ އިދާރާތައް ގުޅިގެން މަސައްކަތް ކުރެވޭނެ މާހައުލެއް ޤާއިމުކުރުމަށް ކުރިއަށްގެންދާ ޕްރޮގްރާމެކެވެ.
ހަތަރު ދުވަހަށް ބަހާލައިގެން ކުރިއަށްގެންދާ މި ޕްރޮގްރާމްގެ މަޤްސަދަކީ މުޖުތަމައުގެ އެއްބައިވަންތަކަމާއި، އެއްބައިވަންތަކަން ކުރިއަރުވައި ދެމެހެއްޓުމަށްޓަކައި އެކުވެރި އަދި އުފާވެރި މާހައުލެއް ޤާއިމުކޮށްދިނުމެވެ. އަދި މުޖުތަމައުގައި ހުންނަ އެކިއެކި މައްސަލަތަކާއި ގުޅޭ ދާއިރާތަކުން އާންމުންނާއި ޒުވާނުންގެ ހޭލުންތެރިކަން އިތުރުކުރުވުމެވެ.
"ހަފްތާރެސް" ޕްރޮގްރާމް ފައްޓަވައިދެއްވާ ވާހަކަފުޅު ދައްކަވަމުން ޔޫތު މިނިސްޓްރީގެ ސްޓޭޓް މިނިސްޓަރ ހުސައިން އިސްމާއިލް ވިދާޅުވީ އަމާންކަމާއި އިޖުތިމާއީ ވިލުންވެރިކަން ޤާއިމުކުރުމަށްޓަކައި ހުރިހާ ފެންވަރެއްގައި އިސްނަގައިގެން މަސައްކަތްކުރުމުގެ މުހިއްމުކަމެއްކަމަށެވެ. އަދި އޮޅުވާލުމާއި ދޮގު މައުލޫމާތު ފެތުރުމަށް ހިންގޭ ހަރަކާތްތަކަށް އެންމެންވެސް ސަމާލުވުމަކީ މުހިއްމުކަމެއްކަމަށް އޭނާ ފާހަގަކުރެއްވިއެވެ.
"އަޅުގަނޑުމެން މަސައްކަތްކުރަންވީ ސައްހަ މައުލޫމާތު ހޯދައިގެން އެއީ ރަނގަޅު ވާހަކައެއްތޯ އެދައްކަނީ ނޫނީ މިއީ އެންމެ ރަނގަޅު ކަންތައްތައްތޯ ބަލައިގެން މީހަކު ބުނި ބުންޏައް ނުބަލައި އަޅުގަނޑުމެންގެ ބުއްދިއާއި ވިސްނުން ބޭނުންކޮށްގެން ކަންތައްތައް ނިންމުމަށް " ސްޓޭޓް މިނިސްޓަރ ހުސައިން އިސްމާއިލް ވިދާޅުވިއެވެ.
6 ވަނަ ހަފްތާރެސް ޕްރޮގްރާމް މިފަހަރު ވޭމަންޑޫގައި ކުރިއަށްދާއިރު މި ޕްރޮގްރާމް އަމާޒުކޮށްފައިވަނީ ރަށުގެ މުއައްސަސާތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިސްވެރިންނާއި، ބެލެނިވެރިންގެ އިތުރުން ޒުވާނުން އަދި ކްލަބް ޖަމިއްޔާތަކަށެވެ. މީގެ އިތުރުން ތ އަތޮޅަށް ނިސްބަތްވާ ރަށްތަކުގެ ރަށު ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މި ޕްރޮގްރާމްގައި ބައިވެރިވުމުގެ ފުރުސަތުވެސް ވަނީ ހުޅުވާލެވިފައެވެ.
މި ޕްރޮގްރާމްގައި ހޭލުންތެރިކުރުވުމުގެ ސެޝަންތަކުގެ އިތުރުން ރައްޔިތުން ގުޅިގެން ބާއްވާ ހެނދުނުގެ ނާސްތާއަކާއި، އާއިލީ ހަވީރެއްގެ އިތުރުން މުނިފޫހިފިލުވުމުގެ ހަރަކާތްތައް ކުރިއަށްގެންދާނެއެވެ.
މި ސެޝަންތައް ކުރިއަށް ގެންދާނީ އެން.ސީ.ޓީ.ސީ، ޔޫތު މިނިސްޓްރީ، މޯލްޑިވްސް ޕޮލިސް ސަރވިސްއާއި ދިވެހިރާއްޖޭގެ އިސްލާމީ ޔުނިވާސިޓީގެ އިތުރުން މޯލްޑިވިއަން ރެޑްކްރެސެންޓްގެ ފަރާތުންނެވެ. އެގޮތުން ވޭމަންޑޫގެ މުއައްސަސާތަކުގެ އިސްވެރިންނާއި، މުދައްރިސުން އަދި ބެލެނިވެރިންނަށް އަމާޒުކޮށްގެން 3 މަސައްކަތު ބައްދަލުވުމެއް، އަދި ތ. ތިމަރަފުށީގެ މުދައްރިސުންނާއި ބެލެނިވެރިންނަށް އަމާޒުކޮށްގެން ދެ މަސައްކަތު ބައްދަލުވުމެއް މި ޕްރޮގްރާމްގެ ދަށުން ކުރިއަށްގެންދާނެއެވެ. މީގެ އިތުރުން މިނިސްޓްރީ އޮފް ޖެންޑަރ އެންޑް ސޯޝަލް ސަރވިސަސް އާއި ގުޅިގެން ކުޑަކުދިން ގެންގުޅުމުގައި ބަލަންޖެހޭ ކަންތައްތަކާއި ގުޅޭ ސެޝަނެއްވެސް ކުރިއަށްގެންދާނެއެވެ.
"ހަފްތާރެސް" ޕްރޮގްރާމަކީ 2019 ވަނަ އަރުން ފެށިގެން ޔޫތު މިނިސްޓްރީގެ ފަރާތުން ރާއްޖޭގެ އެކި ރަށްރަށުގައި ޒުވާނުންނަށް އަމާޒުކޮށްގެން ހިންގަން ފަށާފައިވާ ޕްރޮގްރާމެކެވެ. މިއީ މި ސިލްސިލާގެ ޕްރޮގްރާމްގެ ތެރެއިން މިއަހަރު ހިންގޭ ދެވަނަ ޕްރޮގްރާމްވެސްމެއެވެ. މިއަހަރުގެ ފުރަތަމަ ޕްރޮގްރާމް ކުރިއަށް ގެންގޮސްފައިވަނީ ޏ. ފުވައްމުލަކުގައެވެ.